Trabayu de Campu

Subscribe to Trabayu de Campu feed
Lliteratura p'adultos, infantil y xuvenil en asturiano. Biografía, bibliografia y premios de Vicente Garcia Oliva.
Updated: fae 2 díes 8 hores

La Selmana Negra: un sacu ensin fondu

27 Marzu, 2017

Talamente paez que perdieron l “oremus”. Lleo con asombru l’enorme pufu que tien la famosa Selmana Negra con Facienda y con otros acreedores y paezme imposible sentir lo que toi sintiendo. Estos señores que, pese a ser una entidá privada, lleven tropecientos años cobrando subvenciones de les arques públiques: Ayuntamientu, Principáu… pretenden iguar los sos problemes económicos a costa nuestra. Asina, tienen la ocurrencia, por nun dicir desvergüenza, de pidir al ayuntamientu de Xixón que cuasi dupliquen les perres que-yos vienen dando. Ye dicir que nun-yos paecen abondo los 100.000 euros que cobren añalmente de subvención municipal, sinón qu’agora quieren cobrar 180.000 pa asina, dicen, solucionar los sos problemes. ¿Pero en qué País creen que viven estos señores? ¿Paez-yos normal sufragar con perres públiques les sos aventures económiques? ¿La so malísima alministración?

Asina, dalgo que comenzó siendo un xuguete pa los dirixentes socialistes d’otra dómina (Tini Areces, Mapi Felgueroso…) que sacaben semeyes y tomaben copes col inventor del chiringo, aprovechando pa criticar y reíse de “la derechona” de la ciudá que nunca nun diba a gobernar equí, acaba camudándose nun sacu ensin fondu qu’amenacia con llevase una parte abondosa del presupuestu xixonés, que tendría de correr agora colos pufos qu’estos señores van dexando nun llau y n’otru.

Dende va tiempu voi criticando esta feria de la cutrería, del churru aceitosu, de los desperdicios enllenando los suelos, del alloriu d’unes músiques al altor de la llocura, y de les pelees de madrugada (dalgún miembru de seguridá del  recintu dixo qu’aquello yera una ciudá ensin llei, como nel Far West) que, cola sida d’un llabor cultural y unes cuantes presentaciones, que podíen facese perfeutamente n’otru contestu, añu tres añu funde nuna sola selmana lo qu’otres entidaes culturales nun ven nin en diez años. Yo creo que yá tuvo bien. Nun sé si esa Selmana Negra tuvo sentíu dalgún día, pero la ciudá de Xixón nun pue permitise’l lluxu de siguir calteniendo un esperpentu ruinosu que, cola disculpa de ser d’izquierdes, de xéneru, de númberu o internacionalista, perdió ya l”‘oremus” va munchu tiempu. A min que me borren.

(Semeya El Comercio)

Categoríes: Canal Blogues, Recomendaos

La Olivina del día

27 Marzu, 2017

En Cataluña habría que facer un Referendum pa ver si quieren facer un Referendum.

Categoríes: Canal Blogues, Recomendaos

“Divertia” nun nos divierte

24 Marzu, 2017

Nun soi a atalantar mui bien pa qué sirve eso de “Divertia”. Sí, yá sé que se trata d’una empresa municipal que s’encarga de cultura, festexos, turismu y otres mandangues al rodiu d’ello, lo que quiero dicir ye que nun-y veo un sentíu a la cosa. Nuna ciudá como Xixón, que nun ye Nueva York, tenemos yá una conceyalía de “Educación y Cultura”, al mandu de doña Montserrat López Moro y “sus boys”, y tenemos otra conceyalía de “Turismo, Deportes, Festejos y Juventud”, a cargu de don Jesús Martínez Salvador y los suyos. Amás d’ello, funciona tamién una “Fundación Municipal de Cultura, Educación y UP”, colos sos propios cargos y participación de toles fuerces municipales, y un “Patronato Deportivo Municipal” tamién col so organigrama propiu. Y un, o seya yo, que ta un poco fartu de les perres que se gasten provinientes de los nuesos bolsos, diz inxenuamente: “¿Oiga, nun ye de sobra con too esto pa xestionar les cuatro coses que se faen na nuestra ciudá?”. “¿Qué sentíu tien crear esi otru “mamotretu” pa duplicar les mesmes funciones yá axudicaes a otros organismos? Nengunu. En llugar de simplificar burocracia, eliminando duplicidaes, lo que se fai  ye lo contrario, siguir creando entes que nun son necesarios pa gastar perres y xestionar peor.

