Canal Blogues

Taller d’instalación en Villaviciosa

Softastur - 27 Ochobre, 2014

Coincidiendo col llanzamientu d’Ubuntu 14.10, vamos facer unes Xornaes d’instalación en Villaviciosa. Equí tenéis el cartel:

Categoríes: Canal Blogues

Anovamientu de Telegram disponible

Softastur - 26 Ochobre, 2014

t_logo

Bienllegaos a la dómina de la mensaxería
rápida y segura.

VERSIÓN NUEVA – 1.9.6.5

Inclúi:

– Sofitu pa nomes d’usuariu. ¡Cuerri y escueyi’l de to!
– Avisu nes charres secretes al facer una captura pantalla
– Temporizador estendíu pa la destrucción de mensaxes en charres secretes
– Unviu de mensaxes en segundu planu
– Sofitu pal desaniciu automáticu d’imáxenes en charres secretes
– Compatibilidá con preseos Android Wear (relós, pulseres intelixentes…)
– Rediseñu completu de la interfaz nes tabletes
– Sofitu pa la comprensión y edición de videu. (Rique Android 4.1+)
– Gueta global d’usuarios en Telegram
– Opción “Guarda na Galería”, disponible n’Axustes
– Descarga de semeyes y videos en segundu planu
– Opción pa configurar la guarda de conteníu multimedia al tar en wifi, rede móvil o roaming
– Patrones de vibración nuevos
– Agora les xubes de ficheros nun se fadien al zarrar l’aplicación o en cualesquier otra aición
– Unviu de mensaxes automáticu
– Desaniciu de semeyes de perfil en cualesquier orde
– Milenta igües de fallos y ameyoramientos

NOTA: ¡Ye perimportante qu’anovéis l’aplicación porque dientro poco la función “Allugamientu” dexará de furrular en versiones vieyes!

Categoríes: Canal Blogues

PODEMOS ponse per delantre'l PSOE y a cuatro puntos del PP.

Atlantic Prau - 26 Ochobre, 2014

Barómetru electoral de Sigma-Dos pal programa "Un Tiempu Nuevu" acabante espublizar en T5:

PP: 28.3%
PODEMOS: 24.1%
PSOE: 23.7%
IX: 5.2%
UPyD: 3.7%
ERC: 2.6%
CiU: 2.5%
C’s: 1.8%
PNV: 1.2%
Otros: 6.9%

Categoríes: Canal Blogues

Un tratáu pa una Europa desarmada

xabel diz: - 25 Ochobre, 2014

Xabel diz que la esquierda mexicana insistía, no nocivo de los Trataos de Llibre Comerciu colos Estaos Xuníos, amosaba lo que significaba pa México años de vixencia d’un Tratáu que so la escusa del comerciu inxértase en tolos niveles de la sociedá y non precisamente como daqué positivu. Europa güei alcuéntrase desarmada, lo que pudo [...]

Categoríes: Canal Blogues

Reciben con urries y xiblios a los reis y convidaos a la ceremonia ante un espectacular despliegue policial

Atlantic Prau - 24 Ochobre, 2014

Un gran númberu de manifestantes ocuparon esti vienres la Plaza La Escandalera y parte del Paséu Los Álamos pa protestar contra la xestión política de la crisis, la corrupción y la monarquía, y urriaron  a los Reis y a los convidaos, a la so llegada a la ceremonia de los Premios Príncipe.   

A lo último, la concentración, convocada pola estaya sindical del sindicatu CSI en Caxastur, llevóse a cabu, eso sí, ente un espectacular despliegue policial y con un valláu que zarraba la metá de la plaza uvieína, y torgaba que los asistentes a la protesta s'averaren a la cai que da accesu al Teatru Campoamor. Por esti motivu, los convocantes presentaron una denuncia por vulneración de derechu de manifestación. Nun se produxeron incidentes.   

Antes de les cinco de la tarde empezaron a llegar los primeros asistentes. Poco dempués llegaben en manifestación pela cai Marqués de Santa Cruz los participantes nes marches pola Dignidá (los organizadores cifráronlos en 2.500) acompañaos d'unos cientos de persones que tomaron parte de la plaza y el Paséu los Álamos.

Pancartes de CSI, de Podemos, d'Izquierda Xunida, podíen vese ente mensaxes n'asturianu y en castellán contra la monarquía, a favor de la república, y apelativos como 'Fartones' o 'Lladrones'. En primer llinia, tuvieron trabayadores de Caxastur, lo mesmo que de Tennecco o de la Fábrica d'Armes.   

Na zona de La Escandalera, los numberosos axentes de la Policía Nacional, incluyíos esti añu l'per primer vez los miembros de les Unidaes d'Intervención Policial, namás permitieron averase al Teatru Campoamor a los curiosos de la ceremonia y a los favorables a la monarquía. A los qu'acudíen a protestar obligábenlos a ponese tres el valláu, qu'esti añu taba instaláu tras la fonte. De fechu al exconceyal d'Izquierda Xunida n'Uviéu, Celso Miranda, los axentes quitáron-y una bandera de la República, cuando la enseñó a la llegada de los reis, frente a la entrada del centru escénicu uvieín.   

Los asistentes urriaron enforma al coche de los reis, anque la barrera formada poles bandes de gaites valió de pantalla sonora. Tamién xiblaron a munchos de los convidaos a la gala, ente ellos l'alcalde d'Uviéu, Agustín Iglesias Caunedo, el conceyal Jaime Reinares, l'exministru Josep Piqué, o'l periodista Luis del Olmo.

