Recomendaos

La Selmana Negra: un sacu ensin fondu

Trabayu de Campu - 27 Marzu, 2017

Talamente paez que perdieron l “oremus”. Lleo con asombru l’enorme pufu que tien la famosa Selmana Negra con Facienda y con otros acreedores y paezme imposible sentir lo que toi sintiendo. Estos señores que, pese a ser una entidá privada, lleven tropecientos años cobrando subvenciones de les arques públiques: Ayuntamientu, Principáu… pretenden iguar los sos problemes económicos a costa nuestra. Asina, tienen la ocurrencia, por nun dicir desvergüenza, de pidir al ayuntamientu de Xixón que cuasi dupliquen les perres que-yos vienen dando. Ye dicir que nun-yos paecen abondo los 100.000 euros que cobren añalmente de subvención municipal, sinón qu’agora quieren cobrar 180.000 pa asina, dicen, solucionar los sos problemes. ¿Pero en qué País creen que viven estos señores? ¿Paez-yos normal sufragar con perres públiques les sos aventures económiques? ¿La so malísima alministración?

Asina, dalgo que comenzó siendo un xuguete pa los dirixentes socialistes d’otra dómina (Tini Areces, Mapi Felgueroso…) que sacaben semeyes y tomaben copes col inventor del chiringo, aprovechando pa criticar y reíse de “la derechona” de la ciudá que nunca nun diba a gobernar equí, acaba camudándose nun sacu ensin fondu qu’amenacia con llevase una parte abondosa del presupuestu xixonés, que tendría de correr agora colos pufos qu’estos señores van dexando nun llau y n’otru.

Dende va tiempu voi criticando esta feria de la cutrería, del churru aceitosu, de los desperdicios enllenando los suelos, del alloriu d’unes músiques al altor de la llocura, y de les pelees de madrugada (dalgún miembru de seguridá del  recintu dixo qu’aquello yera una ciudá ensin llei, como nel Far West) que, cola sida d’un llabor cultural y unes cuantes presentaciones, que podíen facese perfeutamente n’otru contestu, añu tres añu funde nuna sola selmana lo qu’otres entidaes culturales nun ven nin en diez años. Yo creo que yá tuvo bien. Nun sé si esa Selmana Negra tuvo sentíu dalgún día, pero la ciudá de Xixón nun pue permitise’l lluxu de siguir calteniendo un esperpentu ruinosu que, cola disculpa de ser d’izquierdes, de xéneru, de númberu o internacionalista, perdió ya l”‘oremus” va munchu tiempu. A min que me borren.

(Semeya El Comercio)

Categoríes: Canal Blogues, Recomendaos

La Olivina del día

Trabayu de Campu - 27 Marzu, 2017

En Cataluña habría que facer un Referendum pa ver si quieren facer un Referendum.

Categoríes: Canal Blogues, Recomendaos

Trail Cabeza L'Arcu (Casu)

Camudando'l camín - 27 Marzu, 2017
19 de Febreru de 2017

Track: Trail Cabeza L'Arcu (Casu)


Web del Trail: Trail Cabeza L'Arcu (Casu)

Clasificaciones: Clasificaciones 2017  


Primer añu del trail Cabeza L'Arcu nel pueblu casín de Caliao y digo primer añu que se fai, pero toi seguru que nun va ser l'últimu porque ye una carrera increyible pa esta dómina del añu. Hai que dicir que'l día ayudó munchísimu, fresquín pero soleyeru y con unes vistes de diez, lo que fizo que'l percorríu conocíu per montañeros avezaos fuera más guapu si cabe.

Semeyes increyibles durante la carrera
La carrera va totalmente pel PR de la Cabeza L'Arcu y por tanto tien la guapura asegurada xubiendo pelos Arruos, ascendiendo hasta la collada l'Arcu y baxando pel valle Xulió. Nesti día, con un pocu ñeve na collada y muncha agua peles riegues fizo qu'esta carrerina de 14 km quedara pa l'alcordanza.

La xente del GM Xuan de la Borrina
Personalmente, disfrutela munchísimu, ya que dempués d'un par de carreres nes que salí demasiáu rápidu y llueu llegué pelín petáu de pates pa l'ascensión, esta vegada tomelu con calma y fuí ganando posiciones poquín a pocu na xubida pa baxar a saco como nunca lo ficiera hasta la posición 26 de la xeneral.

Los "petates" del roco dándolo too per Casu
Aparte de resultaos, fué un gran día con munchísima xente conocío corriendo pel parque de Reres como fueron los allegaos al GM Xuan de la Borrina, el Asgaya Team o los collacios d'escalada qu'animáronse a correr esta vegada y pasáronlo en grande.

Col Asgaya Team dempués de finar la carrera
Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Gilber, Agus Camino, Francisco Poli, Lastra, Trece Fotografías, Club Correr Asturias, Malgor,...)
Categoríes: Canal Blogues, Recomendaos

“Divertia” nun nos divierte

Trabayu de Campu - 24 Marzu, 2017

Nun soi a atalantar mui bien pa qué sirve eso de “Divertia”. Sí, yá sé que se trata d’una empresa municipal que s’encarga de cultura, festexos, turismu y otres mandangues al rodiu d’ello, lo que quiero dicir ye que nun-y veo un sentíu a la cosa. Nuna ciudá como Xixón, que nun ye Nueva York, tenemos yá una conceyalía de “Educación y Cultura”, al mandu de doña Montserrat López Moro y “sus boys”, y tenemos otra conceyalía de “Turismo, Deportes, Festejos y Juventud”, a cargu de don Jesús Martínez Salvador y los suyos. Amás d’ello, funciona tamién una “Fundación Municipal de Cultura, Educación y UP”, colos sos propios cargos y participación de toles fuerces municipales, y un “Patronato Deportivo Municipal” tamién col so organigrama propiu. Y un, o seya yo, que ta un poco fartu de les perres que se gasten provinientes de los nuesos bolsos, diz inxenuamente: “¿Oiga, nun ye de sobra con too esto pa xestionar les cuatro coses que se faen na nuestra ciudá?”. “¿Qué sentíu tien crear esi otru “mamotretu” pa duplicar les mesmes funciones yá axudicaes a otros organismos? Nengunu. En llugar de simplificar burocracia, eliminando duplicidaes, lo que se fai  ye lo contrario, siguir creando entes que nun son necesarios pa gastar perres y xestionar peor.

