Sambre actúa esti vienres en Figareo xunto con otres cinco bandes asturianes nel II Rescamplu Rock

|

Figareo vive esta fin de selmana les sos fiestes adelantaes de San Xuan, que s’abren el vienres col II Rescamplu Rock. Esti festival gratuitu presenta seis formaciones asturianes, ente elles la banda punk-rock n’asturianu Sambre.
 
Sambre, que presentó recién el so segundu trabayu, l’EP ‘L’arume’, con dos conciertos en Xixón y Uviéu, va repetir participación nel Rescamplu Rock tres la bona esperiencia del añu pasáu. Nesta ocasión comparten cartelu otra vuelta con Octopus Garage, a los qu’hai que sumar esti añu les formaciones Space Coyote, A-66, Grieskas y Dentellada. Seis bandes que toquen dellos estilos dientro del rock.
 
Les actuaciones van principiar a les 21.30 hores nel parque Tartiere y ta previsto que Sambre zarre esti festival qu’abre les fiestes de San Xuan de Figareo y que continúen el sábadu. A les 20.30 hores ta previsto l’entamu de les mesmes cola llectura del pregón a cargu de Marcos Cifuentes, vecín del pueblu y coordinador nuevu d’Izquierda Xunida nel conceyu de Mieres.

Contador Estadistiques