Sambre presenta l’EP ‘L’arume’ con dos conciertos, el primeru esti xueves en Xixón xunto a The Mahones

|

La banda de punk-rock n’asturianu Sambre tien previsto dos conciertos pa presentar el so EP ‘L’arume’. El primeru va celebrase esti xueves en Xixón y nél van actuar tamién los canadienses The Mahones y los gallegos Bastards on Parade.
 
Compuestu por cuatro cantares, ún d’ellos instrumental, ‘L’arume’ ye’l segundu trabayu de Sambre, que nel 2009 espublizó’l discu ‘Na Solombra’ y que tamién tien grabaos dellos temes pa recopilatorios: ‘Asturcón’, pal tributu a Dixebra; ‘Atravesáu pelos chigres’, pal Calzada News volume 2; y ‘Nun mos gusten les lenteyes’, pal homenaxe a Xentiquina. Lletres n’asturianu, gaita asturiana y un soníu potente que permiten a esti grupu consolidase como ún de les bandes de referencia de la escena n’Asturies.
 
Cola fin de presentar esti EP a los sos siguidores, Sambre va dar dos conciertos, ún en Xixón y otru n’Uviéu. El primeru d’ellos va tener llugar güei nel Pub Buddha con un cartel de luxu, yá qu’amás de los asturianos van tocar los gallegos Bastards on Parade y los canadienses The Mahones. Procedentes d’A Coruña, Bastards on Parade ye una de les bandes estatales que más tán saliendo a tocar per Europa nestos años últimos. Con un estilu que bebe del punk y del soníu celta, van interpretar en Xixón cantares del so discu últimu, ‘Tales from the death shore’.
 
Poca presentación necesita The Mahones, banda con más de venti años de trayeutoria. Tres percorrer toda Norteamérica xunto colos Dropkick Murphys, dieron el mes pasáu'l saltu a Europa pa completar el ‘The black irish world tour’, que trae a los canadienses otra vuelta a Xixón. Les actuaciones van principiar a les 19.30 hores col conciertu de Bastards on Parade, al que va siguir el de Sambre, zarrando esta folixa celta The Mahones. El preciu de la entrada ye de 12 euros.
 
N’Uviéu, con A-66
 
El segundu conciertu d’esta pequeña xira de Sambre va tener llugar el vienres próximu, día 18, na uviedina La Antigua Estación. Pa esta cita, la banda de punk-rock va tar acompañada polos mierenses A-66. El conciertu va principiar a les 21 hores y el preciu de la entrada va ser de 3 euros, 5 xunto con ‘L’arume’.    

AdxuntuTamañu
Image icon L'arume Sambre.jpg85.46 KB
Contador Estadistiques