Recomendaos

Ex libris

Trabayu de Campu - 26 Mayu, 2017

Títulu: “La mancha humana”

Autor: Philip Roth

Traducción: Jordi Fibla

Editorial Círculo de Lectores

Añu: 2002

MENTIRES Y SECRETOS.- El decanu de la Universidá de Athena, nel norte de los EE.XX. ye un paisanu cuasi exemplar. Gracies a elli, una universidá de provincies que vexetaba intelectualmente ensin futuru dalgún, vese camudada nun centru d’interés a onde van dir profesores xóvenes a trabayar con enfotu. Home respetáu, un día va a pronunciar en clas una desafortunada frase que-y va a trayer abondes consecuencies. Acusáu inxustamente de racismu, Coleman Silk dimite de tolos sos cargos y cai en desgracia nuna sociedá mezquina y envidiosa que dende entós lu marxina. Esti ye l’aniciu de la fonda novela de Philip Roth, reputáu escritor ganador de los premios más importantes de Norteamérica. Roth afonda na personalidá de Coleman y na de la xente que lu arrodia, asoleyando, dando a la lluz una  riestra de secretos y mentires que conformen la idiosincrasia del pueblu, pero tamién, en xeneral, la de tolos seres humanos. Asina, “la mancha humana”, ye la que los homes y muyeres producimos en cualquier cosa que toquemos. Tamos toos contaminaos por envidies, y pequeñes (o grandes) miseries que contaxen a les persones coles que tratamos y a les actividaes qu’exercemos.

El profesor Silk, los sos fíos, los escuros oríxenes que lu traxeron hasta Athena, la tempestuosa vida de la so amante Faunia, la rellación col so exmaríu un antiguu combatiente de Vietnam alloquecíu, como toa aquella xeneración que fue y tornó alloriada y ensin llugar social, nin sentimental, los compañeros de la Universidá… Too ello cuntao por un vieyu escritor que vive nes afueres del pueblu y ye testigu de los socesos que lleven a un dramáticu final.

Roth emplega l’escalpelu pa tayar la superficie d’una pequeña ciudá burguesa embaxo la que s’escuenden demasiaes mentires, demasiaes miseries que manchen, que contaminen a una comunidá humana que podría ser otra cualquiera, porque lo que pasa nun ye, nin más nin menos, que la propia esencia del ser humanu. Y d’eso entiende muncho l’autor de Newark (Nueva Jersey). El vieyu maestru sigui en forma.

Categoríes: Canal Blogues, Recomendaos

Altu Ventaniella (Ponga) - Les Pandes - Pileñes - Miédome

Camudando'l camín - 25 Mayu, 2017
9 d'Abril de 2017

Track: Altu Ventaniella (Ponga) - Les Pandes - Pileñes - Miédome


Cuantayá que nun tornaba pel Altu Ventaniella, anque facía menos tiempu que tuve per dalguna de les sos mítiques peñes. La primer vegada, nel 2010, facíemos Ten y Pileñes y fae muncho menos tiempu, tuviéramos en Ten saliendo dende la Uña.

Esta vegada, la idega yera ascender al Pileñes y facer una circular conociendo fasteres del norte d'esta peñe. Pa ello, aportaremos al Altu Ventaniella , dempués del llarguísimu viaxe dende Xixón per Autovía'l Cantábricu y N-625 que dende Lloviu déxanos en Cangues d'Onís.

Grupu nel Altu Ventaniella (1194 m) preparaos p'andar

Nós, adelantámonos el vienres durmimos en Cangues pa siguir pela mañana pela N-625 pa tirar pelos Beyos alantre, hasta'l desvíu hacia Sellañu onde entramos en Ponga. Equí siguimos pela mesma carretera, pasando por Pilanegru, Sotos y La Casona de Mesta, hasta garrar la PO-3, que nos llevará al traviés d'Abiegos y Yanu a la fin a Sobrefoz.
Preparámonos, con un día ablucante, hai que dicilo y saldremos caminando hacia la Venta, pa xubir per una viesquina, dando envueltes hasta topanos cola riega Ventaniella, onde daremos una envuelta hacia'l norte, col envís d'averanos hacia la faldera del picu Les Pandes.
Entramos hacia'l valle de Miédome
Pa ello, entraremos nes Camperes de Miédome, dándo vista a tol valle, pol que varies hores dempués descenderemos. Pero envede tirar hacia'l colláu, entamamos un pindiu ascensu per L'Argañón, faciendo envueltes pelos milenta senderos que crucien esta fastera de monte baxo de les Pandes.

L'ascensu nun tien denguna dificultá y simplemente caún dirá garrando'l so ritmu, esfrutando de les vistes hacia'l norte, con cumales bien nomaos de Casu y Ponga, yendo dende'l Maciédome y Tiatordos a la llínea del Recuengu y Zorru entre otros.

Ascendemos a l'arista de les Pandes per pindiu tarrén
Pali pali, vamos aportando a l'arista cimera del picu Les Pandes, onde algamamos prestoses vistes hacia'l Mampodre, dándonos l'alcordanza necesaria de que fáltanos entá la metá del macizu per conocer y que tendremos de remedialu.

Personalmente, según voi avanzando pela arista, voi dándome cuenta de lo guapu que ye esti monte y qu'al asitiase pegáu a dos moles como Ten y Pileñes, pues queda totalmente escaecíu, poro vamos a da-y el so valir montuno, sobretou cuando facemos cume y topámonos col desbentíu que tien hacia l'oriente... tremendu.

Perpasaremos peles Pandes (1881 m) teniendo curiáu nel descensu
Un ratín nel cumal p'axuntanos, delles miraes a tola redolada que ye impresionante y siguimos camín, descendiendo del Picu Les Pandes. Descensu, que nun tien de facese al debalu, ya que'l calter rotu de la so cara oriental nun convida a grandes destrepes.

Poro, lo meyor ye dar la vuelta un pocu pela arista hasta salir per una forcadina que fadrános baxar per un senderu claro. Tamién, podemos arimanos un pelín hacia'l sur y veremos una vira hacia la mandrecha, pela cual báxase bien tamién, pa descender per un pequeñu canalizu, pero enxamás intentalo per dalguno de los canalizos de la so cara más xabaz ya qu'esbarrumba enforma.

Facemos tola arista hasta la Peñe Pileñes
Una vegada que tamos embaxo Les Pandes, garraremos la llarga arista que primeru baxará a la Colladina y llueu entamará a xubir ensin descansu hacia la mole del Pileñes. Mole, qu'al llau de Ten queda en na... pero cuando la percorres daste cuenta del montañón que tas ascendiendo.

Llueu de pasar el primer entepechu, meterémonos nel tramu final más llanu, pasando pela Forcadina los Foyos y taremos a la fín nos 2018 m de la peñe Pileñes. Güei ye un día de bon tiempu, poro alcontramos estos cumales con bien de montañeros, colos que charramos un ratín y compartimos cumal pa xintar media horina llarga.


Cume y descansu tranquilu nos 2018 m del Pileñes
Dexaremos les vistes de Picos, el descansu y la tranquilidá del monte y siguiremos camín, magar de 4 hores y media de ruta, pa intentar un descensu hacia la Xerrazana, pero dellos resbariones pela pindia yerba y ver que'l descensu tórnase más vertical a cada tramu, fainos esaniciar esa opción y descendremos pel camín davezu pel qu'ascendiéramos.

La idega yera descender hacia'l valle Zamarzanu pa da-y preste al guapu Porrón de Viañu, pero quedó pa prau y decidimos garrar la canal de baxada hacia los Foyos del Agua. Ellí, aldericamos un ratín pa ver les posibilidaes, pero ficiérasenos un pelín tarde y decidimos dexar pa otra ocasión esti cumal y los valles que lu arrodien.


Facemos el descensu del Pileñes baxando a los Foyos del Agua
De los Foyos del Agua, ascenderemos cola calma y per bon senderu hacia'l colláu Miédome, a la mandrecha del Picu Les Pandes y daremos vista a tol valle de Miédome y como non, a toles pandes peles que xubiéramos pela mañana.