Agora’l “mamotretu” echa les cuentes y enterámonos de que l’Ayuntamientu ( o seya nosotros) tuvo d’apochinar en  primer instancia 7 millones d’euros, en segunda  una estraordinaria de 278.000, y en tercera otra más estraordinaria de 1.054.000. El Déficit del añu anterior, 2015 fue, según LNE, de 8,8 millones. Dizse qu’hubo aforru. Yo non lu veo la verdá. Y dizse tamién -dizlo Foro- que pese a esi supuestu aforru ello “no supuso  ninguna merma en la actividad llevada a cabo”. Lo cual nun ye n’absoluto verdá porque tovía ta caliente’l cadaver de la International Opera Studio a la que, por rebaxa-y les ayudes de de 50.000 a 15.000 euros, tuvieron que marchar de la ciudá, eso por poner un exemplu reciente.

Ocurre lo que suel ocurrir nestos casos: que’l dineru presupuestáu pa coses culturales queda, mayormente, pa financiar a los funcionarios que lo lleven. Yo pienso que d’un presupuestu de, por exemplu, mil euros, deberíen empobinase pa coses culturales 900 y los otros 100 pa la xente que los organiza, pero abúltame que la proporción ye la inversa: queden 100 pa la cultura y 900 pa los encargaos de facelo. Pamidea, esa Divertia va a acabar subcontratando, si non lo fai ya, con otres entidaes festivo-culturales pa que faigan les coses, y asina, de “mamotretu en mamotretu”, cada vuelta gástase más en facer menos coses. La famosa teoría de la pirámide invertida de Xuan Pintueles. Pues, sinceramente, a min eso de Divertia nun me divierte nada.

 

Categoríes: Canal Blogues, Recomendaos

La Olivina del día

20 Marzu, 2017

El que de verdá tenía que pagar Impuestu de Sucesiones ye Felipe VI.

 

Categoríes: Canal Blogues, Recomendaos

Ex libris

16 Marzu, 2017

Titulu: “Jartum”

Autor: Michael Asher

Torna: Carlos Ruiz Uribarri

Editorial: Inédita Editores

Añu: 2008

LA ÚLTIMA AVENTURA IMPERIAL.- Esti ye’l sotítulu qu’anuncia’l llibru y en verdá que ye asina. “Jartum” ye un ensayu que se llee como la más entretenida de les noveles y ye que l’autor, perfeutu conocedor del tema y que remana una gran cantidá de documentación, cumple con esa másima d’enseñar antroxando, divirtiendo.

Cuerre l’añu 1883 cuando el Teniente Xeneral William Hicks, al mandu d’unos 12.000 homes, la gran mayoría turco-exipcios, ye derrotáu en El-Obeid poles fuerces derviches, formaes por diversos pueblos y etnies al mandu del Madhi, una especie de nuevu profeta que llogró axuntales a toes pa espulsar a los estranxeros del Sudán. Asina principia la historia de “Jartum”, que va a espurrise a lo llargo de 15 años: los que van dende la derrota del famosu Xeneral Gordón, na capital que lleva esi nome, hasta la so recuperación nel 1898 cola derrota total de los sublevaos. El primer ensayu d’una república islámica fina asi, depués de miles de muertos por dambos bandos. Sudán nun será independiente hasta 1956.

