*************************************************************

D. Enrique García Rendueles


"El güen pastor" A vinita.


FONTE:

"Los nuevos bablistas" (1925)
(Enrique García Rendueles)


Respétase la grafía orixinal.

***********************************************************************

EL GÜEN PASTOR

A VINITA


Allégrate, Sión, porque ya vieno 
To Salvador á vete, 
To pá y to pastorín ena mayada 
El ñeru quier facese.
¿ Veslu llegar blincando pela ería, 
Más lluciu que trigal que Mayo medre, 
Pezpuntiando 'l punteru gasayosu, 
Y asentar enel llar so escañu, viesti ? 
So cara ye de roses, 
Les manes son claveles.
Allégrate, Sión, porque ya vieno: 
Pódies espabilar y facer fiestes.
¡ Bon Pastorín ! ¿ qué quiés ista reciella ?
¿ Ónde la vas llendar ? Do-ú el prao tienes
Cuayau de la cebera, enonde mana 
La pómpara bullosa de la fuente 
Que non seca l´estiaxe 
Nin del sol viciayosu el rayu tiemple ? 
Ay ! quien non yanta de los trigales 
Ha tar flacu y enxencle, 
Quien no bebie na fonte de tos gracies 
¿ Ónde ha matar la sede ?
¡ Xesús, bon pastorín ! si arremiellando
Los güeyos la gafura miedu mete
Allastímate tú de los probinos;
Si, arregañando 'l diente,
Quier el llobu en tos llindes fer so agostu
Apúrrei col civiellu, dai nes piernes.
¿ Oveya separtada de to vera
Onde puée atopar meyor presebre ?
Pastorín, non la dexes descarriáse
Ent' escayos y sebies;
Xúblai, Siñor, pos á los tos xiblíos
¿ Quién non golvi á los brazos que-i ufrecies ?