Xera adelanta dellos cantares de ‘Llume’ en Radio Sele

Esti martes, nel programa ‘Nueches de radio’ de Radio Sele, Xera va facer un preestrenu de ‘Llume’, el so tercer trabayu. El discu va tar disponible al completu pa la so descarga de baldre na web del grupu nunos díes.
 
Los siguidores de la banda de folk-electrónicu van poder conocer dalgunos de los sones d’esti llarga duración a lo llargo de la entrevista que los presentadores de ‘Nueches de radio’, Xuanxo Mariño, Mely Fernández y Daniel Vallina, van facer a los integrantes d’una de les formaciones más internacionales del país. ‘Llume’ trátase del tercer discu de la banda tres ‘Lliendes’ (2006) y ‘Tierra’ (2009), y destaca pola participación de Martin Russell, téunicu d’Afro Celt Sound System –banda cola que van coincidir nel Festival Interceltique de Lorient/An Oriant–, que s’encarga del máster.
 
La presentación oficial del discu va tener llugar el sábadu 14 de xunetu, a les 20 hores, nel Centru Cultural Internacional Avilés con un conciertu especial en soníu 5.1 que grabar la productora Señor Paraguas. Nél tán previstes delles collaboraciones de la Banda Gaites La Raitana y la seición Aurum del coru Los Peques del León de Oro, de Ḷḷuarca, amás de delles sorpreses. Les entraes yá tán a la venta a un preciu de 10 euros en tiquExpress, los caxeros de Caxastur, en Llaboral Ciudá de la Cultura y nel propiu centru avilesín. Amás, tamién pueden mercase per teléfonu nel 902.106.601.

secciones: