***+++++++++++++++++++++++++++++++++++++++++++++++++++++++++++++++++++++++++++++++++++++
Antonio Balvidares:

" L'ENTIERRU DEL CALLÓNDRIGU REGUERO "

FONTE: 

" POESÍAS SELECTAS EN DIALECTO ASTURIANO "
(recopilación de Xosé Caveda reeditada y aumentada por Fermín Canella
en 1887)

Respétase la grafía orixinal, asina como los títulos y comentarios en castellanu.

****************************************************************************************

EL ENTIERRO DEL CANÓNIGO REGUERO.

ROMANCE.

 Quiai compadre , bien venidu :
Asientate n' esa xiella , 
Si quíes que te cunte coses 
Qu' han de gustate en concencia . 
Sabrás como fui á Uviedo ,
Y oxalá q' allá non fuera 
Po traer como yo trixi
Revuelta la callavera . 
Q' al facer la comparancia 
De la ciudá á aquesta aldea ,
De lo probe á lo señor ,
De lo simple á la gatesca ,
De lo culto á lo palurdo ,
De lo invisu á la llaneza ,
Desátense les coricies 
Y arrevienta l' aguyeta .
El llunes pasadu entré
Pe la calle de la Vega 
Nada triste , pos llenóme 
La calabaza la Pega ,
Y ansí tévi bon colchon 
Y non fo menester cena .
Utru día de mañana ,
(Aqui comienza la fiesta)
Tantes campanes tocaben
Q 'aturdíu co la gresca ,
Dixi que si habría pandorga 
O qué función yera aquella 
Que tantu repicotiaben , 
Y naide me dio rempuesta . 
Salime medio aturdíu 
Y enderécenme á la ilesia
Del Señor San Salvador :
Y al llevantar la cabeza
Ponxi güeyos é na torre ,
Que aqui te fago una puesta
Que puestu na cuguruta
Metános é na cruceta , 
A San Pedru se devisa 
Al cerroxu y á la puerta
Del cielu ; tal ye l' altura
D' aquesa erguida llumbrera . 
Mas cuando yo aqui parau 
Estaba com' un bavieca
Bobu con tal ñovedá ,
Otra mayor se m' acerca . 
Al Callóndrigu Regueru
( Dios en so gloria lu tenga )
Que xamás comió boroña 
Nin mazada de mantega , 
Home de tanta fortuna
Que sin pelar la cabeza
Con l' estudiu , vieno á ser
Callórigu sin ver lletra ;
( A mió ver po los empeños , 
Que non ye la vez primera
Que en permediando les faldes
Dalgún Osía ó Condesa
Lleva la capellanía
El que merez una andeza ) ,
Viénoi el so San Martin 
Como ha venir á cualquiera ;
Pos la de la guadañona
Tan lluego lleva la Reina ,
Como acute al probetayu
Sin q' atope resistencia . 
¡ Que intierru , amigu , i fixeron !
¡ A so costa cuanta xera !
Ñunca tal cuidara ver ,
En xamás por esta tierra . 
Les campanes se frañín , 
Y lo primero q' empieza 
Son les cruces y pendones 
Que pasen d' una docena . 
Unos pintos y otros roxos
De llino, llana y de seda . 
Los callóndrigos venín
Cadún per la so filera
Vestidos de mantellina
Y la capa d' estameña ,
Gorrote de cuatro picos
Y encaxes á la francesa .
En medio venía el difuntu
Que lu tríin media docena
De capellanes morondos
En sin corona siquiera .
El cuerpu yo apostaré
No hay vaca en toda Ceceda
Que pese tantu como elli ,
Sin que ponderación sea .
En medio iben tres señores
Pulidos como una estrella ,
Cadún tocando bandurria
Y un (que á mió parecer era 
Lo que tocaba una flauta 
Que llamen acá gallega 
Poníase repanchigadu
Pa facer la xiblatera .
Mas , compadre , esto ye nada :
Lo que me causó flaqueza
Fueron unos que tocaben 