DENUNCIA   

La estaya sindical de la CSI en Caxastur presentó una denuncia nel Xulgáu de Guardia por vulneración del derechu a manifestación. El sindicalista Juan Manuel Martínez Morala esplicó que'l permisu del actu yera pa tola Plaza La Escandalera y non pa la metá d'ella. "Enseñámosla al xefe de Policía pero fizo lo que-y dio la gana; esto ye un estáu de "desfecho", quexóse.   

Otru exsindicalista, Cándido González Carnero, representante de l'asamblea de les Marches pola Dignidá, mostró'l so preste pol resultáu de la convocatoria y mostró la so confianza en que l'actu d'esti vienres valga pa promover una llinia de movilización xeneral.   

Na concentración tuvo presente Diego Cañamero, secretariu xeneral del Sindicatu Andaluz de Trabayadores (SAT), acompañáu por un nutríu grupu de militantes de la so organización llegaos d'Andalucía en dellos autobuses. Consideró "una vergüenza" el gastu económicu que traen estos premios. "A los qu'hai que da-yos un premiu ye a los mineros, a los estudiantes y a los miles de trabayadores que tienen qu'emigrar porque nun hai trabayu", criticó. Espresó tamién el so deséu de qu'esta y otres movilizaciones acaben nuna converxencia política en tol Estáu.   

Tania González, eurodiputada asturiana de Podemos, presente na Escandalera, destacó la numberosa asistencia a la concentración y tamién amosó'l so deséu de qu'esti tipu de movilizaciones acaben desembocando nuna converxencia política, especialmente con vistes a les elecciones autonómiques y a conceyos.

Categoríes: Canal Blogues

"Tornaron los grises a Uviéu"

Atlantic Prau - 24 Ochobre, 2014

El Voceru d'Izquierda Xunida nel Conceyu d'Uviéu, Roberto Sánchez Ramos, manifestó esti vienres ante l'esplegue policial por cuenta de la ceremonia d'entrega de los Premios Príncipe d'Asturies que "tornaron los grises: la Delegación del Gobiernu central y la policía nacional nun respeten la decisión xudicial y esforcien el derechu constitucional de manifestación."

Pa Sánchez Ramos "ye absolutamente intolerable que la Delegación del Gobiernu y la Policía Nacional repriman el derechu constitucional de manifestación. Nun se ta respetando la decisión xudicial y hanse fincáronse valles pa que nun podamos manifestar la nuesa opinión so la monarquía, la familia rial, los premios príncipe y sobremanera esti espectáculu".

"Paez que los grises volvieron pa protexer a una castra que sigue viviendo bien a cuenta de toos. Muncha policía poca manifestación ye lo que quieren quien s'amuesen obscenamente primero de too n'Uviéu.

Esiximos respetu a la Constitución, al nuesu derechu a falar, a opinar a dicir, queremos menos policía y menos miéu a la xente", conclúi'l conceyal d'IX.

Categoríes: Canal Blogues

Lola Sánchez (PODEMOS): El Tratáu de Llibre Comerciu ente Europa y los EEXX mete miéu.

Atlantic Prau - 24 Ochobre, 2014

Con nocturnidá y alevosía, guardando los documentos sobre les negociaciones so llave, llueñe del algame de los eurodiputaos escoyíos polos ciudadanos europeos, y calteniendo más xuntes colos lobbies que colos representantes de la sociedá civil; asina ye como xestiona la Xunión Europea la información sobre'l polémicu Tratáu de Llibre Comerciu ente Bruxeles y Washington, según denuncien decenes d'europarlamentarios, activistes y representantes de la sociedá civil.

Un añu y cuatro meses dempués del entamu de les negociaciones ente la XE y los EEXX pa crear la mayor aria de llibre comerciu del mundu, apenes tescendió información sobre estes xuntes hasta la fecha, pero ye abondu como por que distintes voces en dellos países alzárense contra'l Transatlantic Trade and Investment Partnership (TTIP, n'inglés).

Sánchez: "Va atacar a la regulación medioambiental, a la soberanía de los estaos, a la propiedá intelectual y a los servicios públicos". "El so valumbu ye enorme. Va afectar a tolos ámbitos de la lexislación que se supon que mos protexe", alvierte Lola Sánchez, eurodiputada de Podemos. "Va atacar a la regulación mediuambiental, la soberanía de los estaos, la propiedá intelectual o a los servicios públicos", apunta . Por casu, no que respecta al mediu ambiente, y a pesar de que l'anterior comisariu européu nesta materia, Janez Potocnik, nun pudiera nomar estudios sobre l'impactu de l'alianza comercial nel mediu ambiente europeo, el TTIP podría sirvir pa importar la "desregulación total sobre'l fracking qu'hai n'EEXX hasta Europa", como apunta Sánchez,"va ponemos nes manes d'EEXX pa usar una técnica peligrosa, que provoca terremotos, qu'emplega productos químicos hasta agora prohibíos", denuncia la representante de Podemos.
La eurodiputada arrinca esti vienres, en Sevilla, una xira per cuatro ciudaes p'alvertir de los peligros d'esti tratáu, que na so opinión recibe'l sofitu de les fuerces polítiques, namái porque estes "tán vendíes a los intereses de les grandes empreses y de los inversores, y namái-yos interesa qu'el IBEX vaya bien".