El descensu pel valle de Miédome sedrá cómodu per bon senderu y sele diremos eliminando desnivel hasta plantános nes Camperes de Miédome. Otru requexín ponguetu bien guapu, que da pasu a tornar hacia la riega Ventaniella o tirase per un preciosu fayéu pa travesalu empobinándonos hacia la pista de Ventaniella.

Ascenderemos al colláu Miédome pa baxar peles Camperes hasta Ventaniella
Nun teníemos ganes de caleyar muncho más y metese per una viesca de faya, siempre ye un placer, poro tiramos p'alantre, topándonos con dalguna traza de senderu y escorriendo ensin querer a dellos robezos qu'allugábense na tranquilidá d'una viesca pongueta.

Ensin más, aportaremos al Altu Ventaniella magar de casi 7 hores de relaxada ruta, na qu'ascendimos un desnivel positivu de 1025 m y percorrimos un total de 8.9 km, lloñe de la ruta que tenía preparada, pero dacuando'l cuerpu pide un respiru, les menos de les vegaes y el grupu merez tamién dalguna rutina que nun seya una xatada.

Ta la próxima xente....

Camudando'l Camín dende la peñe Pileñes
Categoríes: Canal Blogues, Recomendaos

La Olivina del día

Trabayu de Campu - 24 Mayu, 2017

Nel tema de les tarifes telefóniques, los de Castellón siempre son de la Plana.

Categoríes: Canal Blogues, Recomendaos

“Susanita tien un ratón”

Trabayu de Campu - 22 Mayu, 2017

Como cantaben aquellos ínclitos payasos de la tele va una montonera d’años: “Susanita tien un ratón, un ratón piquiñín…”, solo que nesti casu’l ratón de Susanita nun yera tan piquiñín y comióla con pataques. Y con ella, a Felipe González, Alfonso Guerra, Zapatero, los barones, los presidentes de gobiernos autonómicos y tol aparatu eclesial del partíu, comandáu pol “Cardenal Primáu” (nel sentíu figuráu) don Javier Fernández (a) el mudu. Como dicía aquel otru parroquianu, un tal Santos, conceyal del PP nel Ayuntamientu de Xixón al salir d’un plenu que perdiere: “Esto ye la puta democracia”. Pues sí amigu Santos, pues sí Susanita, esto ye la puta democracia. La d’una persona un votu, anque a vosotros vos prestara más el “too pal pueblu, pero ensin el pueblu” del despotismu ilustráu. Que vas facer, ñacísteis con retrasu.

¿Y agora qué? cabría entrugase nestos momentos. ¿Qué va a ser del Psoe? ¿Cuál va a ser el panorama políticu que se desendolque n’España? La cosa ye complicada. L’aparatu institucional del Psoe saltó pelos aires, ergo hai que lu  reconstruyir. ¿Con qué? Coles filtrayes de lo que queda. Lo malo ye que los que queden nun son precisamente amigos. Tanto s’esbabayó contra los otros “compañeros” de partíu que va ser mui difícil recomponer les rellaciones. De la habilidá y bona mano de Pedro Sánchez, y del “perdón al to pueblu Señor” de los derrotaos dependerá’l prósimu futuru del Psoe, en cualquier casu mui tocáu del ala pa xugar un papel importante nel diseñu inmediatu de la política española. El PP enllamuergáu a fondo en milenta corrupciones, d’arriba abaxo. El Psoe n’abertal ensin rumbu y con futuru inciertu. Ciudadanos al rau del PP a ver que cai del guindu. ¿Y Podemos? Ésti podría ser el gran momentu de Podemos si supiere movese con habilidá y una cierta prudencia, lo que nun quier dicir renunciar al so papel d’ aguiyar a “los malos”. Pero un migayu de contención verbal y delles propuestes intelixentes ensin intentar esclusivismos, podríen da-y un emburrión definitivu na clasificación xeneral por puntos de la lliga de campeones. Lo malo ye que nun se ve esa posibilidá, con unos dirixentes, encabezaos por Pablín Iglesies, siempre intentado “rizar el rizu”. En fin, como dixo aquel Toscanu, que yera ciegu, “ver veremos”, amigos. Y lo que seya, sonará (perdón, yá sé que son munchos refranes xuntos).
(Semeya EFE)

Categoríes: Canal Blogues, Recomendaos

La Olivina del día

Trabayu de Campu - 18 Mayu, 2017

Llamen a Rajoy a declarar por videoconferencia y tá comunicando.

 

Categoríes: Canal Blogues, Recomendaos

La Pesanca (Piloña) - Foz del Infiernu - Foz de los Cubilones - La Becerrera - Foz de Moñacos

Camudando'l camín - 17 Mayu, 2017
2 d'Abril de 2017

Track: La Pesanca (Piloña) - Foz Infiernu - Foz de los Cubilones - La Becerrera - Foz de Moñacos


Hai díes y son munchos, qu'escoyemos les rutes non por facer un cumal en cuestión, sinon por conocer un posible camín que nos tien de llevar a la base d'esi cumal. Otres vegaes, anque seyan les menos, vamos a conocer pasos y accidentes xeográficos de la nuesa Asturies y de les más ablucantes son les foces. 

Una foz ye un pasu pente peñes nes que davezu pasa una riega y na fastera del ríu Infiernu, tenémosles de tolos collores, poro, preparar una rutina pa conocer les siendes qu'intenten travesales yera dalgo que tenía na tiesta dende cuantayá.

Salimos dende La Pesanca (415 m)
P'aportar al nuesu puntu de salida, en La Pesanca, saldremos de Xixón pela minera pa xuntanos a la A-8 saliéndonos pela N-634 hasta la capital de Piloña, L'Infiestu. Llueu garraremos la PI-4 que percorrerá a la vera'l ríu Espinaréu, los pueblos d'Espinaréu, Riquimáu y Rifabar enantes d'aportar al aparcaderu de la Pesanca, onde xuntámonos tol grupu.

El camín, nun tien pérdida denguna, ya que d'aniciu caleyaremos pela pista a la vera'l ríu Infiernu, que dirá nun lleve ascensu, conociendo poces, saltos d'agua y trespasando les pontes que llévenmos d'un llau al otru del ríu en delles ocasiones.

Caleyamos tola pista a la vera'l ríu Infiernu
Llugares nomaos nel nuesu andar, será'l Muñizón y el crucie hacia Degoes, pa dempués pasar la foz del Infiernu trespasando les pontes del Mercaín, Tarrentosa y el Patín, siendo nel de Coberas, onde tendremos el nuesu puntu de desvíu del camín principal.

Nel intre, acabaremos el tramu tranquilu y metémonos dafechu en llugar d'aventura, saliendo a la mandrecha per un claru senderín que tien d'empobinase hacia'l colláu Los Porros, pero nós una vegada que salvamos l'altor más xabaz de la riega los Cubilones, fadremos una envuelta a la manzorga pa dir faldiando hasta la entrada de la Foz de los Cubilones.

Faciendo sienda hacia la Foz de los Cubilones
Como siempre que vamos de monte, restolamos peles redes info de los llugares que queremos conocer y d'esta foz sabemos que ye transitable pero con poca agua. Meterémonos con ganes de diversión y sorprende'l bon senderu qu'entra hacia la so boca.

Llueu vemos qu'a la entrada de la foz, esti senderu desvíase d'ella pel llau esquierdu y probáblemente avance llibrando la peña los Duernos hacia la mayada Corvera y a posteriori hacia la Felguerina. Nós, adentrámonos nos Cubilones y diremos llibrando pali pali tolos pequeños pasos que diremos alcontrando.

Saliendo de los Cubilones magar de divertinos a lo grande
Nun pudiera dicir, cuantes vegaes cruciamos la riega, cuando trepes tuviemos que facer, pero con un grupu tan numerosu como yeremos, pasar ensin mayores problemes tolos miembros, diz a les clares que nun yera mui difícil.

Eso sí, la belleza d'estos llugares xunto cola gayola d'andar pegando saltos con posibilidá de moyase nun requexu de lo más xabaz, casi fízonos que'l restu de la ruta quedara en segundu planu. Poro, colamos de los Cubilones cola sensación de facese curtia, pero aina abandonamos esos pensamientos ya que'l siguiente tramu pela fastera del Fasgueal ye perguapa tamién.

