La XDLA critica “la falta de visibilidá” que tuvo esta edición de la Selmana de les Lletres Asturianes

La XXXIII Selmana de les Lletres Asturianes nun tuvo la visibilidá que se merez, n’opinión de la XDLA. Esti coleutivu denuncia la non celebración del actu de llectura de testos na Xunta Xeneral y la cobertura tan probe que fixo la RTPA.
 
Pasaos yá los actos institucionales y reivindicativos que s’entamaron por cuenta de la Selmana de les Lletres Asturianes, la Xunta pola Defensa de la Llingua (XDLA) “quier denunciar la falta de visibilidá que tuvo esti añu la xornada d’homenaxe a la nuestra llingua y a les persones que fixeron lliteratura con ella a lo llargo de los sieglos”. Asina, critica que nun se celebrara l’actu institucional de llectura de testos n’asturianu, nel que los diputaos facíen “un homenaxe al nuestru idioma, la nuestra lliteratura y los nuestros escritores, mostrando asina lo que significa la llingua y lo que tendría que ser pa los nuestros representantes políticos: una fonte de consensu y un patrimonio de tolos asturianos, sía cual sía la so ideoloxía”.
 
El coleutivu ciudadanu recuerda qu’esti eventu “convirtióse col pasu de los años nun de los más mediáticos de la Selmana de les Lletres, con gran visibilidá gracies a l’atención que-y daben los medios de comunicación”. “La inestabilidá política del país nun pue afectar a la yá curtia visibilidá que-y dan les instituciones a la nuestra llingua. La falta d’esti actu tan solemne nun sería tan grave si’l nuestru idioma s’usara con normalidá a lo llargo del añu dientro del Parllamentu. Sicasí, por desgracia, sóbrennos los deos d’una mano pa contar les xornaes onde’l nuestru idioma tien güecu –siempre de manera testimonial– dientro de la Xunta Xeneral”, continúa’l comunicáu.
 
La XDLA tamién tien crítiques pal ente de comunicación públicu pola cobertura tan probe que fixo de los distintos actos entamaos por mor de la Selmana de les Lletres Asturianes. “La televisión pública (TPA), qu’el restu del añu nun destaca precisamente pol so apoyu a la llingua y cultura asturiana, nun retresmitió esti añu la Xunta Estraordinaria que fai cada añu l’Academia de la Llingua Asturiana. Tampoco nun s’emitió nengún especial sobre la vida y obra de los autores homenaxaos na xornada –nesta ocasión Benito de l’Auxa y Antón Balvidares–, como veníen faciendo tamién dende hai años al traviés de RPA”, apunten dende’l coleutivu de defensa del idioma, que recuerda que la RTPA ye “una entidá pagada coles perres de tolos asturianos y que tien ente los sos principios la promoción del nuestru idioma”.