Con estes charres, nes que van acompañala representantes de plataformes contra'l fracking, l'Asociación pola Tasación de les Transaiciones financieres y pola Acción Ciudadana (ATTAC) o de la plataforma Non al TTIP, la eurodiputada pretende "que la xente se ponga'n marcha, que sepa lo que ta pasando", yá que nel nuesu país hasta apocayá yera una tema dafechu desconocíu.

"Ta fora del alderique públicu y políticu: los grandes medios nun tán informando, la televisión nun diz nada, y ta fora de l'axenda pública", denuncia Sánchez. Inclusive pa los eurodiputaos, escoyíos polos ciudadanos europeos, la opacidá ye total. "El secretismu qu'hai ye indignante, nun paramos de denuncialo. En Bruxeles hai una Reading room na que se curien dalgunos d'estos documentos, na que namái pueden entrar los coordinadores de la Comisión de Comerciu Internacional [siete, ún per ca grupu na Eurocámara], y facélo ensin bolígrafos, ensin móvil, y en teoría nun pueden cuntar lo que vieren.

Depués vien el xefe de les negociaciones per parte de Bruxeles, Ignacio García Bercero, y diz qu'hai bien de tresparencia, que nun sabe por qué nos sollertamos", critica Sánchez. La selmana pasada, cerca d'una trentena d'eurodiputaos (ente ellos tolos de Podemos y dellos d'IX) protestaron ante la puerta que-yos torga consultar los documentos, a pesar de los sos repitíos pidimientos d'accesu. "La Comisión Europea nun quier que sepamos qué se ta falando nes negociaciones, poles consecuencies qu'esto va tener nel nuesu día ente día", denuncia Sánchez, recordando que Bruxeles baltó en setiembre una iniciativa ciudadana que ciscaba la derogación del TTIP.

"Les empreses van faer lo que -yos de la gana"

La europarlamentaria recuerda que l'alcuerdu inclúi un mecanismu de proteición d'inversiones (ISDS) que va dexar que les empreses denuncien a los estaos nos qu'invirtieren si consideren que les normatives qu'apliquen estos estaos afecten de dalguna forma a estes inversiones "Ye un golpe d'Estáu, un ataque a la democracia, y va restar soberanía a los estaos. Les denuncies van facese ante paneles arbitrales, y non ante los tribunales nacionales, pudiendo esixir compensaciones millonaries. Y, anque nun llogren qu'estos paneles arbitrales, formaos por xuristes, yos déan la razón, la factura pa los estaos que se vean somorguiaos nestos procesos puede xubir a miles d'euros per hora de trabayu. Los más prestixosos espertos nesta materia cobren ente 600 y 800 euros per hora de trabayu, y el negociu d'arbitraxe ta en manos d'unes poques empreses, na so mayoría estadounidenses, que llogren beneficios millonarios polos sos servicios. "Les empreses van tener llibertá total pa faer lo que-yos de la gana, y el mayor exemplu ye'l mecanismu de solución de discutinios ente estaos y empreses; esta denominación ye yá una barbaridá, porque pon a multinacionales y países nun planu d'igualdá.

El TTIP da enforma mieu, porque les corporaciones van poder demandar a gobiernos centrales, autonómicos o conceyos, si estes alministraciones efectúen cambeos regulatorios, anque sía pa protexer a los sos ciudadanos. Ye un golpe d'Estáu, un ataque a la democracia, y va restar soberanía a los estaos. Si quieren defender a los sos ciudadanos, van enfrentase a demandes millonaries. O eso, o van tener qu'abstenese d'aplicar estes regulaciones", razona Sánchez.

P'atopar precedentes d'esti tipu de demandes, basta recordar el casu de les acciones llegales entamaes por delles empreses multinacionales contra España, por retirar les subvenciones y ayudes a les enerxíes anovables, o'l casu d'Arxentina colos fondos utre. "Podría pasar daqué asemeyáu inclusive cola Asociación del Rifle, si quieren qu'equí se regule como n'EEXX", apunta la eurodiputada.

El silenciu del Congresu de los Diputaos

"El TTIP ta fora del alderique públicu y políticu; los grandes medios nun tán informando, la televisión nun diz nada" El grupu de la Esquierda Unitaria Europea (GUE/NGL) lleva meses sollertando de los riesgos del tratáu, como tamién fixeron Los Verdes, pero'l silenciu de los grupos más poderosos de la Eurocámara (conservadores, socialistes y lliberales) dio nales al tratáu.
"Últimamente hai unidá a la de criticar la falta de tresparencia, pero no fondero, socialistes, conservadores y lliberales tán d'alcuerdu: sofiten el TTIP, anque pidan información, y vamos ver a ver qué pasa a la de votar", apunta Sánchez, que sicasí cree qu'hai esperances de que l'alcuerdu nun sía ratificáu, si s'exerz abonda presión social.
"El Parlamentu Européu paró l'ACTA (Alcuerdu Comercial Antifalsificación) pola presión social, porque los eurodiputaos d'Alemaña o de Reinu Uníu sintieron la presión de los ciudadanos", recuerda.
En mayu, l'Esquierda Plural pidió al Congresu de los Diputaos que paralizara les negociaciones, daqué a lo que se negó la aplastante mayoría de la cámara. En segunda instancia, de nuevu refugaron el pidimientu d'IX de convocar un referéndum pol que los españoles opinaren sobre'l TTIP y, a lo último, el PP fixo usu del so rodiellu de mayoría absoluto pa entartallar tamién el pidimientu de formar un comité que nel plazu de seis meses informare a los ciudadanos españoles sobre los posibles efectos del TTIP nel nuesu país, una y bones Bruxeles agarrose a les previsiones más optimistes, y nun paez ver nengunu de los peligros del tratáu.