Agora’l “mamotretu” echa les cuentes y enterámonos de que l’Ayuntamientu ( o seya nosotros) tuvo d’apochinar en  primer instancia 7 millones d’euros, en segunda  una estraordinaria de 278.000, y en tercera otra más estraordinaria de 1.054.000. El Déficit del añu anterior, 2015 fue, según LNE, de 8,8 millones. Dizse qu’hubo aforru. Yo non lu veo la verdá. Y dizse tamién -dizlo Foro- que pese a esi supuestu aforru ello “no supuso  ninguna merma en la actividad llevada a cabo”. Lo cual nun ye n’absoluto verdá porque tovía ta caliente’l cadaver de la International Opera Studio a la que, por rebaxa-y les ayudes de de 50.000 a 15.000 euros, tuvieron que marchar de la ciudá, eso por poner un exemplu reciente.

Ocurre lo que suel ocurrir nestos casos: que’l dineru presupuestáu pa coses culturales queda, mayormente, pa financiar a los funcionarios que lo lleven. Yo pienso que d’un presupuestu de, por exemplu, mil euros, deberíen empobinase pa coses culturales 900 y los otros 100 pa la xente que los organiza, pero abúltame que la proporción ye la inversa: queden 100 pa la cultura y 900 pa los encargaos de facelo. Pamidea, esa Divertia va a acabar subcontratando, si non lo fai ya, con otres entidaes festivo-culturales pa que faigan les coses, y asina, de “mamotretu en mamotretu”, cada vuelta gástase más en facer menos coses. La famosa teoría de la pirámide invertida de Xuan Pintueles. Pues, sinceramente, a min eso de Divertia nun me divierte nada.

 

Categoríes: Canal Blogues, Recomendaos

Sobrevil.la (Teberga)

Camudando'l camín - 24 Marzu, 2017
18 de Febreru de 2017

Sábadu con un día murniu enforma, onde l'orbayu y el fríu son el calter principal nel ambiente, aún así, los atrevíos trepamuros deciden dir hasta Murotecho en Teberga. Como nun lo conozo, garro a Kíla ensin madrugar res y tiro tranquilamente hasta valle del Trubia.

Esti seutor ta penriba del pueblu de Sobrevil.la onde va unos añinos ficiera l'ascensión a la Pena Sobia y a la Siel.la. Esta vegada nun voi de monte y si a trepar un ratín, pero como nun conozo'l camín correutu p'aportar al seutor tiro hacia la canal de la Faya ya qu'a la so manzorga veo la muria de Murotecho.

Como voi con Kíla y tien ganes de corretiar pel monte, tómolo con calma y tiro d'intuición aportando a la parte alta del pueblu, xusto na baxera de la propia canal de la Faya. Dende equí, intento buscar dalguna sienda que lléveme hasta'l seutor nuna cómoda baxada... pero va ser que non.

Ante mí, tengo una vallina y perderéme casi durante hora y media, a la gueta de senderos factibles cruciando una guapa viesca que cuando crees alcontrar senderu con salida tórnase nun bardial infumable.

Otru intentu pela parte alta, llevóme a xubir casi penriba'l seutor y tener que dar la vuelta al non alcontrar baxada posible. Finalmente, vuelta p'abaxo y casi con ganes de colar, pillo una pista casi pegáu a la última casa del pueblu y como non, con tola tranquilidá llego hasta'l seutor.

Con un sudada increyible y casi sin ganes de poneme l'arnés, faigo un esfuerzu ya intento meneame per un 6a castronazo que tengo que facer al segundu pegue pa encadenalo. Cuéstame enforma, trepar en escueles nueves pa mi y necesito varies víes pa pilla-y el puntu a la roca.

Demientres la escalada, falar un ratín y picar dalgo pola hora que yera, Kíla anda a lo suyu por ahí como siempre pero nel intre avérase de más a los dominios d'una gran danés y con comida de pol mediu, píllala pocu sollerte y méte-y un mordiatu como na so vida.

Cola perrina sangrando y lloramicando, quitenseme toles ganes de trepar y el restu la tarde ocupámosla en curiar que nun enguarre la ferida y en curásela gracies a Ramón, que tuvo los ánimos pa dir hasta'l coche a pol botiquín cola caminata de turnu.

Mil gracies Ramón... yes un grande.

Ensin ganes de facer na y con mal cuerpu... colamos de Murotecho, esperando que la próxima visita seya un pelín más agradable y pueda centrame n'esguilar qu'al final ye de lo que trátase y non de meteme nuna enguedeyada pel monte y que me muerdan a la perra jeje.

La próxima más y meyor... porque pior ya nun puede ser...
Categoríes: Canal Blogues, Recomendaos

Rodrigo Cueva's around the world

Cultura basura - 22 Marzu, 2017

Rodrigo Cuevas, amás del artista del momentu, ye un soplu d'aire frescu pa la cultura asturiana. Los sos sones y estétiques tradicionales amestaos con música electrónica y cabaret frañaron tolos esquemes y valtaron munches muries. Tanto que gracies al so trabayu y dende los ámbitos de la contracultura metió la identidá asturiana nos escenarios más mainstream -xira nueva presentada na Llaboral y, depués d'actuar en Madrid, parada próxima nel Niemeyer, edificios emblemes de la política cultural de la FSA-. Sicasí, l'artista uvieín nun ye un rara avis dientro de la escena sonora mundial. Asina, podemos ver dellos exemplos de cantares con petardéu del bonu enllenos de discursu reivindicativu -amás de qu'amesten cultura pop(ular tradicional) con cultura pop (globalizada)-.



El californianu AB Soto amesta na so música ritmos populares llatinos con pop, house y dance. Too ello pa burllase de los estereotipos sobre la cultura mexicana y la cultura LGTBI. Equí podemos velu nel so éxitu “Cha Cha Bitch”, tema billingüe onde aparez vestíu con versiones mui petardes de los traxes tradicionales mexicanos. Al traviés del humor, esti artista queer quier criticar la marxinalidá a la que la mesma comunidá gai somete a dalgunos de los sos miembros. Un bombazu que yá nun pue faltar nos sitios d'ambiente norteamericanos y que sonó hasta en RuPaul's Drag Race -que ye tanto como salir en Pieces pa un bablista que presenta'l so poemariu nuevu, pero en rollu marica y a nivel mundial-.