El llibru de Asher recueye tolos aspeutos d’esi periodu con detalle y precisión: nomes, feches, personalidaes, batalles… pero, y esi ye un de los mayores aciertos del escritor inglés, en dambos llaos. Avezaos a escuchar namás la versión de los colonizadores, agradezse conocer tamién la de los colonizaos. Los que lluchen pola so lliberación. Asher trátalos a toos por igual anque, lloxicamente, la mayor parte la documentación escrita ye de los primeros. L’autor vivió munchos años en Sudán y el conocimientu sobre’l tarrén de los llugares de los socesos da-y un plus pa rellatar con detalle’l desarrollu de los combates. Estos son cuntaos con minuciosidá, dando datos de cada batallón, quién lu mandaba, que clas d’individuos lu componíen ya inclusive anéudotes de los corresponsales de los periódicos ingleses que taben nel campu batalla. Pero xunto a esto, tamién les intrigues polítiques y la influyencia del Gobiernu Inglés y de la propia Reina Victoria n’asuntos esteriores, mayoremente pa meter la pata.

Un ensayu, pues, perinteresante que se llee con facilidá anque quiciás l’autor pormenoriza demasiado dalgunos pasaxes ensin que ficiera falta. Con too, un llibru mui recomendable tanto pa los amantes de la Historia, como pa los de les aventures político-militares.

Categoríes: Canal Blogues, Recomendaos

La Olivina del día

14 Marzu, 2017

Nuevu impulsu al Mercáu Inmobiliariu: Paez que Pedro Sánchez ta construyendo castillos nel aire.

Categoríes: Canal Blogues, Recomendaos

L’Ayuntamientu de Xixón desafina

11 Marzu, 2017

Cuando en xunetu de 2015 anunciábase la instalación en Xixón de la International Opera Studio dalgunos dimos un saltu d’allegría. Yera, na menos, una esperiencia pionera n’España. Una escuela pa talentos de cantu, atropaos en tol mundu y que, amás, diba a dinamizar la vida cultural xixonesa. El compromisu pola parte la IOS yera facer dos representaciones operístiques na nuestra ciudá. A cambiu, l’Ayuntamientu comprometíase a da-yos una subvención, anunciar, lloxicamente, les actividaes y facilita-yos dalgún llocal onde poder llevales a cabo.

Too paecía dir bien. L’Ayuntamientu dio-yos como ayuda económica 50.000 euros pa esi añu y facilitó-yos el Teatru Xovellanos. La IOS, pol so llau, cumplió montando, nel 2015, dos representaciones operístiques que tuvieron un gran ésitu de crítica y públicu: “El elixir de amor”, de Donizetti y una guapísima “Boheme” del xenial Puccini. El que quiera, pue mirar nel buscador d’esti blogue la mio opinión sobre dambes. Al añu siguiente la IOS volvió a cumplir, montando otres dos óperes, nesti casu “La Sonnambula”, de Bellini y “Un ballo in maschera” de Verdi. Por primer vez na historia, los aficionaos d’Uviéu teníen que venir a ver bona opera a Xixón.

Pero acabo enterame pol periódicu que la International Opera Studio va abandonar, nun sólo la nuestra ciudá, sinón Asturies, porque les condiciones pautaes col Ayuntamientu de Xixón nun se respeten. Baxáron-yos la subvención de los 50.000 euros del añu que se firmó’l contratu, a unos míseros 15.000, cuasi lo que se da pa facer unes fiestes de barriu. Nun sé satamente cuánto dará agora l’Ilustre Ayuntamientu a, por exemplu, la Selmana Negra, pero pal 2016 fueron 100.000 euros pa quemar nuna selmanina. Amás d’ello, la IOS quéxase de la poca difusión que se daba a los sos espectáculos, cuasi ensin anunciar nin el mesmu día la representación. Igual esos funcionarios o contrataos que lleven esi esperpentu llamáu Divertia, que nun sabe facer nin un concursu pa dirixir el FICX, nun son conscientes de la perda que supón, nun sólo palos que nos gusta la opera, sinón pa la vida cultural y social de Xixón la marcha d’esti interesantísimu proyeutu, pero dalguién debería esplicá-yoslo. Y si se ta a tiempu, intentar correxir la metedura de pata y conseguir que la IOS permaneza na nuestra ciudá. Porque, amás, nun contentos sólo con facer que se marchen, esti añu, ensin que se dea una esplicación afayadiza, tampoco nun se programen equí les dos funciones de la Opera d’Uviéu que teníen firmaes n’otros años. Nesti casu diben ser “Faust”, de Gounod, y el “Rigoletto” de Verdi pero, como digo, por razones non esplicaes, suspendióse l’acuerdu.