Avanzaremos per senderos hacia la xerra Trallán
Lo normal, ye que la xente namái que sale de los Cubilones, vaya dirixéndose hacia Brañanueva, penmediu la viesca que queda ente la riega los Cubilones y otra vallina que baxa dende la Felguerina. Pero nós, queríemos siguir pegaos a los Cubilones hasta topános cola entrada de la xabaz Foz del Molín.

Asína lo ficimos, primeru a la manzorga la riega y llueu pasarémonos a la mandrecha onde diremos alcontrando siempre una sienda afayaiza pa dir avanzando. En dalgunos puntos, ésta ye mui clara y paez que toma camín hacia dalgún pasu pela xerra Trallán, probablemente la sienda Colines.

Dando vista a la intransitable foz del Molín
Güei nun yera'l casu, y pa cuando ya esfrutamos suficiente de llugares bellísimos de los Cubilones y alcontrámonos con Trallán de frente, tocó descender dellos metros hasta la boquera de la Foz del Molín, la cual amúesase intransitable, al menos nesta dómina del añu.

Hai que dicir que la idega yera intentalo, pero a la mesma entrada un marabayu de poces, saltes y munchísima vexetación da la sensación de tener qu'afrontala pel mesmu calce. Ensin, molestanos muncho y contentu por conocela, metémonos nuna pindia ascensión pela viesca que xube pegada a la Peña La Becerrera.

Meterémonos un entepechu hacia Brañanueva
Nun hai un senderu claru en tola ascensión, pero la viesca va dir regalándonos un duru paséu pero preciosu, con fayes de gran valir, hasta salir a la parte alta, onde alcontraremos un camín desbrozáu d'apocayá, que como ya dixe, tien de venir dende la Foz de los Cubilones.

Una vegada que nos topamos nel camín, vemos como sal una clara sienda hacia la Peña La Becerrera, la cual tomamos como puntu d'ascensión d'esta ruta. Hai vegaes, que nun fai nin falta xubir montes, pero ya que taba ellí fuimos a por ella.

Desviámonos hacia l'ascensu y crestéu de la Peña Becerrera
Amás, una vegada qu'aportamos per esa sienda a l'arista, alcontrarémonos con dos posibilidaes: descender un pelín pela fastera contraria y faldiar o afrontar un guapu crestéu con dellos trepes y dalgún pasín aéreu, superando caún de los crestones hasta a aportar al puntu más alto de 1244 m.

Cumal de la Becerrera (1244 m)
Tanto los que crestiamos, como los que faldiaron hasta xubir al puntu más altu pela cabera forcadina, prestónos enforma facer esta peña que dábanos vista, a los montes de la redolada que bien conocemos d'otres rutes como la Ordaliega y la Frayada.

Baxaremos a Brañanueva a descansar enantes de siguir camín
Coles mesmes, toca baxar y póngome a restolar un descensu direutu, alcontrándolo casi dende la mesma cume. De primeres, paez mui vertical pero con un par d'envueltes, taremos en dimposición de garrar una vira que va depositanos nel suelu nun tris y ensín mayores dificultaes, qu'afitar dalguna man de sofitu.

Aportaremos con pocu más a Brañanueva, onde ya teníemos a dellos miembros del grupu xintando y xuntámonos toos a descansar un bon ratu, enantes d'encomencipiar de nuevu a caleyar, pero bona pista, hacia la Felguerina onde alcuéntrase un refuxu que ya nos gustaría tener a tolos grupos de monte d'Asturies.

Facemos el pindiu descensu hacia la Foz de Moñacos
Nin siquiera vamos facer por averános hasta ellí, ya que nun escoyimos la baxada pel monte Corvera, poro tiramos de la collada anterior hacia la mandrecha, col envís de dir conocer la nomada Foz de Moñacos.

La baxada, anque pindia, facémosla perentreteníos, acolumbrando cada requexu de la fastera de Moñacos, arrodiada por crestones que nos son familiares, como la Peñe Crespa, el Cuetón de les Travieses, el Mayáu y la propia Frayada.

Siguiremos pista abaxo pela viescona de Corvera
Pa cuando nos damos cuenta, tamos entrando y casi saliendo de la Foz de Moñacos, que tengo que dicir que ye realmente guapa y pudiera dar fin a una grandiosa xornada pa senderistes. Poder xintar el bocata, con agua na entrada la foz y nun llugar tan enmediu de la nada, faise casi imprescindible.

El por qué de completar una bona ruta senderista, ya incluso BTTera, ye polo guapu del fayéu de Corvera, el cual fadrános bien agradable'l caminar per una llarga pero guapísima pista, na que sólo podremos poner los güeyos nes milenta fayes que nos arrodien y poner la oreya escuchando los ruíos del agua munchos metros más baxo del ríu L'Infiernu.

Pararemos con calma a ver los requexos más guapos del ríu Infiernu

Baxaremos entos cola calma, sacando semeyes a tolo que nos presta, hasta de nuevu topanos col Puente Los Cubilones onde la nuesa riega que tanto tiempu nos acompañó, va marcanos qu'a partir d'equí el camín sedrá conocíu y llargu hasta la Pesanca.
A la fín, dempués de 7 hores y cuartu de prestosa ruta, aportaremos al aparcaderu con 16,5 km de percorríu y unos 1500 m de desnivel acumuláu aproximáu, pa poder tomar unes botellines de sidre al solín, cosa que casi nun vimos en tol día... nunca ye tarde dicen.
La próxima más...
Categoríes: Canal Blogues, Recomendaos

“… nel Infiernu te verás…”

Trabayu de Campu - 15 Mayu, 2017

Teníemos de guah.es una especie d’esconxuru escontra aquellos que se chivaben de dalgo que non debíen, tanto a los profes como a padres o demás “autoridaes” mayores d’edá. Yera aquello de: “Acusica Barrabás/ nel infiernu te verás/ comiendo pan y cebolla/ y yo na gloria”. Yera una especie de maldición o agüeyamientu qu’echábemos a compañeros traidores pero que, pese al nuestru enfotu al cantá-yoslo, nun creo que ficiere’l menor dañu espiritual, anque tuvieren qu’aguantar el desprestixu colexal.

El Sporting baxa, una vuelta más, y “nel Infiernu se verá”, de la Segunda División y nun podemos dicir que fuere inmerecidamente. Peor nun pue facese. Nunca tuvo a menos puntos la salvación como esti añu, nel que ya dende l’aniciu dellos equipos (Osasuna, Granada, Leganés, Depor…) paecíen decidíos a facer tolo posible pa baxar dafechu, enriestrando una derrota tres otra per tolos campos d’España. Lo que pasa ye que’l nuestru equipu xunióse a ellos, nesa carrera lloca pol descensu, siendo incapaz de ganar un partíu nin en casa, nin fuera. Los dos últimos, cuando yá cuasi too yera imposible, enmascararon un poco esi total de 5 victories en 35 xornaes con 40 goles a favor y 70 en contra. Cuntando con que nes primeres tres xornaes tuvieron dos victories, los datos del restu del añu fue un auténticu desastre, pa desesperación d’una afición que, mal acostumada, esperaba hasta l’últimu sospiru, un nuevu milagru. Pero esta vegada, el Papa taba en Fátima que tien más solera.

El descensu ya entamó a preparase nos despachos. En llugar d’intentar caltener la cadarma del añu anterior,

reforzándola con dalgún fichaxe de calidá que la meyorase, dexaron marchar a xente de valir y, amás, mui identificada col club. Nun ye que nengún d’ellos fuere un superclas, de fechu Luis Hernández fracasó n’Inglaterra y llegó de vuelta a España a abellugase nel Malaga,  Jony nin siquier fue titular nesi mesmu equipu qu’anduvo siempres nos llugares d’abaxo, y el propiu Bernardo tampoco nun xugó asiduamente nel Middlesbrough, que quedó nel puestu 19 de la Premier League, en llugar de descensu. Pero, con too, pa nosotros yeren xugadores válidos ya igual pudo facese dalgo más pa retenelos. En cualquier casu, el secretariu téunicu, esi ínclitu Nico Rodríguez, peor non lo pudo facer. Porque ye una chifladura fichar na menos qu’a 16 xugadores que, colos respetos debíos como persones, como futbolistes fueron unos maveas. Pa más Inri, bastantes d’ellos vinieron como cedíos, lo que quier dicir que, si por un casual, dalgún resultare aprovechable, pa esti añu yá nos lu llevaben. ¿Cómo xugadores asina van dar el pechu por unos colores que nun sienten?

