*********************************************************************+*
D. Antonio Balvidares Argüelles:

"LAS EXEQUIAS DE CARLOS III EN OVIEDO"

FONTE:


"POESÍAS SELECTAS EN DIALECTO ASTURIANO
(recopilación de Xosé Caveda reeditada y aumentada por Fermín Canella
en 1887)

Respétase la grafía orixinal.
***********************************************************************





En concencia, amigu Xuan ,
Que aturdidu estó dafecho: 
Co lo que acabo de ver
Cien cruces vengo faciendo . 
Tuve q' ir á la ciodá
A buscar unos enredos,
Y topé cabu el Postigu
A mió compadre el ferreru ,
Que m' agarró pe la mano, 
Y dixome : - Amigu Pedru , 
Verás lo que 'nunca vieste 
Magar que vienes á Uviedu: 
Vé cá pa la Catredal 
Donde señores sin cuentu 
Entre músiques y lluces 
Entre ruido y embelecos, 
Y arrullos y ceremonies , 
Entamen fer un intierru 
Y rogar á Dios pol home 
Que yera padre del pueblu " .
- " Que me pláz " , i arrespondi ,
Y xuntos hacia llá fuemos .
El portal de la iglesiona ,
Fechu estaba un formigueru
Tantu de la xente había
Como hai por San Mateu . 
Y dengun alma viviente 
Podía colose dientro, 
Anque entrás pe les puertones
Más grandes que los dos güeyos 
Mayores de los Pilares , 
O del puente d' Olloniegu. 
Mas, á pures costazades , 
Allá m' enfilé derecho 
Dempués de cien emburriones 
Fasta el mismo rexamientu 
Per onde suben y baxen 
Los que canten l´evanxeliu . 
Estaben diciendo misa 
Dos al lladu y unu en mediu , 
Y otros munchos alredor 
Que facín mil aspavientos , 
Vestidos de ñegres mantes 
Y camisones de llenzo 
Con flores d' oro y de plata 
Y guerindoles y flecos . 
Unu asperxaba la xente . 
Otro xingaba el fumeru 
Q' arrecendía de cien llegües 
Más que la flor del romeru 
Y d' aquí p' allí alloriados 
Todos fiendo acatamientos 
De continu arrodiados , 
Y de continu derechos , 
Ya cercaben el altar, 
Ya en una filera puestos , 
Un poqueñín s' aquietaben 
Pa fer nuevos espavientos . 
Un pedazo más abaxu 
Estaben puestos en cercu 
El Rexente y Oidores, 
La Xusticia y Reximientu 
Enfariñades les testes, 
Vestidos de pañu negro, 
Y asentados en tayuelos 
Cubiertos de terciopelu . 
Al ver aquestos señores 
Tan espurridos y enteros,
Entruguei á un estudiante 
Si allí fiin ayuntamiento . 
Arrespondióme : - " Babayu , 
¿ Non ves que estás é nel templo , 
Donde s' axunten pa fer 
De Carlos III el duc´u ?
 Mira p' al medio y repara
 Isi erguido monimientu ,
 Y elli te dirá el motivo
 De todu aquesti cortexu "
 Entoncenes torné en mi,
 Caí en cuentes, abrí el güeyu ,
 Y vi entre rexes y lluces
 Un armatoste derechu
 Mayor tres veces q' un orru
 De piedres raxades fechu ,
 Adornadu con fegures
 De calaveres y güesos ;
 Anchu por baxo y d' arribu
 Conforme crez más estrechu ,
 Polidu, Igualín, gallardo
 A manera d' un peñedu ,
 Que redondín y curioso
 Tien la figura de un queso ,
 Y se llevanta enfotadu
 Entre ortigues y felechu .
 Sobr' una inesona grande
 Arrodiada de lletreros ,
 E nes esquines punxeren
 Cuatro pegollos derechos:
 Y entre ellos había un altar ,
 Sobre el altar un traviesu ,
 Donde diz que del difunto
 Estaba gardadu el cuerpo
 Debaxo de ricos paños
 Y encima corona y cetru.
 Poxeren allí muy graves
 Unos enllutados ñeños,
 Con túniques y alpargates
Y ensortiados cabellos ,
Y e nes manes cada unu
 Non sé cuantos embelecos, 
De los pies á la cabeza 
Enfariñados dafechu , 
Como si foren arrede 
De cal ó de yelsu fechos. 
Para ser los cuatro Santos 
Q' escribieren l' Evanxeliu , 
Nin traza tenín , nin xera , 
Nin la pluma y el tinteru . 
Como el reportoriu reza , 
Para ser los cuatro tiempos
No 'staba rempresentadu , 
Faltaba entr' ellos l' invierno ; 
Y si les partes del mundu
Foren, había ver el ñegru . 
Entrugué al estudiantón 
Qué diablos yeren aquellos 
Dixo: - " Son les cuatro coses 
que la doctrina decemos ; 
Virtudes q' el Rey tenia 
Y que tantu lu pulieron. 
Que por elles foi llamadu , 
Más que Rey, padre del pueblu".
Pensaba yo n´estes coses 
Y de todes cargu fechu , 
Arreparé más abaxu 