Arisa nun ye un cantante. Ye una fiesta de temática LGTBI que s'entama davezu en Tel Aviv. Pa promocionar esta actividá, l'artista Uriel Yekutiel protagoniza -en playback al meyor xeitu drag queen- dellos videos enllenos de cuerpos masculinos, vestíos imposibles y música con sones mizraxinos. Ye dicir, de los xudios que llegaron de los países del norte d'África, una minoria dientro d'un país gobernáu por xudíos askenazinos (d'orixe européu y principales validores del carácter occidentalizáu del Estáu). Equí canta en play-back un tema tituláu “Esto nun ye Europa”, poco más que dicir.

Categoríes: Canal Blogues, Recomendaos

La Olivina del día

Trabayu de Campu - 20 Marzu, 2017

El que de verdá tenía que pagar Impuestu de Sucesiones ye Felipe VI.

 

Categoríes: Canal Blogues, Recomendaos

Ex libris

Trabayu de Campu - 16 Marzu, 2017

Titulu: “Jartum”

Autor: Michael Asher

Torna: Carlos Ruiz Uribarri

Editorial: Inédita Editores

Añu: 2008

LA ÚLTIMA AVENTURA IMPERIAL.- Esti ye’l sotítulu qu’anuncia’l llibru y en verdá que ye asina. “Jartum” ye un ensayu que se llee como la más entretenida de les noveles y ye que l’autor, perfeutu conocedor del tema y que remana una gran cantidá de documentación, cumple con esa másima d’enseñar antroxando, divirtiendo.

Cuerre l’añu 1883 cuando el Teniente Xeneral William Hicks, al mandu d’unos 12.000 homes, la gran mayoría turco-exipcios, ye derrotáu en El-Obeid poles fuerces derviches, formaes por diversos pueblos y etnies al mandu del Madhi, una especie de nuevu profeta que llogró axuntales a toes pa espulsar a los estranxeros del Sudán. Asina principia la historia de “Jartum”, que va a espurrise a lo llargo de 15 años: los que van dende la derrota del famosu Xeneral Gordón, na capital que lleva esi nome, hasta la so recuperación nel 1898 cola derrota total de los sublevaos. El primer ensayu d’una república islámica fina asi, depués de miles de muertos por dambos bandos. Sudán nun será independiente hasta 1956.

El llibru de Asher recueye tolos aspeutos d’esi periodu con detalle y precisión: nomes, feches, personalidaes, batalles… pero, y esi ye un de los mayores aciertos del escritor inglés, en dambos llaos. Avezaos a escuchar namás la versión de los colonizadores, agradezse conocer tamién la de los colonizaos. Los que lluchen pola so lliberación. Asher trátalos a toos por igual anque, lloxicamente, la mayor parte la documentación escrita ye de los primeros. L’autor vivió munchos años en Sudán y el conocimientu sobre’l tarrén de los llugares de los socesos da-y un plus pa rellatar con detalle’l desarrollu de los combates. Estos son cuntaos con minuciosidá, dando datos de cada batallón, quién lu mandaba, que clas d’individuos lu componíen ya inclusive anéudotes de los corresponsales de los periódicos ingleses que taben nel campu batalla. Pero xunto a esto, tamién les intrigues polítiques y la influyencia del Gobiernu Inglés y de la propia Reina Victoria n’asuntos esteriores, mayoremente pa meter la pata.

Un ensayu, pues, perinteresante que se llee con facilidá anque quiciás l’autor pormenoriza demasiado dalgunos pasaxes ensin que ficiera falta. Con too, un llibru mui recomendable tanto pa los amantes de la Historia, como pa los de les aventures político-militares.

Categoríes: Canal Blogues, Recomendaos

Alles (Valle Altu de Peñamellera) - Cabeza Liño

Camudando'l camín - 16 Marzu, 2017
12 de Febreru de 2017

Track: Alles (Valle Altu de Peñamellera) - Cabeza Liño


Una nueva ruta más del GM Xuan de la Borrina na qu'escapamos pa tierres orientales nel Valle Altu de Peñamellera. Esta vegada y dende cuantayá tornamos a Cuera pa facer la Cabeza Liño, que ya conociera nuna travesía increyíblemente llarga dende Purón hasta Villanueva.

Esta vegada nun vamos ser tan animalinos y saldremos dende Alles nuna circular clásica dende les falderes sur de Cuera, ya que tolos pueblos tienen más menos una pista formigonada hasta brañes altes que tienen accesu de secute a la parte alta de Cuera.


En Alles (342 m) tenemos el nuesu puntu de partida
Asina, plantámonos n'Alles dempués del viaxe hasta Unquera pela autovía'l Cantábricu onde almorzamos como siempre y llueu siguimos carretera N-621 entrando de nuevu a Asturies per Buelles, El Mazu y Panes, pa pasar a la As-114 onde siguiremos hasta Niserias, desviándonos a la As-345 que fadrános pasar per Besnes y finalmente Alles.

Magar de los preparativos, saldremos d'Alles cruciando'l pueblu hasta salir pel barriu San Roque, garrando una d'eses pistes de Cuera, que fadrános ascender ensin mayores dificultaes que garrar un ritmu curiosu y nun cansar de pisar formigón d'envuelta n'envuelta.

Xubiremos per pista hacia Llandábanes
Aparte de mirar pente les ñubes, a la increyible Pica Peñamellera, alcontrámonos de sorpresa una marquesina a mou de mirador enmediu la pista. Nun somo a creyelo, asina que sentámonos a esperar pol bus pero como nun llegaba siguimos camín hacia la Ería Llandábanes.

Esti mayáu, con cabañes remocicaes que ya les quinxera yo de casa, va danos el siguiente pasu a tomar, que nun sedrá otru que garrar una canal a la so mandrecha que servirános pa llibrar el Paréu L'Ubricariu que'l Cuera tien a bien ponenos delantre.

Aportaremos a Llandábanes onde garraremos la canal de los Cobaxos
Superaremos la guapa canal de los Cobaxos, con dalgún pasín nel qu'hai que sofitase de les manes y aportaremos a les Barrielles, mayáu con cabaña y muries zarrando los praos colgaos penriba'l paréu L'Ubricariu, teniendo a la vista'l nuesu destín... la Cabeza Liño.