Los entrenadores tampoco supieron facelo al dereches. Abelardo, l’últimu salvador del ascensu y el non descensu pasáu, entró nuna dinámica de derrotes na que paeció un pasmarote viendo cómo aquello s’esboroñaba ensin puxu nin recursos p’aparalo. Nin siquier supo motivar al vestuariu, cosa que sí  llogró años anteriores. El sustitutu, esi Rubi, nada meyor aportó, ensin sistema fixu, faciendo cambeos constantes d’allineación a ver si, por casualidá, sonaba’l pínfanu. De los xugadores nun pue dicise nada bueno. Cumplió Cuellar, anque con dellos fallos bultables que costaron puntos. Bien Meré, al qu’hai que curiar y caltener. Bien, l’únicu que vieno  de fuera pa meyorar que ye Mikel Vesga. Habría que facese con él, pues ye de los cedíos. Cumplidor Sergio, arrastráu polos cambeos de compañeros al so llau y les funciones a facer. Y del restu, poco o nada. Ente los cuatro delanteros centro que teníemos nun facíen unu. Esi Cop o Chop o como se llame falló más goles delantre’l porteru que si fuere miope. Petecía pone-y un cascabel al balón a ver si-y pegaba. Carmona cumplió, na fase final, meyor de lo que s’esperaba y Carlinos Castro, nel que siempres creyí, nun demostró nada nes poques ocasiones que lu emplegaron, munches fuera del so sitiu que ye’l puntu de penalty. En  fin, qu’habrá que facer un bon barríu de personal deportivu y del otru, y principiar de cero na nueva categoría. Nun val vivir del pasáu, y habrá necesitase una bona manguera pa matar el fueu d’esi Infiernu al que nos vemos empobinaos. Y de pasu… realmitir al capellán. A ver si cuela otru milagru.

Categoríes: Canal Blogues, Recomendaos

Thomas, el de la Guerra Civil

Trabayu de Campu - 11 Mayu, 2017

Morrió l’historiador Hugh Thomas, nomáu Barón pola so “graciosa maxestá” nel añu 1981 y que tuvo un percorríu abondo pendular nes sos afiliaciones polítiques (llaboristes, conservadores, lliberal demócratas…) Fue un escritor d’esos que llamen hispanistes, por dedicar una gran atención a los temes de la historia d’España. Nos años de la clandestinidá fue un paisanu mui respetáu porque publicó un llibru que munchos teníemos como de cabecera: “La guerra civil española”. Y ye que, nuna época en que los escritores del réximen teníen campu llibre pa cuntar les sos mentires partidistes (Joaquín Arrarás, Ricardo de la Cierva…) “el Thomas” -como lu llamábemos entós- fue una bocalada d’aire fresco que daba una información mui cercana a cómo se desendolcaron los dramáticos fechos de la nuestra guerra civil. Yo recuerdo aquella edición de Ruedo Ibérico qu’entovía debe andar per casa, coles tapes de cartón masuñaes de remanalu y prestalu a unos y otros. Lo demás qu’escribió nunca nun  llegó, al mio modestu talantar, al altor científicu y a la popularidá que tuvo aquel primer llibru suyu. Lo qu’escribió sobre l’Imperiu Español dende Colón a Felipe II, paecióme un “refritu” d’otros autores y coses yá superconocíes con mui poques aportaciones personales, dicho seya con tolos mios respetos.

Esti día llega l’anuncia de la so muerte, y per unos momentos recuerdólu y recuérdome naquellos difíciles años de la vida española y, polo que supunxo, nun puedo dexar de dedica-y una alcordanza pa esi home qu’introduxo una pequeña lluz ente tanta escuridá como había. Por ello, deséo-y que la tierra-y seya leve al ilustre historiador inglés Hugh Thomas.
(Semeya José Huesca)

Categoríes: Canal Blogues, Recomendaos

La Olivina del día

Trabayu de Campu - 9 Mayu, 2017

Cementeriu del Sucu: Tenemos wi fi.

Categoríes: Canal Blogues, Recomendaos

De premios y muyeres

Trabayu de Campu - 6 Mayu, 2017

Esti vienres 5 de mayu, cellebróse nel marcu siempres afayadizu del Teatru Campoamor el 38 Día de les Lletres Asturianes. Nesti día, l’Academia de la Llingua Asturiana fai una Xunta Estraordinaria, de calter públicu, n’homenax a les nuestres lletres y nel que la señora Presidenta pronuncia’l discursu institucional. Esti añu espérabase con interés el conteníu, siempres críticu y reivindicativu, de doña Ana Cano, pero ella mésma encargóse de desactivalu diciendo que nun diba a falar de la inexistente política llingüística, nin de la ruina actuación del gobiernu nel “affaire” que dexó ensin perres y a piques de camudala n’entidá privada a la propia Academia. Claro que, anque dixo que nun diba a falar d’ello, dicho quedó.

Por embargu, esti añu sirvió pal reconocimientu del llabor lliterariu del escritor Xuan Bello, reconocimientu plasmáu na entrega del I Premiu Nacional de les Lletres Asturianes, tal y como recoyó l’acta del xuráu convocáu pa tal fin y formáu por miembros de l’Academia y reputaos críticos del País. Yo considero que’l premiu ye merecíu, anque tamien lo sería si-y lu dieren a Xuan Xosé Sánchez Vicente, a  Roberto González-Quevedo, a Berta Piñán o a Antón García, los otros finalistes del mésmu. La entrega tuvo solemnidá, condecorando al premiáu con una cinta y un medallón, diseñáu por Adolfo Manzano y la edición d’un llibru conmemorativu, que recueye una seleición de la obra de Xuan Bello, llibru qu’entovía nun pude güeyar por andar mui escasos. Cuando  lu vea, opinaré. El discursu de Bello tuvo bien de llargura y conteníu, recordando los sos anicios, los amigos colos que trebeyó y el sentíu de la lliteratura nel camín de la recuperación llingüística.

El segundu tema qu’ocupó’l discursu presidencial, fue l’homenax a les muyeres como caltenedores y tresmisores de la llingua y la cultura asturianes, homenax merecidísimu y que s’encarnó nun llistáu de muyeres, fundamentalmente escritores, a les que citó y de les que, nalgún casu como nel de María Teresa González, lleó dalgún versu. Citó tamién a les muyeres que trabayen na Academia y retafiló a toles collaboradores nel últimu númberu de Lliteratura, un númberu guapísimu dafechamente fechu por y pa les muyeres. Pa la fin, intervieno’l grupu Muyeres con un resume del so espectáculu “País Malva” que la verdá, encantónos a toos y mereceríen elles soles un apartáu especial. Un espectáculu que, en cualisquier otru País, sería esportable pa representar a Asturies en tolos foros españoles ya internacionales. Guapísimo. Y este añu nun pudi quedame a la espicha de Cualloto, lo que sentí muncho pues ye otra cita obligada onde se come, se bebe y se charra colos amigos que nun sueles ver nel restu del añu. Pa la prósima t’espero.

Categoríes: Canal Blogues, Recomendaos

Veigas (Somiedu) - Picu Tarambicu

Camudando'l camín - 5 Mayu, 2017
18 de Marzu de 2017

Track: Veigas (Somiedu) - Picu Tarambicu


Tornamos a Somiedu, a fasteres más conocíes que na anterior a la Xerra de Pigüeña. Aún así, salímonos un puquiñín del camín trazáu y de los dosmiles somedanos p'ascender el Picu Tarambicu nel cordal que llevántase pente los valles de Saliencia y el Val.le.

