La esposición de la Mázcara Ibérica aporta al Pueblu d'Asturies

|

Esti vienres va tener llugar nel Muséu del Pueblu d’Asturies la inauguración de la esposición de la Mázcara Iberica. Munches imáxenes y traxes de delles mazcaraes componen esta muestra itinerante entamada pola asociación Progestur.
 
Tres pasar per Lisboa, Terceira, Zamora, Porto y Faro, esta esposición dedicada a la tradición de les mazcaraes aporta a Xixón pa quedase tol branu nel Muséu del Pueblu d’Asturies gracies a la iniciativa de Progestur, coleutivu que busca protexer el patrimoniu cultural portugués, y a la intermediación de la l’Asociación pa la Recuperación de Los Sidros y Les Comedies ‘El Cencerru’. Nella van poder vese munches imáxenes de la cantidá importante de mazcaraes que permanecen vives en Portugal, Galicia, Asturies, Lleón, Zamora, Salamanca, Cáceres, Cantabria o Navarra, asina como los traxes de dalgunes d’elles, como’l de los Sidros de Valdesoto, el Guirria de Ponga, la Vijanera de Silió (Cantabria) o Os Boteiros de Viana do Bolo (Ourense), ente otros. Una forma prestosa d’averase a esta tradición tan guapa de les mazcaraes d’iviernu.
 
La inauguración de la muestra, que va tar abierta al públicu hasta’l 30 de setiembre, va celebrase’l vienres, a les 13 hores, na Casa los Valdés del recintu museísticu xixonés con un actu nel que van tar presente Hélder Ferreira, presidente de Progestur, y Virgilio López, encargáu de la esposición, xunto a autoridaes asturianes.
 
Protagonismu pa Portugal nel primer Festival Arcu Atlánticu
 
Progestur tamién ta convidada a participar nel Festival Arcu Atlánticu de Xixón, que va tener llugar ente los díes 21 y 29 de xunetu y que va tar dedicáu nesti primer añu a Portugal. D’esta forma, el coleutivu del estáu vecín va encargase d’entamar una zona de puestos con gastronomía y artesanía lusa en Campu Valdés, actividá que se va complementar con actuaciones de fadu y un conciertu, el sábadu 28 na Plaza Mayor, de la banda de música tradicional Nação Vira Lata.

Contador Estadistiques