Ascensión final alcontrándonos con ñeve a la Cabeza Liño
Dende les Barrielles, garraremos el senderín más marcáu de los munchos qu'hai del ganáu y diremos ganándo-y tarrén pali pali, perpasando la llende nival faciendo'l caberu tramu hasta'l cumal una puquitina de ñeve cayida la nueche anterior.

Aportaremos a los 1173 m de la Cabeza Liño, dando vista a otros montes de Cuera como la Cabeza Torbina o a la mar, que nun día tan atristayáu ye quiciás lo que meyor yeremos a ver. Con un vientu fríu y molestu, decidimos colar col oxetivu cumpliu y ganes d'alcontrar un abellugu pa poder xintar tranquilos.

Cume na Cabeza Liño (1173 m)
Entamaremos el descensu, col envís d'averanos hasta la Braña Liño, onde gárrase la baxada más típica, pasando pelos Quesares hasta Aleso, pero nós vimos nel gps una posible canal más direuta y fuimos hacia ella aportando a un colláu, onde vemos como ésta desciendo de manera pindia pero posible.

Buscamos un descensu más direutu pa escapar de les ñubes

Según vamos baxando vamos viendo como la canal empindia pero siempre factible, anque andamos cola mosca tres la oreya, ya qu'hai un puntu nel que nun vemos continuidá. Al final, tuvimos lo que buscábemos... un pocu aventura en forma d'un murete d'unos diez metros.

Pudimos superalo toos, con dalgo de tensión, ya que mientres buscaba la forma de baxar tarrén yerbosu envede caliza pa Kíla, ella emperróse en dir pela caliza tres los demás y hubo que garrala al aire pel collar, teniendo al final el pior destrepe yo, pente tapinos y peña de mala calidá.

Toparémonos con una sorpresa en forma de corte pero superámoslo felizmente

Magar del destrepe, con tres variantes en tol grupu lo menos, paramos a xintar al pié de la muria, pa relaxar y porque ellí nun tiraba l'aire y siguimos al ratu col descensu al colláu Alesu. Dende'l colláu, baxaremos ya per bon senderu hasta la cabaña d'Alesu al llau de la riega Vellanco, onde garraremos pista de vuelta hacia Alles.

Descendiendo dende Alesu cómodamente per pista hacia Trespalaciu
Una vegada que ganamos la pista, descenderemos con calma, con dalgún amagu de ponese a orbayar, pero cola calma de llibrar el día, ya qu'en tola ruta malpenes nos moyamos un pocu na parte final de l'ascensión a Liño.

Ensin más, aportaremos a les primeres cases del pueblu de Trespalaciu, onde tendremos casi les meyores vistes sobre la Pica Peñamellera y onde garraremos la carretera qu'en malpenes un kilómetru devolveranos hasta'l centru de la capital de la Peñamellera Alta, Alles.


Aportando a Trespalaciu con vistes a la Pica Peñamellera

En resume, ruta típica de les ascensiones al cordal de Cuera, con muncha pista, pero con tarrén interesante na parte alta, que llevónos a percorrer durante 5 hores y media unos 12,5 km con un desnivel positivu acumuláu d'unos 1100 m aproximáu.

Ta la próxima...

Camudando'l Camín en Cuera
Categoríes: Canal Blogues, Recomendaos

La Olivina del día

Trabayu de Campu - 14 Marzu, 2017

Nuevu impulsu al Mercáu Inmobiliariu: Paez que Pedro Sánchez ta construyendo castillos nel aire.

Categoríes: Canal Blogues, Recomendaos

Cayón Trail (Piloña)

Camudando'l camín - 13 Marzu, 2017
4 de Febreru de 2017

Track: Cayón Trail (Piloña)


Web del Trail: Cayón Trail (Piloña)

Clasificaciones: Clasificaciones 2017  


Dempués de perdeme'l Trail Afuega'l Pitu por baxa por diversión, díbemos a probar como andábemos na Cayón Trail en L'Infiestu. Ye otra carrerina curtia pa estos entamos del añu, de 12 km aproximáu, pero na que les condiciones y el tarrén pel que nos movíemos condicionaba muncho la dificultá real de la prueba.

Primeros instantes de la carrera adelantando posiciones
Nun hai muncho que cuntar nel trazáu, yera un percorríu qu'ascendía al monte Cayón dende la capital piloñesa, pero nun lo facía peles pistes clásiques d'esti monte, sinon que xubía per trialeres na so parte alta que tando tan embarraes facíen bien dura la carrera.

Aportando a meta Alberto y yo con una pingadura superior

Finalmente, tanto Alberto como yo, llegamos casi nel mesmu tiempu y ye qu'otra vegada los altos ritmos del entamu, nun me van bien y llegué a la parte cimera del monte hasta con problemes de xemelos y esta vegada por dalgún motivu nin recuperé na baxada, poro toco sufrir hasta la meta.
La próxima... más y meyor.... espero 
Categoríes: Canal Blogues, Recomendaos

L’Ayuntamientu de Xixón desafina

Trabayu de Campu - 11 Marzu, 2017

Cuando en xunetu de 2015 anunciábase la instalación en Xixón de la International Opera Studio dalgunos dimos un saltu d’allegría. Yera, na menos, una esperiencia pionera n’España. Una escuela pa talentos de cantu, atropaos en tol mundu y que, amás, diba a dinamizar la vida cultural xixonesa. El compromisu pola parte la IOS yera facer dos representaciones operístiques na nuestra ciudá. A cambiu, l’Ayuntamientu comprometíase a da-yos una subvención, anunciar, lloxicamente, les actividaes y facilita-yos dalgún llocal onde poder llevales a cabo.

Too paecía dir bien. L’Ayuntamientu dio-yos como ayuda económica 50.000 euros pa esi añu y facilitó-yos el Teatru Xovellanos. La IOS, pol so llau, cumplió montando, nel 2015, dos representaciones operístiques que tuvieron un gran ésitu de crítica y públicu: “El elixir de amor”, de Donizetti y una guapísima “Boheme” del xenial Puccini. El que quiera, pue mirar nel buscador d’esti blogue la mio opinión sobre dambes. Al añu siguiente la IOS volvió a cumplir, montando otres dos óperes, nesti casu “La Sonnambula”, de Bellini y “Un ballo in maschera” de Verdi. Por primer vez na historia, los aficionaos d’Uviéu teníen que venir a ver bona opera a Xixón.

