La Coordinadora critica la postura que mantién la FSA-PSOE al respeuto de la incineradora

|

El presidente d’Asturies, Javier Fernández, confirmó’l miércoles la so intención de construyir la incineradora de Serín. La Coordinadora Ecoloxista critica que’l so partíu apoye n’Asturies la quema de residuos cuando n’Europa opónse a ella.
 
“Mentes esti miércoles pasáu Javier Fernández lleía’l so discursu d’investidura nel que nos decía que tien previsto acometer la construcción de la incineradora de residuos en Xixón, conocíamos que’l Parllamentu Européu aprobó por inmensa mayoría eliminar de forma gradual los basureros y la incineración de materiales reciclabes, xusto los que quier quemar el PSOE na so incineradora de residuos urbanos”, esplica la Coordinadora Ecoloxista d’Asturies. Según datos aportaos polos ecoloxistes, l’informe de la Comisión qu’afala a siguir estes polítiques al respeuto de la incineración foi aprobada por 479 votos a favor, 66 en contra y 63 astenciones. Ente les formaciones que refugaron la quema de residuos urbanos taben el PSOE y el PP español.
 
“Una vegada más se demuestra que’l PSOE asturianu, col so proyeutu d’una incineradora de 420.000 tonelaes/añu, renuncien a les polítiques europees de residuos basaes na reducción, la reutilización y el reciclaxe”, continúen dende la Coordinadora, que recuerda que los socialistes asturianos “distánciense de la postura que mantién el so partíu nel restu d’España”, onde se manifestó en contra de proyeutos similares en Galicia, València, Alacant, Madrid y Navarra.

Contador Estadistiques