Félix Pío de Aramburu y Zuloaga
![Félix Pío de Aramburu y Zuloaga Félix Pío de Aramburu y Zuloaga](https://asturies.com/sites/default/files/styles/medium/public/escritores/image001_3.gif?itok=PgE2iL39)
Naz Félix Pío de Aramburu y Zuloaga’l cincu de mayu de 1848 n’Uviéu . Estudió Artes, Filosofía y Lletres, Derecho Civil y Canónicu. Amiesta Aramburu tola vida la cultura universal y l’asturianismu: caderalgu y rector de la Universidá d’Uviéu, secretariu de la Sociedá Económica d’Amigos del País d’Asturies, maxistráu del Tribunal Supremu, autor de La nueva ciencia penal, collaborador de la monumental Asturias de Bellmunt, autor él mesmu d’una Monografía de Asturias...
Funda y dirixe amás Aramburu la Revista de Asturias (1877–1883). Nesta mítica publicación diba asoleyar la so curtia obra poética n’asturiano, siempre col alcuñu de “Sico Xuan de Sucu”. Nel teatru Campoamor estrenóse’l drama en versu Si la ficiste en Pajares, pagarásla en Campomanes, basáu na muerte de Sancho’l Mayor.
Tienen los poemes d’Aramburu munchos y bien traíos elementos "narrativos" y una bayura de rexistros (siempre xirando alrodiu d’una delicada ironía) que lu faen ún de los más modernos poetes na nuestra llingua.