************************************************************* Marcos del Torniello D. José Benigno García: "La muyer avilesina" FONTE: "Los nuevos bablistas" (1925) (Enrique García Rendueles) Respétase la grafía orixinal. *********************************************************************** LA MUYER AVILESINA A la hermosa y dinguida señorita Josefina de Maqua y Carrizo (T.C.) Si valiés el cantar < La Soberana >, Qu' el sabela cantar ye muchu cuentu, Cantárala daquián de bona gana, Non pa char un cantar, pa char un cientu, A la neña xentil y más galana, Que tién nun paraísu el aposentu; Más por bien que asoplás en el reclamu Non pasaba del puntu del entamu. Al cantar á la prenda que namora, De guapa cariquina, tan risueña, La que tién la vertuz encantadora Que se puede axuntar en una neña, La que todes les gracies atesora, Porque ye de Avilés la que se sueña... Non abasta cantái de los payares, Hay que chái < El cantar de los cantares >. Quiciáes non faltás quian i-lo chara Si dalgún co la gaita i-diés el pasu, Si jesús de Galiana lo ayudara Pa cantar el cantar que vien al casu, O si el ñeru á les muses asestara, Que lo cuelguen de un pinu del Parnasu; Pero ¡ va cantar más ! ¡ Ha ser más pocu !... ¡ Fós precisu tener ramos de Ilocu !... Non val el ser curiosu na pintura, Nin saber ximelgar el encensariu, Nin rezar en llatín col siñor cura, Nin el ser abogau, nin boticariu. Pa cantar á tan guapa creatura, Ye mester daprender el calandariu De les neñes galanes d' esti suelu, Que asemeyen los ánxeles del cielu. Quiciávis la calandra y el xilgueru, El mirlu, y el raitán, y l' andarina, Dar en clavu llograsen lo certeru Pa cantar la guapez avilesina: ¡ Ay la cai pelegrina del Riveru ! ¡ Ay la cai de Galiana pelegrina ! ¡ Ay qué guapes que son y gayasperes, Les neñes de Avilés paraxismeres ! La cosa, en sin embargu, tá que arde: Tien algún peligrín ganes de dala, Y non sab' entamar, y faise tarde, Y arrevienta de afechu si non fala. Quier decíi á la neña, que Dios guarde, Que-i pruí chái un plizcu y abrazala, Anque i-pongan focicu y cara séria; Pa seguir col sermón de xustiferia. Non acierta denguno na quintana Lo que ye la galana fermosura, Nin la xente de suyo cortesana, Ni el que tá nel tapín fura que fura, Nin el sabiu qu' el sesu se devana Por comer á la cencia la figura; Pero, mialma, s' espeta pe los güeyos P' alegrar á los mozos y los vieyos. Non s' espeta nos güeyos solamente, Que s' esmuz además e-nos sentíus Por los otros tamién, y muy corriente: Entren pe les oreyes los soníus, Pe la boca el sabor fríu ó caliente, El tentu pe les manes y todíus, Y la olor de les roses y perdices Entra pol ventanín de les ñarices. Lo que ye fermosura non se sabe Nin se puede pintar de cuerpu enteru; Tá nel cielu guardada tras de llave, Pero déxai salir el carceleru; Ella entós seliquín y muncho suave, Con premisu de Dios, fuxe del ñeru, Y enllena del espaciu les anchures Sin que dexe resquiebra per deyures. Hay tanta fermosura per u-quiera, Que non puede ser más, si se repara: Tá nel monte, nel campu, na xunquera, Na vera del camín, na fonte clara, Nel xelu que les perles apiñera, Na Iluna que nos mira car´ á cara; Nes borbuyes del agua, cuando llueve, Y nel sábanu blancu de la ñeve. Está la fermosura entre les mores Que ofrecen los escayos nos bardiales, Tá nel píu de los páxaros cantores, Nes fueyes del maíz y las figales, Tá na herba del