Escritor, periodista y estudiosu del folklor y la hestoria d’Asturies. Nació n’Uviéu en 1877. Inicióse nel periodismu en El Zurriago Social, publicación satírica y combativa que dirixía Maximiliano Arboleya. En 1900 intégrase na redacción del diariu conservador uvieín El Carbayón, nel que va facese popular colos alcuños de Ludemaro y Triquitraque. En El Carbayón va dar a estampa les sos dos primeres obres lliteraries: les noveles Psiquis y Memorias de un enfermo. Acabando l’añu de 1905 emigra a La Habana; ellí va incorporase al  Diario de la Marina, que dirixe un asturianu: el villaviciosín Nicolás Rivero. Ellí coincide col poeta gallegu Curros Enríquez, al que va relevar tres la so muerte na sección qu’ésti caltenía nel diariu habaneru sobre la vida política española. Un tiempu depués, hacia 1910 vuelve a España, como corresponsal del so periódicu en Madrid. Na capital entra en contactu con Ramón Menéndez Pidal y empieza a trabayar n’estudios historiográficos nel Archivu Hestóricu, na Biblioteca Nacional, na Real Academia de la Hestoria y nos archivos de Simancas, l’Escorial y la catedral d’Uviéu.

   Nesos años va publicar les sos principales obres historiográfiques: Covadonga: ensayo histórico-crítico, Cuentos, leyendas y tradiciones, La familia, la vivienda y oficios primitivos. Nel añu 1925 desígnenlu director del diariu católicu Región d’Uviéu. En 1928, tres una curtia estancia en Palencia, vuelve a Uviéu y nómenlu Cronista Oficial d’Asturies y Director de la Biblioteca Provincial. Dende entós y hasta la so muerte en 1967, Constantino Cabal va desarrollar una vasta obra periodística, historiográfica y lliteraria. Collabora na fundación del Institutu d’Estudios Asturianos (I.D.E.A) del que va ser miembru de númberu hasta’l so fallecimientu. Ente les sos obres sobre temes asturianos resalten: Cuentos tradicionales asturianos (1921), la triloxía sobre mitoloxía asturiana: Los dioses de la vida (1925), Los dioses de la muerte  (1925), El sacerdocio del diablo (1928), Alfonso II el casto (1943), Contribución al Diccionario folklórico de Asturias (cinco tomos. 1951–1958) La Asturias que venció a Roma (1953).

   Como autor en llingua asturiana publicó en 1944 el llibru: L’alborá de los malvises, sotituláu por Cabal como “los madrigales del bable”. Dividíu en siete partes, acompañáse d’un prólogu y d’un epílogu en prosa y en castellano del propiu autor, nos que traza les llinies básiques de la so poética en llingua asturiana. Nelles Cabal xustifica’l so llabor estéticu como un cantar íntimu y sentimental al país de nacencia: “Tierra de fibra y regazo, esta es la oración más honda que encontré para ti en mi intimidad”, escribe al empiezu del prólogu. L’epílogu ye un a modu d’esordiu (“arenga final” lu llama Carmen Díaz Castañón) a los poetes asturianos del so tiempu pa que sigan el so camín y revitalicen l’idioma asturianu. Esti llamáu va tener ecu en bona parte de los autores de la dómina anterior al Surdimientu, como lo reconoz Antón García (1994): “La publicación en 1944 de L’alborá de los malvises impulsó la creación poética na inmediata postguerra. Pero tamién la so muerte sirvió pa que se renovara l’interés por crear n’asturiano”.

      Los poemes del llibru de Cabal, ensin romper coles formes y temes tradicionales de la poesía n’asturiano, intenten entamar composiciones de calter cultu, siguiendo la estela dexada por poetes anteriores a la Guerra Civil como’l Padre Galo y Pepín de Pría. El paisaxe, l’amor, el sentimientu pola tierra, el llamentu pola perda de la identidá campesina d’Asturies, Cuadonga... son los temes principales del llibru. Cabal combina nél estructures poemátiques d’orixe popular con otres cultes: endecasílabos, silves, cuartetes.

   L’alborá de los malvises, reeditáu en 1959 con una nueva sección de poemes: Les roses de la quintana, ye, ensin dulda, el llibru n’asturiano más importante de la postguerra. En 1998 volvió a reeditase, con prólogu de Xuan Bello. Nel añu 1999 la Conseyería de Cultura dedicó-y a Constantino Cabal l’homenaxe del Día de les Lletres Asturianes.