Skip to content

La Coordinadora afirma que’l Gobiernu d’Álvarez-Cascos quixo dexar atada la mina d’oru de Tapia

Xunu 1, 2012 por Pablo R. Guardado

La priesa del Executivu –yá en funciones– d’Álvarez-Cascos pa tramitar les fases de consultes pal estudiu d’impautu ambiental del proyeutu de la mina de Tapia sorprende a la Coordinadora. Afirma que quixo dexar atada la esplotación d'oru en Salave.
 
Según informen dende la Coordinadora Ecoloxista d’Asturies, “en sólo un mes dende la resolución de Mediu Ambiente espublizada nel BOPA del 24 d’abril pasáu, onde s’imponíen les condiciones del estudiu, dende’l Principáu en funciones, al traviés del Serviciu de Promoción Minera, saquen yá l’estudiu definitivu ensin resolver les irregularidaes numberoses que tenía la fase anterior y ensin tiempu material pa verificar el conteníu completu presentáu pola empresa”. “Estes facilidaes que dio’l Principáu del señor Cascos yá se vieron reflexaes cuando amplió la concesión minera solicitada a los conceyos de Castropol y El Franco nun tiempo cortísimy y tando yá en funciones”, continúen los ecoloxistes, que consideren que l’Executivu de Foro quixo dexar atada la mina d’oru de Salave enantes de ceder el poder al equipu de Javier Fernández, contrariu a la esplotación minera proyeutada en Tapia.
 
“Sorprenden estes prieses pa un proyeuto de tanto impauto ambiental y tan cuestionáu, con tantes irregularidaes na so tramitación alministrativa, que va ser una hipoteca pal futuru de la zona polos residuos del tratamientu del mineral, que quedarán pa siempre nel llugar, colos riesgos consiguientes una vegada la empresa minera cole” nel momentu de que s’escose’l yacimientu, espliquen dende la Coordinadora. Especialmente peligroses son les balses de cianuru previstes –qu’ocuparíen una superfecie de 530.000 metros cuadraos– pola so posibilidá de filtración, lo que contaminaría tola zona de manera irremediable.

AdxuntuTamañu
BOPA Información pública del estudiu d'impautu ambiental mina de Salave.pdf135.17 KB
Comparte...