prau; está nes flores Que visten el tarrén de riques gales, Y plasma la que tién la mar salada, Lo mesmu en oru en fiel qu' enfurruñada. Floréz la fermosura en ausolutu Nel Ser todo poder y soberanu; Tá rialment' en sostancia, en atributu, Na simienta, nel táramu, nel granu, Nel árbol que da sombra, que da frutu, En todo cuanto Dios fincó la manu; Y relluz idegal la que se sueña Na carina fermosa de una neña Al decir una neña, quier decise De todes les demás que Dios les cría, Les que tienen boquina pa reíse, Güeyinos pa facer la puntería, Gracia pa corteyar y divertise, Paraxismu, saleru, melguería... Cuanto ye p' acabamos co la calma, Faciéndonos rebelgos en el alma. Ye de crer que al facer el Firmamentu, Los lluceros, el sol y los planetes, Cuanto dicen que roda, y ye portentu Que debe de valir muches pesetes, Non quedás el Eternu bien contentu, Pareciéndoi les obres encompletes, Y que chás los besinos á embozades Da ú sortiesen les neñes resalades. Non se puede pensar de una manera Clariquina de afechu, con respeutu Del que estrumie dacuando la mollera, Lo que fós esti mundo, nel concetu De que guapes rapaces non hubiera. Taba el mundu perdíu con tal defeutu, Y hasta el home más sosu, más esquivu, Quiciávis se afogás, por non tar vivo. Surtienon por fortuna les muyeres, Con el fin de remediar amargues cuites, De todos los colores y maneres: Amariélles, y blanques, y negrites, Achocolotadines y aceiteres. Los blanques por enteru, munchu güites, Dáu el casu que salgan españoles, Son guapes de la cara como soles. Si todo tién su más y tién sus menos, Si medren co les nueces les ablanes, Xuntu al verde limón los baranxenos, Les peres, verbu en gracia, y les manzanes; Si nacen entre chichos cartrocenos, La neña de Avilés danza entre xanes... Y por eso á esta neña, flor d' España, Hay qu' estrai el camín con espadaña. Ye la neña más cuca, la más neta, La más trabayadora, en sin un vicio, De bona condición, ye muy completa; Fói el cielú con ella tan propiciu, Que algama per u-quiera la palmeta De ser una muyer de munchu xuiciu, Porque ye cieliquín que non tién nubes Al que facen la venia los querubes. Ye, xugando á la cuerda, saltasucos, La guap' avilesina pe les cayes; Y pierden el falar los rapazucos Mirándoi pal regüelu de les sayes; Cuando moza la ven no tán fartucos D' esfacense los sesos en migayes, Los mozos que la miren tentadora, Melguerina, xentil, carteyadora,…. Y cásase dimpués. Ye gloria vela: El home ye l' espeyu en que se mira, Manda frescos los neños pa la escuela, Y xime si tán malos, y sospira. Non ye amiga de dar la parpayuela, Nin goza en marmular, nin diz mentira; Mas con todo y con eso non escapa, La primer condición ¡ que ye muy guapa ! Non ye cosa de agora; ya ye vieyu: Des qu' el mundu ye mundu fói asina; La neña de Avilés y del conceyu, Tevu siempre la nota de guapina, Por ser quian la liberta del mal güeyu La Virgen de la Lluz, la so madrina, Y Jesús de Galiana quian l' ampara Pa que sea tan guapina de la cara. ………………………………………… ………………………………………… ………………………………………… Más quiciávis el mirlu y el xilgueru, El raitán, el malvís y l' andarina, Dar en clavu consigan por enteru, Cantándoi á la neñ' avilesina: < ¡ Ay la caí pelegrina del Riveru ! ¡ Ay la caí de Galiana pelegrina ! ¡ Ay qué guapes que son y gayasperes, Les neñes de Avilés paraxismeres ! > Poesía premiada en los Juegos Florales celebrados en Avilés en 1904.