Pero acabo enterame pol periódicu que la International Opera Studio va abandonar, nun sólo la nuestra ciudá, sinón Asturies, porque les condiciones pautaes col Ayuntamientu de Xixón nun se respeten. Baxáron-yos la subvención de los 50.000 euros del añu que se firmó’l contratu, a unos míseros 15.000, cuasi lo que se da pa facer unes fiestes de barriu. Nun sé satamente cuánto dará agora l’Ilustre Ayuntamientu a, por exemplu, la Selmana Negra, pero pal 2016 fueron 100.000 euros pa quemar nuna selmanina. Amás d’ello, la IOS quéxase de la poca difusión que se daba a los sos espectáculos, cuasi ensin anunciar nin el mesmu día la representación. Igual esos funcionarios o contrataos que lleven esi esperpentu llamáu Divertia, que nun sabe facer nin un concursu pa dirixir el FICX, nun son conscientes de la perda que supón, nun sólo palos que nos gusta la opera, sinón pa la vida cultural y social de Xixón la marcha d’esti interesantísimu proyeutu, pero dalguién debería esplicá-yoslo. Y si se ta a tiempu, intentar correxir la metedura de pata y conseguir que la IOS permaneza na nuestra ciudá. Porque, amás, nun contentos sólo con facer que se marchen, esti añu, ensin que se dea una esplicación afayadiza, tampoco nun se programen equí les dos funciones de la Opera d’Uviéu que teníen firmaes n’otros años. Nesti casu diben ser “Faust”, de Gounod, y el “Rigoletto” de Verdi pero, como digo, por razones non esplicaes, suspendióse l’acuerdu.

En resumiendo: Ente esa Divertia, caxón desastrosu que lleva la cultura na nuestra ciudá, y la pasividá del Ayuntamientu que ta viéndoles pasar, quedamos ensin música operística en Xixón y, además, con visos de que nun vuelva. A nun ser dalguna d’eses compañíes perroneres que termina saliendo más cara qu’estos interesantes proyeutos. Nun se pue desafinar más.

 

Categoríes: Canal Blogues, Recomendaos

La Olivina del día

Trabayu de Campu - 10 Marzu, 2017

Y a Victoria Prego ¿quién la desembalsamó?

Categoríes: Canal Blogues, Recomendaos

Felechosa (Ayer) - Cueves - Pena Melera - Foces del Pino

Camudando'l camín - 8 Marzu, 2017

21 de Xineru de 2017

Track: Felechosa (Ayer) - Cuevas - Pena Melera - Foces del Pino



Ruta del GM Xuan de la Borrina na que xuntámonos ún de los númberos más baxos de los últimos tiempos: Haritz, Benjamín, Kíla y yo. Menos mal, qu'animóse un collacia, Montse, a acompañanos nesti día d'iviernu astur: murniu, húmedu y con un finu orbayu.

El puntu de salida, Felechosa y el conceyu d'Ayer, el cual ta siendo un clásicu d'esta temporada. Como siempre, p'aportar a Felechosa dende Xixón garramos l'autovía minera hasta Mieres del Camín onde garramos la autovía A66 saliéndonos na salida de Morea, pa percorrer la As 112, pasando polos siguientes pueblos: Morea, L'Escuyu, Los Estrul.lones y Cabanaquinta onde garraremos la AS-253 pasando per L.levinco, Entepenes, Col.lanzo, Yanos, La Pola Vieya, el Pino y a la fín Felechosa. 

Partimos de Felechosa (669 m)
Almorzaremos mirando pa la ventana, ya que paez querer ponese más en serio a orbayar y cola calma llevantámonos de la mesa y tiramos hasta la mesma ermita onde saliéramos al picu Retriñón un par de meses atrás.

Esta vegada vamos salir pel camín hacia'l pueblu de Cuevas, pasiando per cómoda pista per Los Castril.lones o la Panda Mamedián pa baxar hacia la piscifactoría y siguir siempre penriba'l ríu Braña hasta Cueves onde cruciarémoslu, na puente la Muñeca, xunto a la carretera pa pasar al otru llau del valle.

Facemos cómodu camín pente Felechosa y el pueblu de Cuevas
Magar d'esti paséu de 3 km aproximáu, vamos entamar cola parte guapa de la ruta, metiéndonos per un senderu no que nómase como la Val.lina Melera y siempre ascendiendo pente los parés de la escuela d'escalada de Cueves y la riega Melera.

Ascendemos pegaos a la escuela d'escalada de Cuevas
El camín ye agradecíu y anque pindiu, va faciendo les envueltes xustes pa dir ganándo-y desnivel al val.le. El día, al empar, diba intentando dexar de tar tan repunante y podíemos quitar la capucha de xemes en cuando, pa llevantar la vista y mirar pa los parés d'esta escuela que tan bona pinta tien y que tovía nun fui a tastiar.

Entreteníos, siguimos xubiendo,  hasta dir dexando abaxo la escuela, alcontrándonos colos primeros restos de ñeve del día. Vamos per una viesca guapísima per tol val.le Melera y como non, la ñeve ensin trespasar el sol con tanta fuercia, aguanta enforma.

Pisamos ñeve de camín hacia'l Mayéu Melera
Tien pinta de tener bon senderu ya inclusu camín tol tiempu, pero nós con tanta ñeve amontonada, a tramos perdemos un pocu'l camín, metiéndonos una vegada per una riega y otres pelos mesmos praos del Mayéu Melera.

Ganaremos altor y el día paez que nos quier dar un respiru, abriendo un pelín y dexándonos ver l'ablucante Picu Torres y tamién al reciente encumáu Retriñón. Siguiremos a lo nuesu y dempués de peganos de más cola ñeve pente una pequeña viesca d'ablanos, pasáu el colláu Gal.los, averámonos al paré de la Pena Melera, per onde avanzaremos más cómodos hacia la col.la Cabera.