La xira de Sánchez

El ciclu de charres "Desmontando'l TTIP" arrinca en Sevilla, esti vienres, pa dempués llevar a Sánchez hasta Palma de Mallorca (29 d'ochobre, al pie de la eurodiputada Tania González), o Valencia (30 d'ochobre). Si tou va según lo previsto, la eurodiputada entama tamién recalar en Madrid y Barcelona, pa denunciar la cara oculta d'un alcuerdu "que va suponer un reequilibrio de poder ente estaos y corporaciones, que puede camudar tou".

Categoríes: Canal Blogues

"El réxime ta debilitáu y tien miéu"

Atlantic Prau - 24 Ochobre, 2014

La sección de Caxastur de la Corriente Sindical d'Esquierdes (CSI) y l'asamblea organizadora de les Marches pola Dignidá caltienen la so convocatoria de protesta pa esta tardi, a les 17.00 hores, na Plaza La Escandalera, a pesar de les últimes informaciones qu'afirmen que la movilización nun ta autorizao nesti puntu. Numberosos axentes de la policía tomaron posiciones nel céntricu allugamientu carbayón.

Los convocantes aportunaron en que la convocatoria ye llegal y cuenta con permisu, confirmáu en sentencia non recurrible del Tribunal Cimeru de Xusticia por que se celebre nesti puntu. Asina lo esplicó Marco Antuña, representante de la sección sindical, que caltuvo'l so llamamientu tantu a los trabayadores de Caxastur, como a toles persones y colectivos que quieran sumase pa denunciar la situación de paru, la precariedá llaboral y de corrupción. Aportunó que la Corriente realizó yá numberoses manifestaciones ante les oficines de la entidá bancaria, "toes elles con calter absolutamente pacíficu". Sobre la presencia policial, señaló que ye un niciu de que "el réxime ta debilitáu y tien miéu". Nun sentíu asemeyao espresóse Óscar Vega, miembru de l'Asamblea de les Marches pola Dignidá, quien acusó amás a Delegación del Gobiernu central de tar incumpliendo la sentencia de la TSXA que dexa la convocatoria na Plaza La Escandalera. Aportunó en que van allegar al llugar a les 17.00 hores como teníen previstu y alvirtió de les posibles "tensiones" que puedan xenerase si traten de torgar esta movilización llegal".

Categoríes: Canal Blogues

Uviéu va ser güei l'escenariu del primer "cara a cara" ente la castra y l'alternativa de cambiu.

Atlantic Prau - 24 Ochobre, 2014

La esquierda alternativa, plurinacional y abiertamente republicana aconceya güei na capital d'Asturies. Les Marches pola Dignidá y les manifestaciones de la Corriente Sindical d'Izquierda arrexunten a colectivos d'Izquierda Xunida, Podemos, Equo, el SAT y Amaiur. Una esquierda tradicionalmente dixebrao aguiyonada pola irrupción de nueves fuerces y col retu de poder vertebrase en llistes úniques, lo que pa munchos resulta quiméricu. Les Marches pola Dignidá tán integraes por asturianos y por activistes llegaos del Estáu y van partir a primer hora de güei de La Pola Siero, Xixón, Avilés, Llangréu y Mieres. A los dos de la tardi van aconceyar nel Campu La Llosa. Dende ellí van salir en dirección a La Escandalera a la hora prevista pa la manifestación contra los reis.

"UNA EXHIBICIÓN OBSCENA"

Alberto Garzón, posible cabezaleru estatal d'IX al curtiu plazu; Juan Carlos Monedero, de Podemos; Diego Cañamero, del SAT; Juan López de Uralde, d'Equo; Sabino Cuadra, d'Amaiur, son les cares visibles d'un foru social que caleció motores ayeri.

Los colectivos denuncien el parasitismu de la monarquía y de la corte que los arrodia, que la so máxima espresión ye la ceremonia del Teatru Campoamor y l'antepar del Hotel Reconquista. “Una obscena exhibición de poder, riqueza y privilexos”, como sorrayen los organizadores.

Los colectivos de la esquierda republicana reivindiquen la soberanía popular y denuncien la destrucción de los servicios públicos esenciales y del texíu granible. “Oponémonos a la escandalosa situación de probitú y desigualdaes causaes pola avaricia de los ricos, reivindicando la preeminencia del interés xeneral frente al particular”, afirmen dende la plataforma Somos Reales.

CORDÓN POLICIAL

La presencia de los miles de manifestantes va tar controlao por un cordón policial ensin precedentes na ciudá. Nin nos peores momentos del terrorismu etarra llegó a haber una concentración de fuerces de seguridá como la de güei. Más de 600 policíes van desplegase nun radiu bien estrenchu y van convertir la capital nun espaciu altamente xixiláu. Les fuerces de seguridá tán n'alerta y preven que puedan reeditase los incidentes que se producieron en Madrid mientres el pasáu mes de marzu.

