Mazcaraes d'iviernu

3 Setiembre, 2016
Redacción

Cola llegada del iviernu ye tradicional n’Asturies, al igual que n’otros munchos territorios de la Península Ibérica y d’Europa, la salida de les mazcaraes o aguilandos. Había munches, en prauticamente tolos pueblos, y consistíen básicamente na salida de grupos de mozos amazcaritaos que percorríen el llugar pidiendo l’aguilando per toles cases.

Los vecinos recibíenloscon comida, dulces y oruxu, yá que teníen la creencia de que si nun paraba la mazcarada na so casa tendríen mala suerte mientres tol añu. Les feches nes que salíen solíen ser señalaes, como Nuechebona, Navidá, Añu Nuevu y Reis, anque hai mazcaraes que se celebren mientres el periodu posterior hasta l’Antroxu, que nun dexa de ser una gran mazcarada.

Sidros en Valdesoto

¿Sabíes qué…? La mayor parte de les mazcaraes perdiéronse col pasu de los años, pero Asturies cuenta con delles entovía actives recuperaes polos propios vecinos.

Los personaxes de la mazcarada representen la lluz –nomaos tamién los guapos– y la escuridá. Éstos suelen ser fixos y simbolicen fuercies de la naturaleza; asina, atopamos, tanto n’Asturies como n’otros llugares, a una vieya (l’iviernu) y a un osu (señor de les viesques) o un diablu, ente otros.

Les mazcaraes anguaño actives son Los Sidros y La Comedia, de Valdesoto; El Guirria de Ponga, en San Xuan de Beleño; Os Reises del Valledor (Ayande); Os Reises de Tormaleo (Ibias); Os Aguilandeiros de Xedré (Cangas del Narcea); Los Aguilanderos de La Puela Ayande; Los Guilandeiros de Tinéu; y Los Aguilandeiros de San Xuan de Villapañada (Grau).

¿Sabíes qué…?La última mazcarada en recuperase foi la de Los Aguilandeiros de San Xuan de Villapañada, que nel 2014 tornó a salir a la cai tres 70 años de parón.

Esti fenómenu, como dicíamos enantes, nun ye propiu namái d’Asturies, sinón que tien muncha fuercia nel este de la Península Ibérica. Asina, Galicia, Lleón, Zamora, Salamanca, Portugal y Extremadura cuenten con numberoses mazcaraes entovía actives y inclusive en Lisboa hai un certame añal qu’axunta en mayu a miles de persones pa presenciar un desfile nel que participen munches d’elles: el Festival Internacional Máscara Ibérica.

Nél yá tomaron parte munches asturianes y son fixos Los Sidros y La Comedia, la mazcarada más potente y conocida fuera de les nueses llendes, que nel 2017 va ser declarada Bien d’Interés Cultural. De xuru que conoces a los sidros pola so ‘melena’ fecha de pelleyu d’oveya en forma de conu, remataes na parte d’arriba por un rau de raposu; la so careta collorada; y polos saltos y blincos que dan anunciando La Comedia.