Inda nel sieglu VI de la nuesa Era, Martín Dumiense na "Correctione Rusticorum" con dergaba los vezos de los ástures de poner veles nes fontes, árboles y cruces de caminos, asina como 1'adorar a les piedres, toos ellos llugares onde se manifestaben les divinidaes. Sigún foi cuayando'1 cristianismu, les vieyes deidaes foron arrequexaes como mitos y supersticiones, anque caltendránse asina con puxu fasta bien entráu'1 sieglu XX.

Llargu y abegosu foi'1 procesu cristianizador d'Asturies. Mentanto les clases señoriales y cultes, abrazaben con entusiasmu la fe oficial, el pueblu caltenía un sincretismu relixosu que s'espeyaba en toles manifestaciones del so mundu espiritual, pues mesmo qu'aconteció cola romanización, la Ilesia foi adaptando'1 procesu cristianizador a les condiciones de cada sociedá. Asina tenemos como los vieyos llugares sagraos son convertíos en sitios de culto pola nueva relixón: montes, fontes, cueves, cruces de caminios, dólmenes y fasta castros acueyen ermites, capiyes, cruces o cruceros, símbolos visibles del reináu de Cristo na tierra. Esta persistencia de les antigües creyencies vese nos escritos del Obispu Aponte de Quiñones que nel sieglu XIV afirmaba que la fe cristiana "se mantenía de milagro en Asturias rodeada de la común ignorancia". O como nel sieglu de les lluces, el XVIII, 1'Obispu González Pisador ellaboraba unes "Constituciones Synodales del Obispado de Oviedo", cola fin d'esaniciar la lliberalidá de les costumes sexuales de los asturianos de la dómina y los resclavios del paganismu panteista qu'entá alendaba ente la xente del País. Esti sistema míticu asturianu ta emparentáu colos sos homólogos de la Europa Atlántica na que, como afirma Ramón Baragaño "predomina la raigambre céltica". Y dientro d'esti sistema, ye necesariu faer una referencia a los seres míticos asturianos, quiciabis el so elementu más popular. Son seres qu'habiten enxunto a los asturianos tola xeografía máxica del País: seres relacionaos con fontes y cueves (la xaná, el cuélebre), cola mar (el pataricu, la serena,1'home marín), col bosque (el busgosu o mofosu), cola montaña (Xuan de la Borrina), coles nubes y la tuena (el nuberu), col llar y l'actividá humana (el trasgu, el suminicu). cola muerte (el güercu), la güestia, la guaxa, el carru la muerte), ensin función determinada (el diañu burllón, el pesadiellu, l'home llobu). Son seres, xunta animales con virtúes humanes y, dacuando máxiques, que poblen la bayurosa lliteratura popular asturiana, tresmitida pente los sieglos nos llabios de los homes y muyeres d'esta borrinosa tierra.