L'alcalde d'Uviéu, Iglesias Caunedo, principió a calecer les manifestaciones faciendo un llamamientu públicu a que la ciudadanos ensamen a elles. Los organizadores acusáronlu de criminalizar los actos alternativos.


d'asturias24.es
Categoríes: Canal Blogues

De Tapaencepa (Vigo - Galiza)

Fartucones - 23 Ochobre, 2014


De tapaencepa ye lo que podíemos llamar un gastrobar con una carta de picoteo y una cocina con munches posibilidades (polo que pudimos ver na nuesa visita).

Pela mañana, de baxada del hotel a la gueta d'un sitiu pa desayunar llamonos l'atención; De tolos que fueron pasando pel móvil con tiques foi'l que nos llamó más y creo qu'acertemos. O seya, qu'en tocando la xubida pa'l hotel (en Vigo ye dificil nun falar de xubir y baxar, madre que me....) aparemos a xintar.

Too pa compartir, etamemos por un carpachu de renu, como nun venía con trineu, nun vos sé dicir si yera de renu o d'alce o de corzu, pero taba bono. Bien presentáu, per cenciellu, un poco quesu rallao, dalgo de carambelu de vinagre de módena (per riba del quesu, nun del renu) y AOVE. Un aciertu, que diba entrando mentantu charrábemos col camareru y tomábemos una copina d'albariño (Atrium).



Dempués d'eso, pasemos a unes zamburiñes plancha. Una docenina d'elles de bon tamañu, bien preparaesy aliñades con AOVE sal y acabose. Un plizcu soses, que tien fácil arreglu, pero que nun quita para que la tapina tuviera per prestosa.

Un sitiu, que si nun cambia, bien parez que merez la pena esplorar más en detalle la cocina o los platos más ellaboraos porque promete.

Al final, añadir a la cuenta un cafetín con xelu y 5 copes d'Atrium dexando 40€ en total en tiques restaurante.

Categoríes: Canal Blogues

PLOMOS

Aguantando Cachones - 18 Ochobre, 2014
-El mio tíu Migue, siempre ta mui presente nos mio tebeos. Apaez en "Manzajú", en "Aguantando Cachones" y en "La Llingua Invisible. Tres d'enterame de lo mal que taba, pensé en sacar delles páxines de les munches anécdotes que tovía tengo en tinteru. La cosa foi más rápida de lo que cuntábemos y nun me dió tiempu a que les viera. Estos últimos díes, foron mui llargos y nun me dió tiempu a dibuxar nada, asina que decidí facer esta páxina, que poles sos característiques, llevaba pocu tiempu. Ta siempre "Plomillo".


Categoríes: Canal Blogues

O Rei Pescador (Canido - Vigo - Galiza)

Fartucones - 16 Ochobre, 2014
 A la vuelta de la folganza llarga, decidimos danos una escapadina a Vigo y alrodios y por recomendación lleguemos a O Rei Pescador na playa de Canido. Pa un Uvieista como yo, hai que avisar primero d'onde ta'l chigre, pa que nun te den valdíos al corazón, porque coño, ya tenemos abondo colo nuestro como para amás tener de pasar delantre del campu del Coruxo teniedo Balaidos al pie, quitando esto, el chigre ta bien situauen primera llínea de playa. Nada destacable na decoriación chigre bien puestu ensin concesiones a modernismos con una terracina pa cuando hai bon tiempu.

Pedimos para compartir unes puntielles de calamar (unos calamarinos, vamos) fresquinos, que veníen fritos y llixeramente rebozaos cola compaña d'unes cebollines pasadiner pela sartén. La verdá que mui ricos, un plizcu sosos con fácil arreglu.


De segundu pidimos lo mesmo los dos, unos llombinos de rodaballu xabaz a la plancha que taben perbien preparaos y ricos de tastiu, eso sí, la presentación nun podía ser más deprimente y ochentera, francamente.

Al igual que los calamarinos, veníen un plizcu sosaines y hubo que pedir el sal.


De compaña un Do Ferreiro 2012 y finemos con un cafetín con xelu ca un, too ello por 76 € dos persones que nos paeció caro, claro que veníemos de Portugal con raciones enormes con precios baxos. Nun podemos dicir que la RCP, si la C ye de calidá, tuviera mal, agora, si la C ye de Cantidá, les raciones yeren mínimes. Ca un ya, que decida lo que quiera porque salir a cenar o xintar ye tamién un cúmulu de coses que fain que te presten más o menos los sitios, a nosotros prestonos, pero'l qu'avisa...