La idega ye da-y un pelín de protagonismu al val.le de Saliencia, siempre escaecíu a la solombra d'El Val.le. Poro, vamos averanos hasta Veigas, pueblu al qu'aportaríemos dempués de la ruta en coche dende Xixón garrando l'autovía "Y" en direición Uviéu, pa siguir dempués en direición Grau pola As-63, hasta la salida de Cangas del Narcea.

Salida na redolada de Veigas (837 m)
Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu: Aguamestas. Dende Auguasmestas pasaremos pelos pueblos de Xadriz, La Riera, Recueva y Castru, onde nel banzáu de la Malva, salimos pela SD-1, entrando nel val.le Saliencia, quedándonos en Veigas.

Perpasaremos un pelín Veigas hasta la ermita de San Andrés, onde al llau del cementeriu habrá sitín pa dexar los coches. Equí prepararémonos y entamaremos a caleyar con pasu calmáu pel preciosu val.le de La L.lamera.

Xubiremos per pista hasta la braña de La L.lamera
Tendremos d'ascender per pista, primeru per un tramu más llanu hasta abandonar a la manzorga'l camín que sigue hasta El Val.le, entamando una pindia ascensión pela cuesta L.lamera hasta aportar a esta braña, que más bien ye un pueblín, con cases de gran valir arquiteutónicu.

Magar, d'echar un vistazu a munches d'elles y sacar la típica semeya col teitu, siguimos pista alantre, saliendo penriba'l pueblu n'envueltes pa dir pasando dempués pel mayáu de la L.lamera, siempre nuna constante ascensión.

Salimos del val.le La L.lamera pa xubir hacia'l Cantu la Bobia
Darréu, aportaremos a un crucie de caminos, teniendo una bona fonte onde garrar agua nun día de calor como'l que tamos esfrutando. Nós, vamos salir de frente hacia'l Cantu la Bobia teniendo que metenos per un tarrén de beriza y cotoya baxa, al travíes de la que tendremos que bregar.

A la vuelta, vimos como'l senderu veíase más claro, averándose a la paré del Cantu la Bobia, faciendo una clara envuelta hacia l'entamu del espolón y llueu xubiendo pegaín al paré. Nós, fuimos más menos como pudimos alcontrando y perdiendo restos de senderos, faciéndonos tardar pocu más d'una hora en superar los 350 m de desnivel hasta los 1705 m del colláu la Bobia.

Dende la parte alta del cordal del Tarambicu les vistes son ablucantes
Pudiera dicise que con tol desnivel ganáu a estos altores de la ruta, namái que mos queda esfrutar como guah.es, nuna especie de rasa que ye'l cordal del Tarambicu. Eso sí, una rasa ensin vistes al mar, pero con increyibles vistes a tola fastera somedana, tebergana, Penubina...

Como non, al occidente destaca'l ñevadísimu Cornón, la Penachana... al sur la Pena Orniz y los Albos
y al oriente, cumales como Michu o los Bigaros eso ensin metenos nel macizu de Penubina. Too esto, diremos descubriéndolo según avancemos nun continuu xubir y baxar pente pequeños foyos, l.lombes y machaes, con vistes a un lláu o al otru según nos vayan llevando los senderos.
 
Avanzamos pel cordal alantre a la gueta del cumal del Tarambicu
Según vamos avanzando cordal alantre, pasaremos per llugares como la boca Rodrigueiru que da entrada al val.le del Reguerón, el macháu del Bustil.lu y muncho más alantre, entraremos na fastera del Tarambicu onde entamamos a alcontrar buelgues d'osu ensin xacíu dengún.

Tal paez que tuvieren de folixa varios bardiones porque les buelgues diben en cualesquier sen. Siguimos como fatos cola vista puesta en tolos requexos d'esti cordal nun vaya ser que tengamos la suerte y aportaremos a la machada Tarambicu (1860 m) magar de casi 4 hores y media.

Caberu tramu pente la machada Tarambicu y el picu Tarambicu

Taremos un ratín echando un vistazu a les cabañes de la machada, sobretou a la más antigua circular y metémonos nun tarrén estrao de peñes y pequeñes aguyes que dan la sensación d'introducinos nun cementeriu d'elefantes, hasta salir penriba d'elles per una panda y encumar los 1912 m del Tarambicu.

El día ye impresionante, con bona temperatura, un cielu claru y les vistes dende esti cumal son de primera, amestándo-y a los milenta cumales comentaos enantes, la meyor visión esistente de la enorme Veiga de Camayor.

Semeya de grupu nel picu Tarambicu (1912 m)
Taremos cuarenta minutinos descansando y esfrutando d'esta fastera tan increyible, hasta que toca poner a la xente a caminar de nuevu, descendiendo primero del Tarambicu y más tarde teniendo que decidir per que vallina queremos adentranos.

Siempre llevo milenta planes B y C preparaos, pero según vamos baxando en direición al Val.le, tenemos un par de vallines bien marcaes, llevándonos la de la mandrecha hacia la Veigarrionda y la de la manzorga a conocer un de los llugares más guapos, tranquilos y totalmente recomendables de Somiedu: la l.laguna Fuentes.

Seguimos camín descendiendo del Tarambicu
Nun podía ser d'otra manera, teníemos que dir conocela y garramos el senderu, siempre bien marcáu que diba facenos dexar a la nuesa manzorga los cumales ñevaos de los Estacos, per onde una buelga d'osu baxa invitándonos a ascendelos o a colar d'elli por si lu tenemos cerquino.

Siguiremos alantre hasta un colláu onde tendremos la visión d'esti llugar tan máxicu como ye la l.laguna y veiga de Fuentes. Dende riba, la visión ye guapísima, con una l.laguna de bon tamañu, asitiada embaxo d'un crespón prietu ñeváu.

Tramu preciosu dende la L.laguna Fuentes y la Veigarrionda
Fadremos una bona envuelta pa descender hacia la l.laguna y tirámonos un ratín nel prau, non pudiendo facer otra cosa que relaxanos y casi echar un pigazu nos sos praos. Magar del descansu tendremos qu'ascender unos metrinos pa salir per una forcadina hacia otra veiga brutal: la de Veigarrionda.

Los güeyos nun paren de mirar en tola redolada y el mió maxín nun para de dar vueltes trazando llinees pelos qu'ascender toos estos cumales, pudiendo conocer más requexos increyibles d'esti cordal, ya que de xuru hai ayalgues en forma de vegues o llagunes que conocer.

Siguiremos camín hacia la Braña La L.lamera pa descender al val.le L.lamera
Casi con pena, vamos dándonos cuenta que tolo nuevu ta finando y el nuesu camín avérase a siendes conocíes. Perpasaremos Veigarrionda y meterémonos nun senderu preciosu que dexa'l picu Mustachén a la manzorga, pa de secute, metenos nos Campos de Bobias y a lo postreru na braña L.lamera.
Esta braña con dalgunos teitos en perbon estáu será la última postal del día y l'últimu llugar nuevu que conocemos, ya que dende equí baxaremos hasta'l nuesu crucie de caminos onde delles hores enantes entamábemos l'ascensión pela vallina de Bobia.
Pueblu de La L.lamera dende la so braña d'altor
Xusto enantes de zarrar la circular, toparémonos con una bona fonte onde refrescámonos y recuperamos llíquidos ya que'l calor pasónos factura y dexáramos escoses les cantimplores. Dende equí, namái quedaba descender hasta'l pueblu de la L.lamera y siguir pista alantre hasta Veigas.

En resume... ruta interesantísima, cola qu'algamamos conocer una fastera pente los dos val.les que muncha xente escaez por nun tener grandes cotes de dosmil metros, pero na que la ganadería, les vegues y les l.lagunes menos conocíes suplen con creces les ascensiones montañeres.

Pa conocer llugares d'ensueñu... tan sólo 18.4 km de percorríu y 1515 m de desnivel tendrán la culpa de facenos esfrutar durante unes 8h y 20 minutinos y de xuru que quedamos con ganes de más monte y más Somiedu.

Camudando'l Camín en Somiedu
Categoríes: Canal Blogues, Recomendaos

La Olivina del día

Trabayu de Campu - 3 Mayu, 2017

Yera un mal metereólogu: nun soportaba les altes presiones.