En resumiendo: Ente esa Divertia, caxón desastrosu que lleva la cultura na nuestra ciudá, y la pasividá del Ayuntamientu que ta viéndoles pasar, quedamos ensin música operística en Xixón y, además, con visos de que nun vuelva. A nun ser dalguna d’eses compañíes perroneres que termina saliendo más cara qu’estos interesantes proyeutos. Nun se pue desafinar más.

 

Categoríes: Canal Blogues, Recomendaos

La Olivina del día

10 Marzu, 2017

Y a Victoria Prego ¿quién la desembalsamó?

Categoríes: Canal Blogues, Recomendaos

El Día de la muyer trabayadora

8 Marzu, 2017

Meyor que cualquier pallabra, mensaxe o sermón que podamos escribir los paisanos nesti día,  ye sentir lo que sienten les propies muyeres na so propia voz. Ésta, por exemplu, ye la de María Teresa González:

NESTA HORA

(A vosotres, compañeres de trabayu de tantos años)

Nesta hora
en que’l xelu acorripia les coraes.
Nesta hora
onde’l tastu y l’inxeniu
esanicien el caberu aliendu
na llarga y afogante agonía.
Nesta hora
d’angustiosa griesca ente ser
persona o cosa.
Nesta hora
de silenciosu silenciu,
de cansáu cansanciu,
d’aborrecíu aborrecimientu,
de vacíu enllenu de vacíos,
pienso en ti.
En ti, muyer,
que nun fueron a dexate
nin el drechu de ser neña,
nin esfrutaste
l’asombru de la mocedá.

Pienso en ti,
que te tracamundiaron los suaños,
pola balleta.
L’arte
pola ferramienta.
A Beethoven
pol chirriar de les máquines.

En vosotros
anónimos navegantes ensin estrelles,
que vos alloriaron
por malsatisfacer necesidaes primarias.
Peones de la fame,
inorantes de la sonisa,
escaecíos del amor.

Pienso en vosotros,
sordos y coxos de la vida.
Nesta hora cabera
desdexada de tou ñiciu creador
y positivu,
dedícovos el mio sórdidu homenaxe,
cola esperanza de que nun tengáis ná
p’ambicionalo too.

(Obra Completa, de María Teresa González. Ed. Trabe. Uviéu, 2008. Px.35-36)

Categoríes: Canal Blogues, Recomendaos

La Olivina del día

6 Marzu, 2017

Hailos que son Euroescépticos, yo soi Asturescépticu.

Categoríes: Canal Blogues, Recomendaos

“Kopa”, un de los grandes

4 Marzu, 2017

Yera francés d’orixe polacu y en realidá llamábase Raymond Kopascewski pero, claro, con ese apellíu nun había quien lu pudiere llamar, asina qu’abreviólu y quedó namás en “Kopa”. Llegó al Real Madrid a finales de los años 50, depués d’un pasu trunfal pol Stade de Reims onde yá dexó clara la so categoría. Yera mui piquiñín d’estatura, sobre too pa xugar de delanteru centru, puestu que, naquella dómina, solíen ocupar los grandonos rematadores de cabeza. Pero él suplíalo con una velocidá endiañada y un regate curtiu que dexaba a los defenses tiraos pel suelu. Eso, amestao a una gran intelixencia a la hora de ver el xuegu, fízolu llegar mui xoven a lo más alto de la so carrera.