Categoríes: Canal Blogues

Maximiano García Venero y la reunificación d'Asturies

Xaviel Vilareyo - 15 Ochobre, 2014


Maximiano García Venero (Santander 1907 – Madrid 1975) foi un reconocíu historiador y periodista santanderín de llarga trayectoria que trabayó con sencia pa llograr la reunificación política de les dos provincies asturianes: Uviéu y Santander.Fundó los periódicos Mediterráneo y Levante. Escribió amplies biografíes de personaxes relevantes como Francisco Cambó, Antonio Maura, Alfonso XII, Melquíades Álvarez o Eduardo Dato. Trabayó tamién nel periódicu izquierdista La Región. De posiciones polítiques inicialmente lliberales pasó a oponese dafechu al Frente Popular y ante l'ascensu del comunismu, anarquismu y nacionalismos separatistes, decidió apoyar a la Falanxe. Pero la so verdadera vocación posterior foi la lliteraria y la d'investigador de la historia contemporania d'Hespaña. Entre los llibros que publicó destaquen Historia del nacionalismo catalán (1944 y 1967), Historia del nacionalismo vasco (1945 y 1968), Historia del parlamentarismo español (1946), Historia de las Internacionales en España (tres tomos surdíos ente 1956 y 1957), ya Historia de los Movimientos Sindicalistas en España (1961).La Constitución hespañola de 1931 proponía que les provincies limítrofes podíen establecese como Rexones Autónomes y dotase d'un Estatutu d'Autonomía propiu con goviernu y parlamentu. Maximiano García Venero darréu vio que l'afinidá ente les provincies d'Uviéu (Asturies d'Uviéu) y Santander (Asturies de Santiyana) venía a confirmar la necesidá d'una reunificación de les antigues ya históriques dos Asturies conformando una sola entidá política que la propia historia configuró como una sola realidá etnocultural sólo dixebrada por artificiales divisiones alministratives recientes. Como bon historiador Maximiano García Venero sabía que dende 1835 les ancestrales Asturies d'Uviéu, Santiyana y Tresmiera quedaron convertíes por arte de barrabiellu alministrativu nes provincies d'Uviéu y Santander, con pérdida incluso de territorios históricos a favor de Lugo y Lleón (Burón-Miranda, Suarna, Sayambre-Valdeón). Llegáu yera'l momentu en 1932 de recomponer lo que la historia xuntó per sieglos y que los intereses político-caciquiles separtaron: reaxuntar el territoriu históricu d'Asturies agrupando políticamente a les provincies d'Uviéu y Santander (Les Asturies).
Maximiano García Venero sigue la tradición reintegracionista o unionista del territoriu de Les Asturies que promovieron insignes y destacaos políticos y escritores santanderinos y otros destacaos asturianos de la xeneración de 1865.Como periodista, el primer pasu de García Venero sedría mobilizar a la prensa, tanto a la d'Uviéu, Xixón y Santander como a la de Madrid, apelando a la necesidá espiritual o "derechu de categoría espiritual" que daría lexitimidá a la xuntanza de les dos provincies. Esi elementu espiritual sedría l'étnicu (entendíu como "cultural" o "cultura compartida"). Otru sedría l'afectivu y sentimental (apreciu ente les dos provincies y rechazu común a Castiella) y un terceru sedría el material o económicu, les ventayes económiques al empar de la rexuntanza pa los dos territorios.La prensa d'Uviéu recoyó les propuestes de reaxuntanza territorial de García Venero con "una interesante manifestación de simpatía" como él mesmu escribió. L'argumentu principal de García Venero yera qu'ente la provincia de Santander y la d'Uviéu existe positivamente una lligazón espiritual, étnica ya histórica (Les antigues Asturies d'Uviéu y Asturies de Santiyana) y por ello Les Cortes de Madrid nun podíen fomentar problemes artificiales d'autonomíes non-históriques. La xuntanza de Santander con una Autonomía castiellana sedría pa García Venero "un caos" debío a les fondes diferencies culturales. En cabiu, la Rexón autónoma d'Uviéu y Santander (Les dos Asturies) produciría un conxuntu de ventayes pa toos. Ganadería, agricultura, poblamientu, territoriu, pesca són iguales tanto n'Uviéu como en Santander y la industria y minería d'Uviéu compensaría la escosura industrial de Santander pa poder competir les dos provincies xuntes frente a Vascongaes y Galicia.Maximiano García Venero y la reunificación d’Asturies
García Venero impulsa asina la necesidá de facer un Estatutu biprovincial de Les dos Asturies darréu, antes de que se faiga unu castiellanu. Asina cada Diputación fairía un proyectu que se refundiría nun Anteproyectu d'Estatutu, que, aprobáu nun referéndum popular, s'entregaría a la Comisión d'Estatutos de Les Cortes de la República en Madrid onda se discutiría, votaría y promulgaría. En 1935 el nuevu Estatutu panasturianu podría yá tar en vigor según los sos cálculos.Maximiano García Venero sigue la tradición reintegracionista o unionista del territoriu de Les Asturies que promovieron insignes y destacaos políticos y escritores santanderinos como fueron Gumersindo Laverde, Marcelino Menéndez Pelayo o José María de Pereda y otros destacaos asturianos de la xeneración de 1865 como Justo Álvarez Amandi, Arias de Miranda, Eduardo Bustillo, Narciso Campillo, Emilio Carrizo del Riego, Nicolás Castor de Caunedo, Adolfo de la Fuente, Ángel Fernández de los Ríos, Juan García, Montequín, Luis Pérez Mínguez, Cándido Salinas, David Sampil y Ceferino Suárez Bravo.
Categoríes: Canal Blogues

Mieu

El Güeyu L'Agua - 15 Ochobre, 2014


La nueche yera escura como boca de llobu. Colás enfilaba pa casa pela caleya coles boleres del gargüelu medio pesllaes pola medrana. Yera viéspora de Tolosantos y yá se sabe que nesta fecha anden los difuntos en danza y la Güestia de ronda.