Categoríes: Canal Blogues, Recomendaos

“Los gavilanes”

Trabayu de Campu - 29 Abril, 2017

Tocóme plancha. Y colo del Sporting en Villarreal nun tenía yo gana de muncha folixa. Asina que punxe nel CD una de les zarzueles que más me presta, o meyor dicho, la que más: “Los  gavilanes”, con música del maestru Guerrero y un prestosu llibretu de José Ramos Martín. Pal que nun la conoza, que serán pocos, trátase d’una historia qu’a los asturianos píllanos mui de cerca: la emigración. Juan, el prota, vuelve de facer les amériques ricu y poderosu, como él mesmu canta, al so pueblu de nacencia. Una villa marinera que bien podría ser Llastres, Tazones, Cuideiru o cualquier otra de les nuestres. Ellí alcuéntrase colos vieyos amigos y los sos descendientes y entre ellos Adriana, el so amor de mocedá a la que dexó pa dir en cata de fortuna. L’alcuentru de los dos antiguos namoraos ye mui señaldosu: “Dulces recuerdos/ de nuestra infancia/ hoy al mirarte/ vuelven a mí…” dirá Adriana. Juan vien dispuestu a emplegar parte de les sos perres n’ameyorar al pueblu y los sos habitantes, talo que ficieron munchos indianos n’Asturies: escueles, traídes d’agua, xardinos… y esti pueblu canta gociosu al fíu que marchó y torna millonariu. ¡Pero hai, amiguinos! Juan conoz a Rosaura, la fía que tuvo Adriana y que agora nun tien padre, y anque ye cuasi una guah.a, namórase perdidamente d’ella. Al puntu que si nun ye a casase con ella, de les perres nun hai nada dicho. ¡Menuda presión pa la moza y pa so madre! El pueblu, peseteru, lo que quier ye que Juan dexe ellí les perres, o seya que la cosa ta qu’arde. Bueno, nun cuentu’l final por si dalgún entovía nun la vio y anímase.

La versión que yo tengo ye estraordinaria. La grabación orixinal ye de 1952, anque la copia remasterizada ye de 1995, poro, los editores, con bona vista comercial ponen nel repartu, en primer llugar, a Teresa Berganza una de les meyores sopranos del mundu. Un poco engañu, pues la Berganza interpreta a Rosaura que tien un papel mui pequeñu. Los verdaderos trunfadores de la obra son, en primer llugar el gran barítonu Manuel Ausensi, plenu de voz y bon gustu, que fai un Juan inmeyorable. Y xunto a él, Toñy Rosado, una soprano poco conocida pal gran públicu, que tamién fai una Adriana xenial. El tenor Carlos Munguía, qu’interpreta a Gustavo, el mozu de Rosaura zarra’l repartu con bona voluntá y ensin desmerecer, anque con esa guapísima voz de Manuel Ausensi dante ganes de que seya ésti el que se case cola mocina. La orquesta diríxela otru grande: Ataulfo Argenta y los Coros Cantores de Madrid, el maestru Perera. Total, que petecíame tener otra colada entera pa siguir planchando, pues dábame pena tener que la interrumpir. En fin, el tercer actu, pa otru día.

Categoríes: Canal Blogues, Recomendaos

La Olivina del día

Trabayu de Campu - 26 Abril, 2017

Faciendo una escavación nel metru de París, alcuentren el cadabre del Partíu Socialista Francés. Taba momificáu.

Categoríes: Canal Blogues, Recomendaos

Pombayón (Ponga) - Picu Canellín

Camudando'l camín - 26 Abril, 2017
11 de Marzu de 2017

Track: Ponte Pombayón (Ponga) - Picu Canellín


Alcuérdome siempre del picu Canellín por varies razones. Una d'elles fué entrugame Carlos, qu'onde taba, ya que salía nel famosu llibru de los cien montes d'Asturies y nun tenía daquella mui claro onde andaba.

Llueu, tamién costaba alcontrar información amañosa p'ascendelo, hasta que los collacios de los de las Claras, sacaron una circular bien prestosa, na que sacante del propiu picu en cuestión, lo más importante como casi siempre yera'l percorríu.

Poro, cola ruta marcada na llibretina de pendientes, tocaba tener la oportunidá de facela y dempués de que na Xuntanza de la temporada pasada, na que'l tiempu nun mos dexó facer lo planiáu, tuvimos que reservala pa otra vegada y al fin tocó poder conocer el Canellín y la so redolada.

Semeya de grupu penriba nel Monte Cuevu (625 m)

Pa ello, facemos la típica tirada en coche dende Xixón hasta Lloviu pela Autovía'l Cantábricu, pa siguir pela N-625 hasta Cangues d'Onís onde empobinámonos hacia los Beyos pasandopelos pueblos de Cañu y Tornín, cruciando la ponte Dobra, pa entrar nel conceyu d'Amieva, onde perpasaremos los pueblos de Miyares, Corigos, Pervís, La Vega Pervís, Santiyán, Precendi, Campurriondi, Vega de Cién y Ceneya aportando a la ponte Pombayón, que crucia'l Seya y que sírvenos de referencia p'alcontrar aparcaderu.

Na realidá, vamos aparcar a la fin, pelín más alantre d'otra ponte que llibra la riega la Redonda, nomada como la de Rilluengu. Dexaremos el coche nel aparcaderu y tiraremos caleyando dellos metros la ponte, pa xusto enantes de la curva, garrar un pindiu senderín nomáu como'l camín del Llacigón que nos introducirá na guapa viesca de Cuevu.

Travesamos el monte Cuevu pel Camín del Llacigón y salimos hacia'l seu la Cruz del Picu
Pa los que nun lo conocen, sorprenderá-yos la guapura d'esti fayéu, asína como'l pasu pela Forcada de Redonda y la posterior visión d'un tabayón de la riega, onde alcuéntrase un llugarín preciosu, con ponte pa cruciar la riega Redonda y una poza onde caye l'agua, faciendo una postal de cuentu.

Tuve la suerte de conocelo baxando del H.ucantu y sabía que diba encantá-yos al grupu, asína que tomamos estos pasos con tranquilidá, pasando pela mayada Redonda y metiéndonos dafechu nel tramu más duru y pindiu del día, col envís de salir hacia'l Seu la Cruz del Picu.

Xubiemos el Seu la Cruz del Picu pa descansar en Baenu
Dicir que la xubida pel monte l'argayu d'Entrecueves fízose menos enguedeyósa que cuando la descendimos nel H.ucantu y sacante na fonte onde entama'l pedreru ye bien cenciella de siguir. Poro, más apriesa de lo camentáu, plantámonos na llerona y llueu ficimos el seu La Cruz ensín mayores hestories, pa descansar un bon ratu nel guapu mirador que ye Baenu.

Casi colo más duro fecho y magar d'un triagu d'agua y picar dalgo siguimos ascendiendo penriba de les cabañes de la Canga, per tarrén amestáu hasta aportar al Cuetu'l H.o, onde entamará un caleyar relaxáu y preciosu per un fayéu d'ensueñu. 

Salimos del Cuetu'l H.o per un fayéu hacia la cimera'l monte
Tomámoslo con calma, el día nun da intenciones de ponese malo, asína qu'esfrutamos de cada pisada pel fayéu, agüeyando cada detalle de la viesca ya sea los tueros vacíos de fayes, fayes tumbaes a mou de cañicón o antigües trincheres qu'amuesen l'arte de la guerra nun llugar perfeutu pa la emboscada.

Aportaremos a la fín a la parte alta del monte, onde empobinarémonos per senderinos hacia la cumera'l monte, faciendo'l picu Los Cuchillones (1153 m) como primer ascensión del día, col envís d'acolumbrar tolos grandes montes que nos arrodien... pero tamos nel pior día del añu pa les vistes.

Ascensión a los Cuchillones (1153 m) con cero vistes
Ye la realidá, un par de díes d'incendios ensin xacíu n'Asturies y tamos envueltos nun borrín gafientu, que güel a fumu y a muerte peruquiera que nos movamos. Con esti percal, nun mos paramos muncho a descansar y descendemos de los Cuchillones hacia'l Pozu L'Armada.