Pese a que’l puestu nel que meyor se desendolcaba yera’l de delanteru centru, nel Real Madrid desplazáronlu al d’estremu derechu, porque nel centru taba l’indiscutible Di Stefano al que naide podía arrempuña-y el sitiu. Na esquina, Kopa nun rendía tanto como d’ariete, anque coles sos fintes y centros medíos complementaba mui bien aquella delantera. La prueba fue que, un par d’años depués, xugó nel so verdaderu puestu cola seleición francesa nel mundial de Suecia, y fue proclamáu meyor xugador del mundial. La delantera de Francia, Wiesneski-Fontaine-Kopa-Piantoni y Vincent, marcó 15 goles en 4 partidos y namás pudo parala aquella maraviosa seleición brasileña de Garrincha, Didí, Vavá, Pelé, etc. Francia quedó tercera, máxima goleadora del tornéu, Just Fontaine record goleador entovía non superáu con 13 tantos y, Raymond Kopa meyor xugador del campeonatu. Llueu volvió al Real Madrid, y ellí otra vuelta a dexa-y el sitiu a la “saeta rubia”, don Alfredo.

Nesi puestu vilu yo xugar n’El Molinón, cuando la tarde del famosu “mataxigantes” en que’l Sporting ganó a los blancos por 3-0. Con un gol de Biempica dende los vestuarios, y otros dos del xenial Sánchez, que por ser de Xixón siempre se-y esixo más qu’a tanta medianía. Aquel día’l prau taba dafechamente embarráu, por mor de la lluvia de los díes anteriores (y d’esi mesmu día que llovió lo que quixo) y Kopa, como’l restu l’equipu, naufragó perdíu ente la repla.

En fin, lleo la noticia de la muerte del “napoleón del fútbol”, como lu llamaba la prensa cursi, y viénenme munchos recuerdos d’aquella época. Vamos zarrar el grifu amestando namás que morrió un gran futbolista y, según dicen los que lu trataron, una gran persona. Que la tierra y seya leve.

Categoríes: Canal Blogues, Recomendaos

“Papelucho”

1 Marzu, 2017

El blogue “MiauBlog”, de la prestixosa Fundación “Cuatro gatos”, asitiada en Miami y que caltién unos importantes premios de lliteratura infantil y xuvenil, recuérdanos a l’autora chilena Marcela Paz (Esther Huneeus Salas de Claro), de la que se cumplen agora los 115 años del so nacimientu. Marcela pasará a la historia de la LLIX pola creación del so prestosu personaxe “Papelucho“, del qu’agora cúmplense siete décades de la so primer apaición. Un neñu de clas media que va escribiendo como una especie de diarios, al rodiu de les coses que van pasándo-y. Asina, l’autora, pol ésitu que tuvieron los llibros del so personaxe, publicó una decena d’ellos con títulos como “Papelucho historiador“, “Papelucho detective“, “Papelucho en la clínica“, y asina hasta un total de diez, l’últimu d’ellos nel 1974. ¿El secretu del ésitu? Pues un llinguax cenciellu y simpáticu que nel intre atrapa al llector infantil. Y como amuesa d’ello, reproduzco un parrafín d’un de los sos llibros, incluyíu nel blogue “MiauBlog”. Veréis cómo vos presta:

“Estaba partiendo nueces con el martillo, cuando me maté un dedo. Fue sin vuelta. Mi pobre dedo agonizó toda la noche. Yo lo sentí palpitar y palpitar hasta que me dormí,  debe haberse muerto en ese momento porque no latió más. Uno ni sabe que tiene corazón hasta en los dedos. Ahora que está muerto, no duele, pero se está poniendo negro y me da como pena de él. No sé cómo enterrarlo. Es terrible tener un dedo muerto y que nadie lo sepa.”

