El socialista Hollande gana les eleiciones franceses y va dir a la segunda vuelta con Sarkozy

|

Con un 28,63 por cientu de los votos, el socialista François Hollande foi’l ganador de la primer vuelta de les presidenciales franceses. Sarkozy conformóse con un 27,1 por cientu y l’ultraderechista Frente Nacional pasa a ser la tercer fuercia.
 
Hollande, de 57 años, va midise, poro a Sarkozy na segunda vuelta de les presidenciales, que van celebrase'l 6 de mayu. Los sondeos fechos ayeri por trés empreses d'opinión revelen qu'ente'l 48 y el 50 por cientu de los votantes de la ultraderechista Marine Le Pen, que sumó un 18 por cientu del total de votos, van apoyar a Sarkozy na segunda vuelta, mentes que los partidarios del centrista François Bayrou, el quintu más votáu con un 9,1 por cientu, tán claramente dividíos ente los dos rivales y una tercer parte d'ellos caltiénense indecisos.
 
Pela so parte, l’ izquierdista Jean-Luc Melenchon, cuartu candidatu con más apoyos al sumar un 11,1 por cientu del total, pidió’l votu pa Hollande na segunda vuelta, que tamién podría tener el sofitu de los votantes verdes d’Eva Joly y de los de dos candidatos trotskistes. En total, el socialista podría ganar en mayu con ente un 53 y un 56 por cientu de los votos. Otra manera, hai que destacar que la participación na cita coles urnes d’ayeri foi d’un 80,2 por cientu.

Contador Estadistiques