Baxaremos a pinchu penmediu d'otru fayéu bien guapu, que nos dá momentos divertíos per delles vallines hasta topános nun h.ou llamargosu onde alcontrámonos col Pozu L'Armada que lloñe d'animar a averase a ver lo profundu que ye... anima a escapar viendo como la tierra y la fueya resbaria hacia'l so gargüelu.

Baxamos hacia'l Pozu L'Armada pa siguir hacia'l Picu Canellín
Dexamos atrás esti furacón y ascendemos la llampa que va llevanos al crestéu final hacia'l Picu Canellín. Tengo lleíu que si yera un pocu aérea en dalgún sitiu, pero namás lloñe de la realidá, ya que siempre va protexía pela manzorga y nun tien dengún pasu aéreu sacante que t'arrimes a la mandrecha penriba la canal del Canellín, caberu'l cumal.

Poro, nun vos esmolecer que ye cenciella y el cumal nun día curiosu non, como'l nuesu, tien unes vistes d'acoyonar tanto pa los Beyos, como pa los montes de Ponga y Casu, como pa los d'Amieva, como pa los cumales occidentales del Cornión... y así hasta la fartura... ye un mirador ablucante, esti Canellín.

Picu Canellín (1108 m) y les sos vistes grandioses depende'l día jeje
Llueu de xintar el bocata, abandonamos el Canellín, pel mesmu crestéu hacia'l pozu L'Armada, onde lo normal sería averáse al colláu H.oniella y baxar peles cangues del Valle a garrar el camín del Carbón, pero nós, vimos una amplia vallina que daría accesu hacia la pindísima Canal del Canellín y tamién a la viesca que baxa hacia'l camín del Carbón.

Como non, siguimos esa amplia vallina que tanto nos llamaba, hasta topanos cola boquera que daba como non, a una pindísima viesca. Nun quiero saber como baxa la canal del Canellín, pero esta viesca tamién tien lo suyu, asina que con calma vamos faciendo envueltes per onde paez más pisáu, hasta facer un últimu pasu más vertical pa garrar el nomáu camín del Carbón.

Baxamos a fueu hacia'l Camín del Carbón
Una vegada que plantámonos nesti camín, con bona caxa en munchos momentos, descenderemos apriesa peles sos llargues envueltes, sobretou na primera parte, ya que la viesca ye pindia enforma y na parte final el tarrén faise más amigable y el camín piérdese un pocu, anque les marques marielles nos árboles van siguir guiándonos hacia'l mayáu de Llirimundi.
Ye un parte perguapa de la ruta, na qu'esfrutamos d'un fayéu, el del Teyéu, nel que sacábase carbón vexetal d'ehí'l nome y que poquín a pocu si nun-y vamos dando uso los montañeros, acabará por perdese como tou nesta Asturies del Paraísu Matorral.
Descendemos de Llirimundi per pista hacia Valderañes
En Llirimundi, garraremos una pista, qu'hasta agradezse un pocu pa caleyar cola calma y con pasu ampliu. Destaquen les guapes vistes de les cabañes col picu La Corona detrás y col pueblu d'Amieva nel valle pente esti el cordalín d'Amieva.

Nun será mui llarga la pista y abandonarémosla, saliéndonos a la manzorga per un ampliu camín d'entamu, que tórnase nun senderín que baxa direutu penmediu'l valle de Valderañes, hasta aportar a les cabañes de les Teyes.

Vamos siguiendo caleyos mediu perdíos peles Teyes
Aquí salímonos pela mandrecha d'estes, pa siguir mediu pela riega, mediu per senderu pente la viesca, hasta qu'alcontrámonos con un crucie. Dicir crucie, ye dicir muncho, porque salen senderos pa tolos llaos y equivocase ye lo mas cenciello.

Agora, diría que lo ye meyor siguir de frente con tendencia a la mandrecha p'aportar a Rañes y ellí buscase la vida hasta alcontrar la entrada al camín de la Llorea'l Beyu. Pero nós, a sabiendes que dende Rañes costaba muncho alcontrar el camín pa enllazar, fuimos a la gueta d'un pocu d'aventura.

Metémonos nuna riega dafechu perdía p'aportar al camín de la Llorea'l Beyu
Y cuando vas a l'aventura que t'alcuentres? Pues broza a esgaya, nun tarrén qu'a tramos tornóse malu enforma d'andar. Aún así, fuimos empobinándonos per una riega correutamente per onde meyor fuimos viendo, hasta descender un pequeñu tramu más ampliu, onde alcontramos dalgún finxu y traces de camín.

Llueu, mirando con más calma, vimos un par d'opciones de senderu que veníen de Rañes de xuru: unu travesaba un bardial estráu d'escayos que paecía un infiernu d'atravesar y l'otru venía más embaxo per un tarrén de peñes con mofu y árboles cayíos hasta dar col senderu de la Llorea'l Beyu.

Esfrutamos d'esti camín colgáu con tola tranquilidá
Ya metíos n'él, llegó'l tiempu d'esfrutar d'estos caminos que tan sólo'l maxín humanu tien a bien facer, con armadures de madera penriba de vaos nos tabayones o armadures de muria que llevanten varios metros.

La inxeniería pastoril d'esti camín colgáu ye ablucante y dedicámonos namái qu'a caleyar con calma viendo'l ríu Seya munchos metros pembaxo nueso. De primeres tendremos la parte más zarrada pola broza, amestándose a les armadures más increyibles y los pasos más colgaos onde hai que poner tolos sentíos.

Increyible la construcción de los pasos penriba los Beyos
Más tarde... el camín abrirase y continuará colgáu so la carretera Los Beyos, avanzando peles falderes del Canellín dando vista a les milenta canales que xuben hacia los altores. Pela cueta, mirar p'abaxo ye necesariu pa nun tirar piedres ya que diría pa la carretera pudiendo facer una bona avería a los coches, asina que sollertes al caminar.

L'únicu pero... a esti maraviyosu camin de la Llorea'l Beyu ye que vamos dir acompangaos pela rede llétrica, fadiándonos toles semeyes de Los Beyos y quitando un puntu de guapura al percorríu. De toes formes, ye imposible nun dir pasándolo pipa durante tou esti tramu de la ruta.

Acabamos aportando a la carretera pa tornar hacia Pombayón
Ensin más, tolo bono va finando y pali pali vamos averándonos de nuevu a la ponte Pombayón, baxando de nuevu a la carretera, nun tramu final nel que tenemos que tener munchísimu curiáu ya que les lleres dexen les piedres nel camín a puntu caramelu pa tirales a la carretera.

Pisando l'asfaltu, namái que tendremos que siguir hasta'l coche según nel apartaderu que lu dexáramos completando una ruta circular perguapa de 11 km, na que superamos un desnivel positivu de 1190 m nun total de 7 hores y 35 min.


Despedímonos de los Beyos hasta la próxima...

Camudando'l Camín nos Beyos
Categoríes: Canal Blogues, Recomendaos

España y Europa: dos proyeutos n’obres

Trabayu de Campu - 24 Abril, 2017

A estes hores entovía nun finó’l recuentu de los votos de les eleiciones presidenciales en Francia. Paez mentira pa ellos, que gasten tantu cuentu de modernidá, y los resultaos definitivos tarden en salir muncho más que n’España que siempre nos tuvieron por unos “chepos”.  Ye igual, persabemos, per tierra, mar y aire, que los candidatos que pasen a la segunda vuelta son Emmanuel Macron y Marine Le Pen. La derecha de Fillon fue derrotada mui nidiamente y los socialistes… estrapallaos. A destacar el bon papel fechu por Mèlenchon, del partíu (o como se llame) de Francia Insumisa, que con cuasi un 20% del total de los votos va a dar que falar nun futuru prósimu. Nesti casu les encuestes acertaron y nun hubo sorpreses.