Con vistes al Retriñon y al picu Torres vamos ascendiendo hasta'l guapu col.lás Pandos
Nel intre, el día paez abrir y la Pena Pandu y la Pena Reonda, sorpréndenmos ensin dubia cola vista del día. Personalmente, la cara sur de la Pena Pandu paez un auténticu desafíu alpinísticu y sumáu al cielu azul y l'amiestu monocromáticu de peña y ñeve, déxanos namoraos d'esta pequeña collada.

A los 1475 m d'altor y dempués de casi tres hores de brega pente orbayu y ñeve, el sol dános la posibilidá d'ascender el nuesu oxetivu que nun ye otru que la Pena Melera. Meterémonos a ella, per tarrén herbosu, terraciando ensin mayores dificultaes hasta un claru canalizu.

La Pena Melera nun lo pon cenciellu teniendo un tarrén amestáu
Metíos nel canalizu, ya tiramos Kíla y yo a abrir camín pente la ñeve y les llambries per tarrén más pindio de lo que paecía nun entamu, pero sin mayores problemes aportamos a la curtia arista cimera, la cual dexaba un pequeñu crestéu con un pasín aéreu, como sorpresa final, hasta los 1544 m del cumal de Pena Melera.

Cumal de la Pena Melera (1544 m)
Dellos minutinos nel cumal, con un vientón molestu y fríu, mándanos baxar a altores más abellugaos, poro desfacemos el camín, con curiáu nos tramos más delicaos y aína tariemos de nuevu na col.lá Cabera, primera de les collaes de Pandos.

Anque la vista tírase hacia'l Pandu, hermosu cumal que tanto nos llamó l'atención, les ñubes prietes que tapecen la Pena Reonda y los pies moyaos de Montse y míos, por escaecer les polaines, anímen a baxar hacia cotes onde la ñeve desapaeza y podamos sentanos cómodamente a xintar.

Caleyamos per ñeve fondo col envís de descender hacia cotes más seques
Asina lo fadremos y trespasamos los siguiente collaines de Pandos y Palacios, pa baxar apriesa hacia´l mayéu Cuadrezu primeru y llueu al conxuntu de cabañes del Pedrosu, onde nun alcontramos acomodu y siguimos descendiendo hasta'l Pedrosín onde topamos tarrén secu y podemos sentanos con tranquilidá a tastiar el bocadiellu que mercáremos hores enantes en Felechosa.

Descensu cómodu hacia les Foces del Pino
Quince minutinos de recréu y entainamos pa les Foces del Pino que bien conocemos de l'ascensión a la Pena Reonda, pudiendo tomar un senderu colgáu que bien contaben nel blogue Pasu a Pasu, pero ya tamos en modu cerveza ON... así que peles foces p'abaxo, que veníen bien cargáu el ríu Pino y pagaba la pena.

Descendemos hacia'l Pino peles Foces
Ensin munches hestories percorremos les foces, sacamos les semeyes y esfrutamos d'un día que ta tornándose en bono y hasta con ciertu calorín vamos caleyando pela pista que baxa hacia'l pueblu del Pino, desviándonos nel molín de Pión hacia Felechosa.

Esti caberu tramu fadrémoslu pero un senderu claramente remociáu pa xunir los pueblos nun agradable paséu y ensín garrar en tola ruta nin un gramu d'asfaltu lo cual siempre ye d'agradecer nestes rutes circulares que pasen per pueblos.

Garramos un guapín camín dende'l Pino a Felechosa

A la fín, otra pequeña fastera d'esti guapu conceyu d'Ayer que conocemos. Conceyu, que ya podía escaecer un pelín a los esquiadores y mirar pol turismu activu montañeru, de BTT..., ya que paez que'l del gadañu aportó nos meses non ivernales y nun ties casi nin pa tomar un café pela mañana.

En resume, ruta bien prestosa que durante casi 6 hores llevónos a percorrer 14 km y superar un desnivel de 1300 m, nun día nel que tuviemos de too: orbayu, vientu, fríu, sol, ñeve y hasta calorín y cerveza nuna terraza... siempre hai que salir al monte.

Camudando'l Camín n'Ayer
Categoríes: Canal Blogues, Recomendaos

El Día de la muyer trabayadora

Trabayu de Campu - 8 Marzu, 2017

Meyor que cualquier pallabra, mensaxe o sermón que podamos escribir los paisanos nesti día,  ye sentir lo que sienten les propies muyeres na so propia voz. Ésta, por exemplu, ye la de María Teresa González:

NESTA HORA

(A vosotres, compañeres de trabayu de tantos años)

Nesta hora
en que’l xelu acorripia les coraes.
Nesta hora
onde’l tastu y l’inxeniu
esanicien el caberu aliendu
na llarga y afogante agonía.
Nesta hora
d’angustiosa griesca ente ser
persona o cosa.
Nesta hora
de silenciosu silenciu,
de cansáu cansanciu,
d’aborrecíu aborrecimientu,
de vacíu enllenu de vacíos,
pienso en ti.
En ti, muyer,
que nun fueron a dexate
nin el drechu de ser neña,
nin esfrutaste
l’asombru de la mocedá.

Pienso en ti,
que te tracamundiaron los suaños,
pola balleta.
L’arte
pola ferramienta.
A Beethoven
pol chirriar de les máquines.

En vosotros
anónimos navegantes ensin estrelles,
que vos alloriaron
por malsatisfacer necesidaes primarias.
Peones de la fame,
inorantes de la sonisa,
escaecíos del amor.

Pienso en vosotros,
sordos y coxos de la vida.
Nesta hora cabera
desdexada de tou ñiciu creador
y positivu,
dedícovos el mio sórdidu homenaxe,
cola esperanza de que nun tengáis ná
p’ambicionalo too.

(Obra Completa, de María Teresa González. Ed. Trabe. Uviéu, 2008. Px.35-36)

Categoríes: Canal Blogues, Recomendaos

La Olivina del día

Trabayu de Campu - 6 Marzu, 2017

Hailos que son Euroescépticos, yo soi Asturescépticu.