Yo non sé que turullera .
Cuando daben el sopliu
Metín una cigarrera 
E na boca , que bien sé 
Tenía de llargo una tercia ;
Y el toquidu que facín
Era de modu y manera ,
Como si berrara un güe .
¿ Visti tú tal desvergüenza ?
Otros train xiblatones
Tan gordos com' una pierna ,
Que daben unos bufíos
Como la nuestra ronquiella
De suerte y modu q' entiendo , 
Xamás se fai mayor fiesta ,
Que cuand' un d' estos señores
Dafechu espurrió la pierna .
¿ Pienses que naide se esñiza ?
¿ Pienses que dalgunu berra ,
Que hay allí aflexides cares ,
Empapiellos y  tristeza ?
Bona traza : solu ví
Xente fartuca y contenta .
Non digo mentira dala ;
Desque entraren é na ,
Non parecín más que llocos ;
Y era todo ruido y gresca .
Emponxeron al difuntu
Metánes sobre una mesa ,
Cubierta de terciopelu
D' oro y flecos la presea .
Callórigos , sacristanes 
Y toda la garigüella , 
Metiérense en una sala 
Q' estaba al par de la tierra . 
Los callórigos sentados
Cada cual é na so siella ;
Los que cantaben de pie
Todos con so papeleta . 
Unu d' ellos q' á mio ver 
Flaquiaba de la cabeza ,
Non facía más q' aventar 
Co la so mano derecha 
Para arriba y para abaxu , 
Como quien cria materia .
Cantaron el parce mihi
Tocando y fiendo tal fiesta ,
Q' en vez de causar dolor
Allegraba los d' afuera .
Dixi yo para comigo 
"Señor , ¿ que tierra ye aquesta ?
Estos que muerren aquí
Deben tener la vereda 
Segura , porque si non
Non fora d' esta manera . 
El cura del mió llugar , 
( Anque tampocu i da pena
La muerte del feligrés . 
Si el primer entierro dexa) ,
Canta parce mihi y requiem
Con tal modu y con tal llercia ;
Q' el que lu escucha ha dicer 
Que revienta de tristeza .
 A la postre y por remate 
Y al desfacer de la fiesta , 
Saliéronse los callórigos 
Unu á unu pe la ilesia ;
Pero , compadre , al salir
Lo que se yos enrodiella 
En forma de rabu, é cosa
De pasar de vara y media ,
Colgándoyos del ropón 
En sin que nada sirviera . 
" Lo que arrastra ye lo q' honra , 
Diz el refrán de la vieya .
Para remate de todo 
Trixeron la encensadera 
Co les cadenes dorades 
Y de plata la escudiella .
Y tamién la cuyarina,
Calderu y asperxadera .
Que tod' ello en mió verdá ,
Sin que ponderación sea ,
Val más que la mayor dote
D' una moza de esta tierra .
En fin , fumigaron el cuerpu ,
Y aquí fixi yo una idea
De lo que yera isti mundu .
¿ Visti cuando s' afoguera 
Dalgún forniello rustiu ,
Como el fuebu lu amburienta
Faciendo gromos el fumu ,
Que figures representa ,
Cabeces , cuerpos, ciodades ,
Xigantes, torres y güestias ,
Todo fechura del aire ,
Mas en puntu q' aspavienta 
Un pocu , se vuelve ñada
Aquesta vana apariencia ?
Pos ansí te pinto yo 
Isti arrullu , esta grandeza . 
Q' el difunto esté andamiadu , 
Que me lu vistian de seda, 
Que los callóndrigos traiguen
Arrastrando cola y media, 
Que los cantores entonen 
Nin que los de la corñeta
Apuxen por fer toquidos, 
En fumu todo se queda .
Y si esto bien se mirara ,
Compadre, qué diferencia 
Hay del señor q' anda en coche
AL mozu de la rabera 
Si ámbos á ñada se vuelven
E na última llitera ?
  Acabóse la función ,
Salí como pudi afuera , 
Y gracies por que salí
Que ño acertaba á la puerta .