 

Categoríes: Canal Blogues, Recomendaos

De Romandela… rociera

27 Febreru, 2017

Seguro que ye que tengo mala suerte, pero’l segundu programa que vi de “De romandela” fue peor que’l primeru. Yá en díes pasaos fici un pequeñu comentariu del únicu que viere, y quedare en poner otru por si meyoraba la imaxe. Pues sintiéndolo muncho, depués d’ésti yá se me quitaren les ganes de ver más. Y ye una pena, porque la idea sigui siendo válida, pero nun soi a tragar que se nos meta de maguyu una asociación rociera que nada tien de ver col nuestru folklore, los nuestros cancios, nin les nuestres tradiciones. Les sevillanes y el rocío, pa ellos. Pa los sevillanos/es y pa los rocieros. Y dende llueu menos soporto a esi presentador, siempre “escedíu”, que reparte tantos abrazos ente los amigos y pon voz andaluza cuando fala colos rocieros. Como dixi la otra vez, seguro qu’hai xente a la que-y presta, como tamién hai xente que vota a Trump, pero como esi nun ye’l mio casu, dígo-y adios murniamente a eses romandeles de la TPA. ¡Hasta nunca!
(Semeya, “Susana Novias”)

Categoríes: Canal Blogues, Recomendaos

De furtivos y otres coses

25 Xineru, 2017

Pasu ente pasu, como la tortura de la gota malaya, cuasi tolos díes hai noticies periodístiques al rodiu d’animales muertos polos cazadores furtivos. Munches veces animales protexíos o especies en pelligru d’estinción. Trampes, llazos o direutamente tiros, acaben de mou cruel con estos seres, al marxe de toa llei, asonsañando a les películes del Far West onde siempres trunfa’l más fuerte.

Pero con ser eso grave, muncho mayor ye cuando asoceden coses tan irracionales como l’asesinatu a sangre fría de dos axentes rurales de la Generalitat que, en cumplimientu del so llabor, percorríen la zona pidiendo los permisos pa portar armes. Esto ye noticia destacada pola so estrema violencia, pero hai que recordar que tolos años muerren na actividá de la caza non menos de 12 persones, y el númberu de feríos anda al rodiu de los seiscientos.

Al mio modestu talantar habría que replantegase’l tema de les llicencies pa llevar armes, y nun repartir escopetes como si fueren pa un puestu de feria. Non tol mundu tien el caráuter templáu y l’autocontrol necesariu pa llevar un instrumentu que pue provocar la muerte. Y mentanto, dar una mayor proteición a estos servidores de la llei pa que nun seyan una presa fácil, y castigu exemplar pal so asesín pa que nun tenga imitadores. En cuantes a los “otros” cazadores, esos furtivos asesinos d’animales, tamién mano mui dura con ellos, pues el que ye capaz de matar por esos métodos a un animal indefensu, igual pue facelo con una  persona, si llega’l casu. Que nun-yos salga de baldre lo que faen.
(Semeya: Adriá Ropero/ EFE)

Categoríes: Canal Blogues, Recomendaos

La Olivina del día

24 Xineru, 2017

Habría qu’incluyir ente les Denominaciones d’Orixen a l’Asturiana del Valle Roso.

 

Categoríes: Canal Blogues, Recomendaos

Un facha na Casa Blanca

21 Xineru, 2017

Anque paezca mentira, esti blogue lleva más de ocho años furrulando. Y recuérdolo mui bien porque un de los primeros comentarios que fici, yo creo que’l segundu, titulábase “Un negro en la Casa Blanca” y yera, claro, sobre’l nomamientu d’Obama como Presidente del mayor país del mundu, si non en tamañu, sí n’importancia. Agora, dos llexislatures depués, llega a esti puestu cimeru un “patán”, ególatra, manipulador y facha llamáu Donald Trump. Como’l día y la nueche, solo que nesti casu’l día ye’l de piel escura y la nueche esi mantecón roxacu.

Con Trump llega a la Casa Blanca tolo que yo detesto: el bocayón, chulo, machista, populista (nunca creyí que diba a emplegar esa pallabra que me revienta) belicista y facha. Asina cúmplese esi dichu que siempres defendieron los norteamericanos: Cualquiera pue ser presidente. Y nesti casu cúmplese sobradamente: Llegó un cualquiera.

De mano yá fizo lo que munchos fachas taben deseyando: anular el decretu d’Obama en favor d’una Sanidá un poco más  pública. Que dalgunos millones de persones que nun la teníen, pudieren optar a ella ensin grandes costos, porque gratis dafechu tampoco nun lo yera. Tarán contentes les grandes compañíes de seguros privaos. Pero, como ya dixi otra vuelta, Trump nun llega solu. Nun ye esi francutirador que nos anunciaben cuando empezaben les Primaries. Con él lleguen munchos más fachas al poder: empresarios, militares, políticos rancios… que yá ocupen les altes esferes del País. Van ser cuatro años mui duros.