Cuesta trabayu almitir qu’un partíu d’estrema derecha, como’l de la fía del nazi Jean-Marie Le Pen, tea disputando’l primer puestu nes eleiciones d’un país que tantos intelectuales comprometidos dio y cuya clas obrera, y los sos sindicatos, fueron vanguardia de les reivindicaciones más izquierdistes. Ensin embargu, voten agora mayoritariamente a esa paisana insolidaria y retrógrada. Ta claro que dalgo se ta faciendo mal, por parte la Xunión Europea, cuando tanta desafeición esiste ente grandes mases de xente en tol continente. La suba de los partíos d’estrema derecha en llugares onde antes yera impensable, lo amuesa. Y esos mensaxes simplistes de que “el malu ye l’otru, el de fuera, l’estranxeru”, tán afondando na mentalidá de munchos porque la Comunidá Europea ta más fecha pa les empreses y los grandes capitales financcieros, que pa los ciudadanos europeos. ¿Quién manda, daveres, nes instituciones europées? Munchos, dende llueu, nun nos sentimos representaos.

Coinciden estes eleiciones franceses con unes declaraciones del ínclitu Pedro Sánchez, un de los triunviros socialistes, que quier reescribir la Historia depués de fracasar cuando tuvo la oportunidá d’escribila al dereches. Agora diz, pa pastu de catalanes y correlixonarios del PSC, que Cataluña ye una nación y qu’hai que facer d’España una “nación de naciones”, conceutu que, en boca d’otru, tendría un claru sentíu. Pero agora ye increyible, o seya, que nun podemos creyelu, viniendo d’un de los partíos más centralistes que tenemos. Entovía n’Asturies nun respeten la nuestra identidá y  agora quieren que seamos “nación de naciones”… A nun ser que les “naciones” fueren Cataluña y el Restu d’España, como esos partíos de fútbol que se xueguen nes fiestes del pueblu.

En fin, que depués de tantos años (sieglos) paez que nin España, nin Europa alcuentren entovía acomodu políticu, polos egoismos de dalgunos, y la falta de mires d’otros. Y esa inestabilidá ye la que xenera gran parte de les convulsiones que tán sufriendo una y otra. Gana Macron, xube la Bolsa, y too sigue como taba. Anque nada ta como taba.

 

Categoríes: Canal Blogues, Recomendaos

Ex libris

Trabayu de Campu - 21 Abril, 2017

Títulu: “La amiga estupenda”

Autora: Elena Ferrante

Traducción: Celia Filippeto

Editorial: Lumen

Añu: 2012

DOS AMIGUES XENIALES.- Esta novela ye la primera d’una tetraloxía que tien a dos especiales amigues por protagonistes. La so rellación, nel entornu míseru y abigarráu del Nápoles de posguerra, ye’l filu conductor d’una historia que, ensin embargu, podría desendolcase n’otros munchos contestos europeos. Porque esi barriu onde asoceden los fechos narraos, nun nos suena diferente al de cualquier otru país que pasare poles fames y miseries que arrastra una guerra. Nin la composición social ye muncho estremada de la qu’equí se nos ufierta. Un microcosmos enllenu de pequeños tallerinos, d’artesanos, de tenderos… Asina l’autora siéntese obligada a poner, como nes antigües noveles de misteriu,  un pequeñu entamín onde desplica los personaxes que llueu van salir: El zapateru y la so familia, el charcuteru, el conserxe, el carpinteru, el ferroviariu-poeta, el verduleru, el pasteleru… Nun facía falta, bien ceo vamos dir conociéndolos sobradamente.

Ente toos ellos, viven y suañen Lila y Lenú, eses dos amigues tan distintes, pero tan complementaries, que caltienen una estraña rellación de dependencia que dura tola novela, pese a les distintes vicisitúes poles que van dir pasando ca una d’elles. La so amistá colos amigos de la pandilla, el colexu, los maestros, los mieos infantiles, l’espertar de la xuventú… Too ello espléndidamente cuntao con una prosa cenciella, como correspuende al tonu personal de la narración, pues ye una de les dos amigues la que fala en primer persona, anque dalgunes reflexones de les que se faen paecen propies d’una persona de más edá. Total, quédase un con ganes de siguir lleendo les prósimes entregues d’esta serie qu’apunten mui alto.

Un par de notes pa finar. La primera sobre l’autora: Elena Ferrante ye un alcuñu. Pero non como esos que, anque firmen con otru nome, sábese dafechu quién ta detrás. Non, naide lo sabe. Baráxase, inclusive, la posibilidá de que seya un paisano. Dame igual. A la hora lleer hai que prescindir de los nomes, de les crítiques y hasta de los prólogos que yá t’empobinen nun determináu sentíu. Lleer y sacar conclusiones propies, eso ye lo que procuro facer siempre, anque’l boca oreya tamién funciona, claro. Otra nota: El títulu n’italianu ye “L’amica geniale”. Nun sé por qué motivu la traductora escoyó la pallabra castellana “estupenda”. A parte que tien otres connotaciones distintes, queda claro que-y va muncho meyor el “genial” del orixinal. Per otru llau, la semeya de la portada tampoco nun-y fai nengún favor a la novela. En fin.

Categoríes: Canal Blogues, Recomendaos

La Olivina del día

Trabayu de Campu - 17 Abril, 2017

El mélicu que nos dexa les tripes más curioses ye’l mélicu interiorista.

 

Categoríes: Canal Blogues, Recomendaos

Pallabres pa María Moliner

Trabayu de Campu - 15 Abril, 2017

Pallabres, porque fue lo qu’ella acuñó a lo llargo de la so vida: como bibliotecaria, como collaboradora na Institución Llibre d’Ensañanza y nes Misiones pedagóxiques, como autora única d’un gran diccionariu que yá se conoz pol so nome: El María Moliner. Un llabor de más de quince años, ella sola, con mínimes ayudes y ensin el sofitu de nenguna entidá oficial. Faciendo unes fiches pequeñes, escrites a mano (daquella nun había ordenadores pa estos menesteres), clasificando, corrixendo, dexando la vista y la paciencia na composición de lo que fue la so obra magna, la que la enxertó pa siempres na Historia.

Agora, 38 años depués del so fallecimientu, la realizadora Vicky Calavia, maña como ella, presenta un documental que recueye lo más importante de la so vida, too ello alrodiu de les pallabres. Pa ello, entrevista a un piñu d’autores de dambos sexos que tán rellacionaos cola Real Academia Española de la Lengua. Una Academia que cometió, nel so día, un erru monumental al nun almitir a doña María Moliner ente los sos miembros. Bien ye verdá que la presentación fízose un poco “a la tragala” y ensin tiempu pa preparar el momentu más afayaízu, pero tamién ye verdá qu’ente los miembros de l’Academia había una gran misoxinia y costaba abrir el camín pa les muyeres académiques. El so rival, un Alarcos bastante mocín entovía, tuviere tiempu sobráu pa ingresar na institución, ensin arrampuña-y el puestu a la gran lexicógrafa. La Moliner, nunca más quixo que la volvieran a presentar y siguió faciendo lo de siempre na solitú de la so casa. Trabayar coles pallabres.

De too  ello fala’l documental de Vicky Calavia, coles voces de xente que la conocieron, la valoraron y la quixeron, ente elles la de la so fía, y otres que nun la valoraron tanto, como’l bocazas de Camilo José Cela, que votó en contra porque’l diccionariu nun contenía “palabrotes”. En fin, un actu interesante y emocionante, mínimamente empañáu pol calor saharianu que teníemos na sala de conferencies del Antiguu Institutu, que fizo que muncha xente, ente ellos nosotros, nun quedáremos al coloquiu. A ver si son a igualo enantes de que la sala quede vacía, eso nun hai quien lo aguante.

Categoríes: Canal Blogues, Recomendaos

¡Feliz Aniversariu de la República!

Trabayu de Campu - 14 Abril, 2017

Anque la II República supunxo sangre, sudor y llárimes, fue un saltu hacia alantre pa romper con tantos cures, militares y súbditos, y convertinos en Ciudadanos. La esperiencia nun salió bien, pero hai que lo intentar de nuevo. Too enantes de siguir aguantando a los Borbones. Un desastre pa la nuestra Historia. ¡Viva la República!

Categoríes: Canal Blogues, Recomendaos

Pages