Skip to content

Asturies va tener una representación importante nel VII Festival Máscara Ibérica de Lisboa

Mayu 9, 2012 por Pablo R. Guardado

La presencia asturiana nel VII Festival Máscara Ibérica de Lisboa, que principia’l xueves, medra añu tres añu. Nesta ocasión participen Los Sidros y Les Comedies de Valdesoto y Os Reises de Valledor, amás de dellos grupos musicales.
 
Esti certame, el más importante de los que se celebren na península alredor de les mazcaraes, convoca a una gran cantidá de xente de dientro y de fuera de Portugal, atrayíos pola gran cantidá d’actividaes programaes dende mañana hasta’l domingu y, sobre manera, pola vistosidá y variedá de grupos que participen nél. Nesta edición del festival internacional lisboeta tán convidaos un total de 21 mazcaraes, que van desfilar el sábadu, a les 16.30 hores, peles cais de la capital portuguesa, dende la Praça do Municipio a la Praça do Rossio. Un eventu dignu de presenciar nel que la representación asturiana va correr a cargu de Los Sidros y Les Comedies de Valdesoto y Os Reises del Valledor.
 
Completen el llistáu de mazcaraes los Caretos de Langoa (Mira); Caretos de Varge y Caretos de Parada (Bragança); Cardadores de de Vale de Ílhavo (Aveiro); Entrudo das Aldeias do Xisto de Góis (Coinmbra); Los Mazcaras y Los Lardeiros, y Los Boteiros do Viana do Bolo (Galicia); Los Toros y los Guirrios de Velilla de la Reina (Lleón); Los Hombres de Musgo de Béjar (Salamanca); El Pajarico y el Caballico de Villarino tras la Sierra, La Filandora de Ferreras de Arriba, Los Carnavales de Villanueva de Valrojo, la Vaquilla y los Cencerrones de Palacios del Pan, La Vaca Antrueja de Pereruela de Sayago, El Tafarrón de Pozuelo de Tábara, La Vaca Bayona de Almeida de Sayago y El Atenazador de Bercianos de Aliste (Zamora); Las Carantoñas de San Sebastián de Acehúche, Jarrampas de Piornal y Los Negritos de Montehermoso (Cáceres); y Altsasuko Inauteria (Nafarroa).
 
Actuaciones musicales
 
Xunto a los miembros de les dos mazcaraes asturianes, van viaxar a Portugal dellos músicos pa dar a conocer la cultura asturiana en Lisboa. Asina, Los Sidros y Les Comedies van tener cuatro actuaciones xunto con La Bandina del Grupu Principáu de Llugones, Héctor Braga y Anabel Santiago, mañana y el vienres a les 14 y 17 hores. Tamién el vienres, anque de nueche, dientro de l’actividá ‘Palco Ibérico’, va dar un conciertu de baldre Skama la Rede xunto a los portugueses Mu. Nel mesmu llugar, el domingu a les 18 hores, va xubise al escenariu l’Asturiana Mining Company, que va tar acompañada de la banda portuguesa Rakia.
 
La representación institucional nesti certame de cuatro díes programaos pol coleutivu Progestur va correr a cargu del alcalde de Siero, Eduardo Martínez Llosa, y del conceyal de Turismu sierense, Manuel Ballesteros. Otra manera, Progestur tien confirmada la so presencia nel Festival Atlánticu de Xixón, que va celebrase del 21 al 29 de xunetu, y lleva al Muséu del Pueblu d’Asturies, gracies a la intermediación de l’Asociación pa la Recuperación de Los Sidros y Les Comedies ‘El Cencerru’, la esposición itinerante Mázcara Ibérica, que va tar a disposición del públicu del 8 de xunu al 9 de setiembre.
 
Na semeya, Los Sidros y Les Comedies en Zamora.
 

Comparte...