Veremos en qué van quedar toles bravuconaes que dixo a lo llargo de la campaña, coles rises de fondu, como nes males series, d’esa América Profunda que, polo que vemos, forma la mayor parte de la población d’Estaos Xuníos. Seguro que cumplirá dalgunes, pero quiero creyer qu’otres munches nun podrá llevales a cabu, nun mundu cada vuelta más conectáu ya interdependiente. En tou casu, creo que’l restu paises del mundu, y polo que a min respeuta la Comunidá Europea y España, deberíen planta-y cara al vecín americanu y si el quier una América pa los americanos, querer nosotros una Europa y una España pa los europeos. O sea que, esos compatriotes suyos qu’anden pel mundu, por exemplu nes Bases Militares de les que dalgunes tenemos perequí nel Vieyu Mundu, marchen pa la so casina d’onde nunca debieron salir. ¿Alcuérdase’l PSOE de cuando glayaben na cai, con munchos de nosotros, aquello de “OTAN non, Bases fuera”, bueno, pues igual hai que se replantear too eso de les bases ya que Trump paez dispuestu a salise de la OTAN. En fin, como diz el tópicu, anque nun suel ser verdá, el tiempu pon a caún nel so llugar. A ver ónde pon el tiempu de la Historia a esti vaqueru maizón que vien acoyonando.
(Semeyes; www.taringa.net)

 

Categoríes: Canal Blogues, Recomendaos

La Olivina del día

20 Xineru, 2017

Paez que colo del “fríu Polar” referíense al de la Pola.

Categoríes: Canal Blogues, Recomendaos

Adiós al Pitu, bienveníu Rubi.

18 Xineru, 2017

Yera llóxico. Va un par de díes, comentaba nesti blogue la necesidá de tomar midíes pa cortar el rumbu erráticu, por non llamalu suicida, del Sporting, midíes que pasaben por una dimisión del entrenador o, casu contrariu, por un cese. Igual yá ye tarde pa encarrilar el futuru del equipu, pero polo menos hai que lo intentar. Llegaos a esti finxu siempre hai la tentación d’entrugase si ello ye xusto, pero esa ye una entruga que nesti deporte/espeutáculu “carnivoru” nun tien sentíu. La culpa d’Abelardo, que per otru llau pue  caenos personalmente bien, ye bien ñidia: nun supo o nun pudo dotar al equipu d’un sistema coherente, nin tresmitir a los xugadores la motivación y el puxu necesarios pa suplir lo anterior. D’ehí esa cuesta abaxo pindia que nos llevó a facer un númberu de puntos ridículu, al tiempu que somos de los más goleaos y de los menos goleadores. Direutos pa Segunda. Non tola culpa ye d’él, claro, los mangantes de los xugadores y la ineptitú de la Direutiva, como siempre mal aconseyada nel tema fichaxes, collaboraron al desastre. Pero como se diz nesti mundu futboleru tan enllenu de tópicos y frases heches: “como nun vas a echar a los 24 xugadores, lo más fácil ye echar al entrenador”.

A Abelardo habrá que-y agradecer los servicios prestaos, que nun fueron pocos: un ascensu a Primera col que naide contaba, y poder mantenese un añu, colo que tampoco nun se contaba. Ye verdá que tamién influyeren la Santina, el Lugo, un delanteru arxentinu llamáu Caballero, San Betis Balompié de Sevilla, Marcelinín Primeru de Careñes y dellos milagros más, pero había que tar ehí pa que los milagros surtieren efeutu. Abelardo y los xugadores aidaron. Pero -otru tópicu- la vida sigui, y lo que güei ye cara mañana ye cruz, y a tomar por ehí la bicicleta.