La lluna allumaba como un candilín feble. De sutrucu, sintió como un ruxerrux pa contra'l bardial y vio unes bisarmes blancucies. ¡Yera la Santa Compaña de xuro!. Entós garró un palu de la sebe y fixo un círculu en suelu pa metese dientro y oxar asina'l peligru qu'achisbaba la so vida. Pegó un blincu, metióse nel redondel, y sintió como si pisare dalgo blanduzo que chiscaba y arrecendía. Al empar, dos solombres salieron a escape al traviés del prau. Abultó-y comitiva mui ruina pa una procesión de difuntos, pero... ¡coses de la ultratumba!.

Xunta la panerona de sos padres, Tuxa comentaba col so mozu Andrés la mala suerte que tuvieren:

-¡Rediola, nin!. Pa una vez que nos ponemos a trebeyar tranquilinos va pasar per ellí'l tochu Colás-.

-Dígotelo yo, manti, colo afayadizos y calentinos que tábemos naquel requexín...-

Cuando aportó a casa, Colás aguantaba como podía la recatafila que-y taba soltando la so muyer:

-¡La Güestia, sí!. ¡Y la pigorcia que traes tamién!. ¡De los coños col xostrón!. ¡Si nun anduvieres de pingu per ende p'acullá pela nueche, pimplando y candonguiando, nun triabes moñiques, rediós que non!. ¡Mira qué entafarre de cocina, gochonzón!. ¡Vas ponete a fregalo tu...!-.
Categoríes: Canal Blogues

LOS VIAXES DE GULLIVER nel Valey

El pase del filme fízose nel Centru Cultural Valey (09/10/2012) pa dos colexos del conceyu Castrillón, en collaboración cola conceyalía de Cultura y de l’Asociación Cultural L’Arribada. Tres la proyección sortiamos siete DVDes col nuesu doblaxe al asturianu d’esti clásicu d’animación. TÍULU ORIXINAL  Gulliver’s Travels AÑU 1939 DURACIÓN 76 minutos DIRECTOR Dave Fleischer GUIÓN Dan … Sigue leyendo →
Categoríes: Canal Blogues

José Rendueles, gaiteru de Quintueles (Villaviciosa)

En Ca'l Gaiteiru - 9 Ochobre, 2014
Cantiles en Quintueles. Sacao del blog de Quintes.José Rendueles Rodríguez nació en Quintueles en 1887, fiu de José y Balbina. Casó en Quintueles, con Oliva Varas, y tamién en Quintueles trabayó na so casería de La Rasuca y morrió en 1976.

El famosu cuadru de Pascual Tejerina nel que sal José RenduelesDe nenu gustába-y la gaita, y un vecín regaló-y un punteru. José púnxo-y un fuelle de piel de gatu, curtía por él, y con ella deprendió a tocar. Depués tuvo una gaita de José La Piedra, y yá la última que tuvo compró-yla a la viuda del Busdongu. 
Deprendió a tocar solu, escuchando a tolos gaiteros que podía, y reconocía que-y gustaba muncho l'estilu de Libardón. Convirtióse en Joselín el Gaiteru, un referente nes Mariñes. Foi un gaiteru tradicional con mayúscules, porque deprendió al xeitu tradicional, y tocaba pa la misa, pa la procesión y pal baile sueltu. Gaiteru gaiteru. De los de verdá. Acompañáu al tambor por Serafín Álvarez, de Quintes.

¿Con Oliva? Archivu de Pedro PanguaPero foi más: foi tamién unu de los gaiteros que vivió la transición al folclorismu. Asina, tocó pa grupos folclóricos, como Los Xustos, colos que grabó dellos discos. Tamién salió na película Jandro, protagonizada por Arturo Fernández, y en 1960, con 72 años, ganó'l concursu de Gaitero Mayor de Asturias. 
Gaita y tambor en Casa Quilo: Quilo, Serafín, Joselín y Octavio. Sacao del blog de QuintesFoi bon paisano y bon músicu; poro, foi mui queríu na contorna y llegó a tener muncha repercusión mediática. Y homenaxes, cómo non. Si pincháis equí podéis ver cómo foi l'homenaxe que-yos ficieron a José y a Serafín los sos vecinos en 2011. Con Iván Rionda, que pa mí ye depositariu del saber gaiteru de Xixón (y d'otres partes), y Ricardo Moreno como invitaos.
Esta entrevista ta un poco ficcionalizada, pero tien interés.
DESCARGA
Resúltame especialmente emotivo lleer la preocupación que José tenía pol futuru la gaita, llegando a ofrecese, arrogantemente, pa enseñar a dalgún rapaz interesáu que pudiera aparecer. 
DESCARGA
Na entrada anterior espliquévos porqué diba a ponevos equí la Alborada que tocaba José Rendueles. Ye un exemplu perfeutu de pieza que munchos gaiteros yá sabemos tocar, pero que nos llega mediada por milenta versiones distintes. Agora podéis pinchar y sentir l'orixinal.Cómo tocaba esti paisano. Cómo tocaben, en xeneral, los gaiteros de fai ochenta años...  level. 


