Skip to content

El Seminariu de Filoloxía Asturiana va presentar trés espublizaciones

Xunu 11, 2012 por Pablo R. Guardado

El Club de Prensa de La Nueva España va acoyer esti miércoles la presentación de trés espublizaciones nueves del Seminariu de Filoloxía Asturiana (SFA) de la Universidá d’Uviéu. L’actu va principiar a les 19 hores y tien entrada llibre.
 
Xulio Viejo Fernández, direutor de la revista de Filoloxía Asturiana, y Ramón d’Andrés, coordinador del SFA, van encargase de la presentación de les trés espublizaciones nun actu nel que tamién va tar presente la vicerrectora d’Investigación y Campus d’Escelencia de la Universidá d’Uviéu, María Paz Suárez Rendueles, asina como un representante de la Obra Social y Cultural de Caxastur. Los exemplares que va dar a conocer esti miércoles el SFA son ‘Cien años de filoloxía asturiana’, volume coleutivu coordináu por Viejo que recueye les contribuciones al congresu sobre'l centenariu de ‘El dialecto leonés’, de Ramón Menéndez Pidal, y el llibru coleutivu ‘Lengua, ciencia y fronteras’, coordináu por Ramón d'Andrés, que recueye les contribuciones al congresu celebráu en so día na Universidá d'Uviéu. Nesta xornada, tamién van presentase los volúmenes 6/7/8 y 9/10 de la Revista de Filoloxía Asturiana.
 
El Seminariu de Filoloxía Asturiana ye un grupu d’investigación reconocíu pola Universidá d’Uviéu que se constituyó nel 2003 col oxetivu de “afitar los estudios de Filoloxía Asturiana na Universidá d'Uviéu, forniéndo-yos una mínima estructura institucional y organizativa, non contemplada nel actual diseñu universitariu de departamentos y árees de conocencia”.

Comparte...