Categoríes: Canal Blogues, Recomendaos

“Kopa”, un de los grandes

Trabayu de Campu - 4 Marzu, 2017

Yera francés d’orixe polacu y en realidá llamábase Raymond Kopascewski pero, claro, con ese apellíu nun había quien lu pudiere llamar, asina qu’abreviólu y quedó namás en “Kopa”. Llegó al Real Madrid a finales de los años 50, depués d’un pasu trunfal pol Stade de Reims onde yá dexó clara la so categoría. Yera mui piquiñín d’estatura, sobre too pa xugar de delanteru centru, puestu que, naquella dómina, solíen ocupar los grandonos rematadores de cabeza. Pero él suplíalo con una velocidá endiañada y un regate curtiu que dexaba a los defenses tiraos pel suelu. Eso, amestao a una gran intelixencia a la hora de ver el xuegu, fízolu llegar mui xoven a lo más alto de la so carrera.

Pese a que’l puestu nel que meyor se desendolcaba yera’l de delanteru centru, nel Real Madrid desplazáronlu al d’estremu derechu, porque nel centru taba l’indiscutible Di Stefano al que naide podía arrempuña-y el sitiu. Na esquina, Kopa nun rendía tanto como d’ariete, anque coles sos fintes y centros medíos complementaba mui bien aquella delantera. La prueba fue que, un par d’años depués, xugó nel so verdaderu puestu cola seleición francesa nel mundial de Suecia, y fue proclamáu meyor xugador del mundial. La delantera de Francia, Wiesneski-Fontaine-Kopa-Piantoni y Vincent, marcó 15 goles en 4 partidos y namás pudo parala aquella maraviosa seleición brasileña de Garrincha, Didí, Vavá, Pelé, etc. Francia quedó tercera, máxima goleadora del tornéu, Just Fontaine record goleador entovía non superáu con 13 tantos y, Raymond Kopa meyor xugador del campeonatu. Llueu volvió al Real Madrid, y ellí otra vuelta a dexa-y el sitiu a la “saeta rubia”, don Alfredo.

Nesi puestu vilu yo xugar n’El Molinón, cuando la tarde del famosu “mataxigantes” en que’l Sporting ganó a los blancos por 3-0. Con un gol de Biempica dende los vestuarios, y otros dos del xenial Sánchez, que por ser de Xixón siempre se-y esixo más qu’a tanta medianía. Aquel día’l prau taba dafechamente embarráu, por mor de la lluvia de los díes anteriores (y d’esi mesmu día que llovió lo que quixo) y Kopa, como’l restu l’equipu, naufragó perdíu ente la repla.

En fin, lleo la noticia de la muerte del “napoleón del fútbol”, como lu llamaba la prensa cursi, y viénenme munchos recuerdos d’aquella época. Vamos zarrar el grifu amestando namás que morrió un gran futbolista y, según dicen los que lu trataron, una gran persona. Que la tierra y seya leve.

Categoríes: Canal Blogues, Recomendaos

Bermiego (Quirós) - L.lampaza - Pelitrón

Camudando'l camín - 3 Marzu, 2017
21 de Xineru de 2017

Track: Bermiego (Quirós) - L.lampaza - Pelitrón


Estrenamos l'añu 2017 col GM Xuan de la Borrina con una ruta cenciella, pa qu'esos cuerpos vayan espulsando tola morralla de fartures de les fiestes navidiegues. Pa ello, ya andaba yo con ganes d'entamar daqué dende'l pueblu quirosanu de Bermiego.

Nomáu, pol so texu milenariu, aportamos a esti pueblu pel camín davezu dende Xixón, garrando l'autovía Y griega hasta Uviéu, onde siguimos pela A-64 hasta'l desvíu de los valles del Trubia, que tantes vegaes garré na mió vida pa dir esguilar y de monte.

Partimos de Bermiego (764 m)
Perpasaremos los conceyos d'Uviéu, Santu Adrianu, Pruaza y entraremos en Quirós pel banzáu de Valemurio, pasando del llau de pueblos como las Agüeras, Cortina, saliéndonos a l'altor de La Vigutierre nel desvíu a la manzorga que xube hasta'l nuesu destín: Bermiego.

Mudarémonos de ropa, a la solombra y con unes temperatures bien baxes, pa salir caleyando cuanto antes hacia la parte alta del pueblu, pero siempre empobinándonos a la manzorga. Ello, fadrános pasar pela Bobia y el Carneiro en tranquila xubida y per camín anchu hasta alcontranos un senderín a la manzorga pel que tendremos de salir, xustu nel Fandanal.

Caleyamos en sele descensu empobinándonos hacia'l Picu La L.lampaza
El senderu ye evidente y sabremos que vamos en bona direición, tan sólo con dir averándonos a la amplia canal pente La L.lampaza y la Pena L'Alba. Nun tien mayor pérdida, sicasí tenemos hasta h.itos y delles marques enantes de sentir una riega que baxa con bona agua.

Enantes de cruciala, bordiamos un pelín a la manzorga pente árboles pa perpasala penriba y vamos pegándonos a la manzorga de la canal, siempre a la gueta del meyor camín, anque realidá ta marcáu en tou momentu.

Superamos la canal con bona pendiente hasta L'Alberu
La canal, sacante dalgún pasín nel qu'apoyar les manes, sólo ties tarrén pindiu y esfrute total, polo guapo de l'ascensión y poles vistes destacando pel momentu, los cordales de Caranga y el del Gurrión que tan bonos momentos ficiéronmos pasar.

Aportaremos pali pali al colláu de L'Alberu (bona referencia de llugar de carga de ñeve) onde esperamos a reunificanos dempués d'un pasín pente un paré y una aguya preciosu. Llueu con vistes al macizu de Penubina ñevao y a la Pena L'Alba siguiremos al primer destín del día: el picu la L.lampaza.

Ascensión contina hacia'l picu La L.lampaza
La xente va gayolera y yo tamién, diba cola cosa del fríu, del posible xelu, pero por suerte na canal nun alcontramos ñeve y agora na L.lampaza (terrenu pindiu y cuestu) la ñeve caltiense en bon estáu y vamos superando desnivel ensin muncho esfuerzu.



Demientres voi abriendo buelga, echo una güeyada a los cumales d'enredeor como'l Gamoniteiru y sobretou, el Moncuevu, monte más guapu de L'Aramo. Ensin mayores dificultaes, namás que llevar el pasu y nun arimase muncho a los cortaos, aportaremos a los 1468 m de la L.lampaza.