Agora llega un entrenador nuevu. Un tal Rubi al que nun conozo, pero que tien fama de facer equipos duros, incómodos, a  los que cuesta ganar. A estes altures de la Lliga nun se pue andar con esquisiteces, hai que se plantegar cada partíu como una batalla onde hai que dexar la pelleya. Y el que nun tea dispuestu a ello, que marche pa so casa. Y nun sigo, porque  paez que soi yo’l nuevu entrenador del Sporting. Un equipu rotu, ensin condición física nin táutica y ensin moral. Si esti Rubi pue facer dalgo, que lo demuestre. Ye’l momentu.

Categoríes: Canal Blogues, Recomendaos

La Olivina del día

17 Xineru, 2017

Ye fácil tener bona química con Donald Trump, basta con alcordase del ácidu sulfúricu.

 

Categoríes: Canal Blogues, Recomendaos

Non queremos funcionarios

16 Xineru, 2017

Dícenme que, entrugáu Abelardo mister del Sporting, pola posibilidá de que dimitiere a la vista’l desastrosu percorríu que ta faciendo’l so equipu, contestó: “Yo soi un funcionariu del Sporting, ellos póneme nel sitiu que quieran”. Nun sé si esto fue asina, pero si lo fue, la contestación ye “de pata bancu”. Siguiendo esi razonamientu, el Sporting tenía que tener en plantiya a tolos entrenadores que tuvo dende tiempos inmemoriales, menos a los qu’hubieren muerto o marchao pola so propia iniciativa. ¿Funcionariu? Non, usté nun fizo nengún esamen, nin pasó nenguna peñera pa ser l’entrenador del equipu xixonés. Usté, como tolos entrenadores, entró “a deu”, escoyíu con mayor o menor aciertu, por una xunta direutiva que lu contrató pa esa misión en concreto: entrenar al primer equipu del Sporting. Cuando les coses van bien, pues mui bien, pero cuando van mal hai qu’apechugar con ello y, si se tien dignidá, dexar el cargu pa que venga otru que lo faiga meyor.

Ta claro que non siempre ye l’entrenador el culpable del destín del equipu. Como nesti casu, los xugadores y los que los ficharon nun tán al altor que reclama un club señeru como ye’l Sporting. Pero d’eso a llavase les manes diciendo qu’él ye un funcionariu, hai un abismu. Entiendo, que’l propiu Abelardo intervino nel fichaxe de la mayoría de los xugadores, xunto con esi Nico Rodríguez que vino pa eso. De fechu, y ehí ta na prensa pa relleelo, depués de los 12 fichaxes que se ficieron esti añu (¡doce!) dambos dixeron que l’equipu yera meyor que’l del añu pasáu. Y llueu, toos sabemos y Abelardo tamién, que’l destín d’un entrenador ta lligáu a los resultaos que vaya algamando. Si la cosa va bien, ye’l meyor del mundu. Si va mal, él ye’l culpable. Pasó hasta col lloráu Preciado, al qu’agora xuben a los altares, pero que nel so día echaron polos malos resultaos d’aquel añu.

Abelardo diz que pue sacar al equipu d’esta situación. Nun paez. Ensin un sistema -pasó yá media Lliga y nun sé sabe a qué xuega l’equipu, faciendo pruebes toles selmanes- ensin espíritu, garra, amor propiu… toes aquelles virtúes que’l xixonés supo tresmitir años anteriores, el Sporting ye un náufragu metanes una tormenta. Más da la impresión de qu’esa cantinela repítela pa caltenese nel puestu. Ye indiferente qu’Abelardo nos caiga bien o mal -a min nun me cae mal colos defeutos qu’otres veces ya dixi- pero creo que’l so ciclu nel Sporting yá finó. Queda media Lliga por xugar. Meyor ye apostar por daquién con nuevu puxu y nueves idegues pal equipu y agradece-y a Abelardo los servicios prestaos. Nun sé si se tará tovía a tiempu, pero polo menos hai que lo intentar. ¡Ah! Y que busque otra disculpa: lo de funcionariu nun cuela.

Categoríes: Canal Blogues, Recomendaos

Pages