Influencia del discursu de recuperación

¿Cuála ye la so percepción -del 1 al 10*- sobre la capacidá d'influencia del movimientu de recuperación llingüística en 2015?

Media: 4.35

¿Piensa que la situación ye 1, 0 o -1 qu'en 2014?

Media: -0.04

Paezme que nun hai capacidá de tresmitir polos medios de la xente que tamos en ámbitos de recuperación llingüistica, que buscamos algo cultural y social. Y nalgunos casos, hai xente qu’acepta meyor el discursu cuando usamos l’Asturianu si-yos paez que nun lo facemos reivindicándolo, que ye porque somos asina, o seya cuando-yos paez que nun hai discursu. ¡¡Curioso¡¡

DANI G. DE LA CUESTA
Músicu y investigador de música tradicional

Hai un horizonte políticu nuevu que tien incorporáu'l discursu de reivindicación llingüistica y eso supón avanzar.

PENÉLOPE MIRANDA
Responsable de SNL

Nun noto ninguna meyoría.

VICENTE GARCÍA OLIVA
Escritor

El movimientu de recuperación del asturianu tien cada vegada una mayor presencia y más seria. Una polémica como la de Miguel Alarcos va venti o venticinco años acabaría con una montonera d'artículos contra l'asturianu. Güei consiguimos que falar contra l'asturianu seya políticamente incorrecto. Pero cuidao, esto nun significa que nun esistan enemigos del idioma trabayando contra él, namás que tienen de facelo de forma más foína.

INACIU GALÁN
Presidente d'Iniciativa pol Asturianu

Saben qu'existimos y tenemos influencia. Un exemplu ye nel tema TPA, pero ye difícil con medios de comunicación que te silencien.

DAMIÁN BARREIRO
Periodista

Ye meyor nel  nuevu Parllamentu.

GASPAR LLAMAZARES
Diputáu na Xunta Xeneral

Quiero creer que yá tocamos fondu.

FAUSTINO ZAPICO
Conceyal y profesor

El discursu llingüísticu nun tien prácticamente influyencia nel ámbitu políticu, anque sí nel social. Son exemplos d'ello, per un llau, la presencia nula nel discursu políticu pa les elecciones xenerales. Pel otru, la reacción social ante l'ataque a la llingua de Miguel Alarcos.

NACIU VARILLAS
Periodista

Nun ye mui visible y nun llega a la xente esti trabayu. Hai que facelo mas visible; llegar a tola xente; a tolos llugares. Nun puede siguir siendo cosa de minories y dedicación de xente voluntariosa.

XOSÉ ANTÓN FERNÁNDEZ 'AMBÁS'
Músicu y etnógrafu

Sigue faltando qu’el propio movemento crea a lluita na que ta trabayando y deixarse de frikadas en Internet: inda queda muito llabor por fer y nun se pode esperar a qu’a conseyeiría ou el goberno fagan daqué.

MIGUEL RODRÍGUEZ MONTEAVARO
Escritor

A aparición de novas formacióis políticas fixo que se falase máis del tema nos medios y nas institucióis.

MONCHO MARTÍNEZ CASTRO
Escritor