Semeya de grupu nel picu La L.lampaza (1468 m)
Dempués de superar 300 m de desnivel dende L'Alberu y encumar, lo siguiente yera baxar un pocu más y crestiar hasta'l picu más altu de la xornada: El Pelitrón. Pero enantes, descendimos hasta'l colláu L'Ortigal y decidimos parar a xintar ya que tábemos nun momentu soleyeru y asitiaos nun prau, poro bien pagaba la pena aprovechar.

Descensu de la L.lampaza hasta'l mayáu L'Ortigal (1429 m)
Magar del descansu, tornaremos a caleyar con cierta galbana y ye que nun soi mui dao a facer descansos hasta dempués d'aportar normalmente al puntu más altu del día, pa llueu facer la baxada con calma, pero con esti día tan prestoso yera imposible nun dexase llevar.

Xubimos en fila hasta'l picu Pelitrón
Aún así, fuimos a calecer motores y con un pocu esfuerzu y dir alcontrando'l meyor camín pente un amiestu de peña y ñeve, caún al so ritmu fue faciendo esta otra llampa final hasta encumar los 1572 m del picu Pelitrón.

Cumal del Pelitrón (1572 m)
Con un día fríu pero espeutacular, despedímonos del cordal de L'Aramo y saludamos al pueblu de Bermiego qu'a vista de páxaru daba ganes de tener un parapente y baxar nun ratín. Pero como nun somos d'esos del traxe d'ales nin na asemeyáu, entamamos el descensu col tramu más abegosu del día, por mor del xelu nesta fastera norte del Pelitrón.

Descendemos pel Trichoriu hacia'l Cagal.luneiru
Pasáu'l descensu del Pelitrón, el tema meyoraba muncho y caminábase con tranquilidá pel Trichoriu pa finar descendiendo hasta'l Cagal.loneiru onde tendríemos a tiru'l colláu nel que restolar un senderín que nos baxare hacia les brañes d'enriba de Bermiego.

Restolamos pente la peña y el gorbizu los meyores senderos
Alcontrarémoslo como meyor podemos, anque aprovecharemos les fasteres más ñevaes pa baxar a pinchu per esta pindia faldera nomada como'l Moratín, desdexando quiciás dalgún sender más evidente que llevaríanos hasta la Braña de Llinares.

Con vistes a los picos recién visitaos desdendemos pela braña Les Canales
Como dixe, baxamos más a fueu y aportaremos a los praos d'enriba de la braña Les Canales, pa baxar per un fondu camín qu'enriégase primeru pa zarrase dempués, desviándonos la mayor parte'l grupu per un prau, cruciándolo hasta la pista que vien de Llinares.

Per pista cómodamente y con vistes guapísimes aportamos a Bermiego
Una vegada que temos na pista, nun tendremos mayores problemes qu'esfrutar de les vistes hacia'l macizu de Penubina destacando como non, la Pena Ruea, nun estáu de blancura perfeuta, anque nesti añu de ñeves escoses pocu-y diba durar.

En resume, ruta perfeuta pa forzar una preciosa ivernal si les condiciones fueren más estremes, pero a nós valiónos enforma pa que tol grupu pudiera tener un día fríu pero de sol y vistes ablucantes. Como pago... namás que 8,5 km, 900 m de desnivel acumuláu y 5 hores y media de caminar seliquino.

Camudando'l Camín nun sueñu fríu d'iviernu
Categoríes: Canal Blogues, Recomendaos

“Papelucho”

Trabayu de Campu - 1 Marzu, 2017

El blogue “MiauBlog”, de la prestixosa Fundación “Cuatro gatos”, asitiada en Miami y que caltién unos importantes premios de lliteratura infantil y xuvenil, recuérdanos a l’autora chilena Marcela Paz (Esther Huneeus Salas de Claro), de la que se cumplen agora los 115 años del so nacimientu. Marcela pasará a la historia de la LLIX pola creación del so prestosu personaxe “Papelucho“, del qu’agora cúmplense siete décades de la so primer apaición. Un neñu de clas media que va escribiendo como una especie de diarios, al rodiu de les coses que van pasándo-y. Asina, l’autora, pol ésitu que tuvieron los llibros del so personaxe, publicó una decena d’ellos con títulos como “Papelucho historiador“, “Papelucho detective“, “Papelucho en la clínica“, y asina hasta un total de diez, l’últimu d’ellos nel 1974. ¿El secretu del ésitu? Pues un llinguax cenciellu y simpáticu que nel intre atrapa al llector infantil. Y como amuesa d’ello, reproduzco un parrafín d’un de los sos llibros, incluyíu nel blogue “MiauBlog”. Veréis cómo vos presta:

“Estaba partiendo nueces con el martillo, cuando me maté un dedo. Fue sin vuelta. Mi pobre dedo agonizó toda la noche. Yo lo sentí palpitar y palpitar hasta que me dormí,  debe haberse muerto en ese momento porque no latió más. Uno ni sabe que tiene corazón hasta en los dedos. Ahora que está muerto, no duele, pero se está poniendo negro y me da como pena de él. No sé cómo enterrarlo. Es terrible tener un dedo muerto y que nadie lo sepa.”

 

Categoríes: Canal Blogues, Recomendaos

De Romandela… rociera

Trabayu de Campu - 27 Febreru, 2017

Seguro que ye que tengo mala suerte, pero’l segundu programa que vi de “De romandela” fue peor que’l primeru. Yá en díes pasaos fici un pequeñu comentariu del únicu que viere, y quedare en poner otru por si meyoraba la imaxe. Pues sintiéndolo muncho, depués d’ésti yá se me quitaren les ganes de ver más. Y ye una pena, porque la idea sigui siendo válida, pero nun soi a tragar que se nos meta de maguyu una asociación rociera que nada tien de ver col nuestru folklore, los nuestros cancios, nin les nuestres tradiciones. Les sevillanes y el rocío, pa ellos. Pa los sevillanos/es y pa los rocieros. Y dende llueu menos soporto a esi presentador, siempre “escedíu”, que reparte tantos abrazos ente los amigos y pon voz andaluza cuando fala colos rocieros. Como dixi la otra vez, seguro qu’hai xente a la que-y presta, como tamién hai xente que vota a Trump, pero como esi nun ye’l mio casu, dígo-y adios murniamente a eses romandeles de la TPA. ¡Hasta nunca!
(Semeya, “Susana Novias”)

Categoríes: Canal Blogues, Recomendaos

Pages