¿Qué vos pareció? ¿Dalgunu ta esperando qu'entre la Marcha Arnao? 
José yera mui finu y tocaba limpino, medío y ornamentao con claridá. Y medía perfectamente Equí vos dexo una trescripción fecha por Pedro Pangua y por mí, representando lo que pensamos que facía; en realidá, combinamos lo que fai en cada una de les dos vueltes que-y da a la pieza. Mirái a ver qué vos paez. Toi dudosu col seisillo del compás 23, pero paezme casi la meyor opción. 
DESCARGASerafín y Joselín. Tamién sacao del Blog de Quintes.
Categoríes: Canal Blogues

Refalfiar o respigase, that's the question - Prólogu a la próxima entrada del blog

En Ca'l Gaiteiru - 9 Ochobre, 2014
L'otru día tuve xintando col mayestru gaiteru Flavio R. Benito en Nava. La conversación con Flavio ye un placer siempre, y como nun podía ser d'otra manera terminamos falando de la profesión que tenemos en común: enseñar a la xente a tocar la gaita.


Salieron munchos temes, y ún d'ellos foi la cuestión del refalfiu. El refalfiu de los alumnos, claro. Tamos nuna época na que cada vez hai más recursos pa deprender música tradicional, cada vez ye más fácil acceder a les fontes y a tola información. Y eso ye bono a tolos niveles... pero refalfia. Los guajes ven yá como normales coses que pa los que deprendíen a tocar la gaita nel añu 1992 o nel 2004 yeren escepcionales. Esplícovos por qué:
Fai años los estudiantes de gaita salíen de clase con una simple partiturina de la pieza que teníen que deprender. O colos nomes de les notes apuntaos. Si teníen suerte, llevaben tamién una cassette con una grabación de la pieza en cuestión interpretada pol mayestru. Aquello nun taba mal, claro, pero ye que últimamente la cosa cambió muncho. Agora ye normal que el guaje lleve nel USB la partitura, la grabación en vidiu del mayestru (que va poder ralentizar con cualquier reproductor d'audio), la grabación orixinal del gaiteru tradicional que la tocaba y un par de reellaboraciones d'esa melodía feches por grupos folk asturianos. Pa que'l guaje toque encima d'elles y too, si quier. 

Y asina llega'l refalfiu. Ye normal, porque los nenos ven yá como normal tener esi accesu inmediatu a tantísima información. Pero los que somos un poco más vieyos nun podemos evitar acordanos d'una época na que tolo que tocabes taba arrodiao de muncha más escuridá. Y tovía taría, si nun fuera por xente como Ambás o Luis el de Arroes. 
Y díxome Flavio esi día: "Diego, tuvi ventipico años tocando la muñeira de Lliberdón hasta que por fin llegué a escuchar al propiu Lliberdón tocala, nuna grabación antigua que me pasaron. Y púnxoseme la piel de pita". Y yo entiéndolo perfectamente, porque pásame lo mesmo. Nun conocemos de primera mano les fontes de muncha de la música tradicional asturiana que tocamos, y la ilusión que nos fae "iluminanos" ye tremenda. Depués queremos compartir eso colos alumnos, bien sea na nuestra Escuela de Música o en blogs como esti, y queremos que los guajes se respiguen tamién. Y los probes nun se respiguen, porque tienen catorce o quince años y pa ellos ye normal atopar el trabayu yá fechu y toa la información bien recopilada y organizada yá de mano. Ye un cambiu positivu, pero lo de respigase queda namás pa los mayores de 25 años. Los chavales que tan deprendiendo agora a tocar la gaita nun saben nada de la épica de la gaita. Pa munchos d'ellos la gaita ye un instrumentu más, como pue selo un bombardino. Nun sé si eso ye bono o malo. Sólo sé que la esperiencia de respigase al atopar la fonte d'una pieza que yá sabíes ye imposible de tresmitir a un alumnu. 
Y too esto yera pa contavos que fai unos díes, restolando poles cassettes y archivos de Pedro Pangua, respiguéme muncho con una grabación. Ye un exemplu perfectu de lo que vos contaba: una d'eses pieces que toques de tola vida, años y años, pero ensin conocer la fonte, ensin tener escuchao al músicu que la inmortalizó. Ye la alborada que tocaba José Rendueles, gaiteru de Quintueles (Villaviciosa).
Ye una pieza que munchos conoceréis por tar nel repertoriu del Llan de Cubel. Concretamente, ye la segunda melodía del míticu set San Roque, del discu L'otru llau de la mar (Fonoastur):
                         
Pieza popular a tope. Pues bien, creáislo o non, yo nunca escuchara a José Rendueles tocala. Nin l'alborada nin nada: nunca escuchara a esi gaiteru mariñán. Y gracies al archivu del mio proxenitor pude escuchala. Y respiguéme. Esi respigu que ta reserváu a los que llevamos años tocando pieces "a ciegues" y depués escuchamos les fontes de les que vienen. Y eso nun ye todo, claro. Hai que contar con que les versiones popularizaes siempre nos lleguen un poco variaes, y al escuchar al informante orixinal descubrimos matices y fraseos que nun coinciden cola idea que teníemos.
Mio padre entrevistara a Nieves, fía de Rendueles, nel so pisu de Xixón. Fai munchos años d'eso. El casu ye que yo alcuérdome de dir con él a visitala. Tendría yo igual 10 años. Nieves y mio pa falaben de discos, de fotos, de recortes de prensa, de gaites y de too aquello, y yo nun escuchaba muncho porque d'aquella nun m'interesaba pa nada la gaita. Gracies a eses visites y a la amabilidá d'esta señora tenemos el material que voi subir na próxima entrada. 
Categoríes: Canal Blogues

Pages