Entre munchos paramientos , 
Una corrada con rexes 
O , si te plaz , un bon güertu . 
Cerradu de sobre si, 
Con escaleres y asientos , 
Y muérganos y tribunes 
Y un armadixu nel medio
Puestu sobre un palitroque 
A modu d' escudilleru, 
Pero muy polidu, guapu 
Y com' un macón lo menos . 
Con llibros de lletres gordes 
De más bultu q' un panderu . 
Al redor apigurados 
Puestos en ellí los güeyos. 
Estaben unos hombrones 
Vestidos de sayos ñegros, 
Dando co la boca abierta 
Berridu que canta el credo, 
Y apuxando de tal modu 
Que parecin turulleros. 
Vi entrellos unos neñinos 
Cada cual con so vaqueru , 
Con gorretinos cuadrados 
Y camisines de llienzo, 
Q' en mió concencia cantaben 
Como si foren cuquiellos, 
Todo al son de munchos chillos,
Zanfoníes y corñetos. 
Plasmarís si los oyeres 
Como yo plasmé d´afechu 
Porque , dígote en verdá 
Que toquidos como aquellos .
Nunca salieren de gaita
Nin los conoz dengún ciegu . 
Sofitados é na barba 
Unos bandurrios pequeños,
Al solmenayos les cuerdes
Con arquinos de civiellu ,
Chillaben que yera cosa
De perder un home el sesu .
Dos grifollinos gallegos
Acompangaben con ellos,
Y pe lo baxu roncaben
A modu de turulleros,
Unes trompetes llargones
Tan gordes como llaviegos .
Cuando oí tantes sonaxes,
Acordéme d' aquel cuentu
Que mió güela me cuntaba
Asentada cab' el fuegu ,
D' un Rey, allá, de muy lloñe,
Que yera vanu y soberviu ,
Y mandó q' en un gran campu
Pónxeren un estafermu ,
Y al son de les zanfoníes,
Panderetes y panderos,
Y otros munches andromancies
Y fixeren rendimientu .
 Pensé que ñunca acabás
Tanto amén y tanto oremus ;
Pero féxoyos callar
Un señor gordetu y seriu:
Cura de la Catredal ,
( Debía ser á lo q' entiendo ),
Vestidu de balandrán
Con esclavina al pescuezu .
Per unes escalerines
Encaxóse nun caxello,
Donde estuvo acurrucadu
Esgargaxando y tusiendo ;
Allevantóse finxadu,
Ponxo les manes en pecho ,
Miró para todos llados ,
Faló pasiquín primero,
Y llevantando la voz
Dixo en tonu llastimeru:
" Morrió el Rey nuestru señor
" Ya non ye Carlos tercero ,
" El amigu de los probes,
" El que alabó el mundo enteru:
'"El que nunca aforfugó
"Con alcabales y cientos, 
"Nin con gabeles y sises 
" A los sos queridos pueblos; 
" Echó navíos al mar;
" fexo llugares enteros , 
" Cuidó de que hubíes cebera . 
'Y bonos ayuntamientos, 
" Y escueles y sociedades,
Y mercados y comerciu " . 
Otres munchcs coses dixo 
Que ya se me escaecieron , 
Y otres más que no entendí
Ni era fácil entendello ; 
Q' anque afalé la memoria 
Por ver si podía cogello , 
Más ellï afaló la llengua. 
En so llargu falamientu . 
Cansóse por fin y postre 
Y esmucióse para dientro ( " ) 
Y tornaren los cantores 
De ñuevo á decir oremos.
A estes hores les miós tripes 
Ya roncaben col botiello,
Que magar salí de casa 
Ñon pasára un sacramento . 
Entame á salir d' allí, 
Mas non topaba sendero . 
Otru tantu i sucedió 
A un probetón d' un vaqueru , 
Que se allugó xunto á min, 
Y arremellados los güeyos. 
Apenzó á dase nes palmes, 
Y á facer mil espavientos 
Y á llamáse desgraciau , 
Porque i furtáren un queso . 
Olvidando el so zurrón , 
Pagado d' estos enriedós .
-'' 'Ten pacencia , i dixe yo ,
Que siempre á ríu revueltu 
Apañen los pescadores; 
Aqueso no tien remediu 
Mira otra vez lo que faces , 
Que Uviedo non ye el Infiestu " . 
A los berridos que daba. 
Debóse venir corriendo
Con una pértiga llarga 
Un hombrón muy goberneru . 
Que i mandó callar la boca 
Y salir fuera del templo . 
Quiso Dios que los d' afuera 
Afloxáren los d' adientro , 
Y todos engaviellados 
Unos tras d' otros nos fuemos .
Cuando me ví en campu rasu 
Folguéme munchu por ciertu, 
Que ya estaba entristecidu 
Con tantos esparamientos. 
Arrasqué les faltriqueres ; 
Topé  diez cuartos y mediu , 
Métíme en una tabierna 
Y lluego dí cabu d' ellos, 
Que par' eso so abonadu . 
Anque no me está el dicello . 
Ágora voime pa casa 
Que la mió Anuxa, yo apuesto 
Q' está ya prevaricada 
Con tantu detenimientu . 
Adios, Xuan, fasta el domingo, 
Si quiciaves volvio á Uviedo.